RONDA PROBINSYA

Dalawa ang patay sa bus accident sa Lalawigan ng Isabela sa kasagsagan ng malakas na ulang dulot ng Bagyong Florita.

Ilang oras matapos mag-landfall ang bagyo sa Bayan ng Maconacon, isang Victory Liner Bus ang tumagilid sa gilid ng National Highway at bumangga sa isang poste ng kuryente sa Bayan ng Naguillan.

Ayon sa Naguilian Municipal Police, patungong Sampaloc, Maynila mula Tuguegarao City, Cagayan ang sasakyan nang ma-aksidente dakong alas-11 kahapon ng umaga sa Barangay San Manuel.

Hindi umano na-control ng driver ang brake dahil sa dulas ng kalsada.

Anim na pasahero ang lulan ng bus nang maganap ang trahedya.

Aabot sa P5.3 million na halaga ng smuggled cigarettes ang sinira ng mga tauhan ng Bureau of Customs (BOC) sa Irawan, Puerto Princesa City Palawan.

Pinangunahan ni BOC Puerto Princesa Port Collector Gladys Fontanilla-ESTRADA, ang pagsira sa 207 boxes at 3,507 reams ng mga sigarilyo na nakuha mula Agosto a-16 hanggang a-18.

Sinaksihan ng mga tauhan ng Philippine National Police Maritime Group, Philippine Coast Guard Palawan, at National Bureau of Investigation Puerto Princesa District Office ang pagsira sa mga iligal na produkto.

Inaalam na ng mga otoridad kung sino ang nasa likod ng pagkakasabat sa mga nakumpiskang sigarilyo habang hinigpitan narin ng mga otoridad ang pagbabantay sa mga border para makontrol ang pagpasok ng iligal na produkto sa bansa.

Nabahala ang mga residenteng nakatira sa bukiring Barangay ng Don Gregorio Antigua sa Bayan ng Borbon, Cebu matapos magkulay gatas ang ilog sa kanilang lugar.

Ayon sa Barangay Kapitan na si Gitoy Ornopia, agad silang nagsagawa ng imbestigasyon hinggil sa reklamo ng mga residente dahil ito umano ang kauna-unahang pagkakataon na nakaranas sila ng ganitong uri ng insidente.

Sa inisyal na imbestigasyon ng mga tauhan ng Barangay, napag-alaman na isang residente ang naghugas ng isang malaking water-based flexi bag dahilan kaya pumuti ang tubig sa Goyong River.

Nabatid na ang Flexi Bag ay ginamit umano sa pagbiyahe ng mga likido, at nakuha ito ng naturang residente mula sa pinagtatrabahuhang trucking services sa Mandaue City.

Sa ngayon, ipapadala ang water sample sa lokal na pamahalaan at sa kinauukulang ahensya ng gobyerno upang masiguro na walang nakahalong kemikal sa tubig mula sa ilog.

Sa ngayon, nagpaalala ang barangay sa mga residente na huwag munang gumamit ng tubig mula sa ilog at kung maaari ay ilayo muna pansamantala sa ilog ang mga alagang hayop habang nagpapatuloy pa ang imbestigasyon sa Goyong River.

Pinaigting na ng ilang Local Government sa Central Luzon ang kampanya Kontra Dengue lalo’t naitala sa rehiyon ang pinakamaraming kaso ng naturang sakit sa Pilipinas.

Simula Enero a – 1 hanggang Hulyo a – 30, aabot na sa 18, 664 ang dengue cases sa Region 3 o 18% ng kabuuang bilang ng mga kaso sa bansa.

Kabilang sa mga puspusang nagpapatupad ng kampanya kontra Dengue ang mga Bayan ng San Miguel at Barangay Minuyan sa Norzagaray, Bulacan.

Sa Bulacan ang may pinakamaraming kaso ng Dengue sa rehiyon.

Namahagi ang LGU ng San Miguel ng mga pamplet na may impormasyon hinggil sa pag-iwas sa sakit na dala ng lamok habang nagsagawa ng disinfection sa mga bahay sa Barangay Minuyan.

Nag-fogging naman sa Cabanatuan City, Nueva Ecija at pinuntahan ang mga paaralan na humiling ng tulong laban sa dengue bilang preparasyon sa balik-eskuwela ngayong araw habang nagkaroon din dengue misting sa Tarlac City.

Samantala, inihayag ni DOH Officer-In-Charge Maria Rosario Vergeire na bukod sa paglilinis at disinfection, naglunsad din ng preventive measures ang mga sangay ng kagawaran.

Naglaan din anya ng dagdag-pondo sa mga ospital bilang paghahanda.

Dalawa ang patay sa sunog na sumiklab sa Ormoc City, Leyte.

Kinilala ang mga nasawi na sina Belen Sumalinog, 62- anyos at anak nitong si Lyndon Sumalinog Mendoza, 36- anyos.

Dakong alas-2 ng madaling araw kahapon nang sumiklab ang apoy sa bahay ng mga biktima sa Barangay Cogon.

Ayon sa Ormoc City Fire Station, na-trap umano ang mag-ina sa loob ng kanilang bahay.

Malaki na ang apoy nang magising ang mga kapitbahay kaya’t hindi na nasaklolohan ang mga biktima na walang kasama nang maganap ang insidente.

Dalawang bahay naman ang nadamay sa sunog na naapula dakong alas-4 ng madaling araw.

Aabot sa P1.8 million ang halaga ng mga naabo o napinsalang ari-arian habang inaalam na ang sanhi ng pagkalat ng apoy.