RONDA PROBINSYA

Hindi pagagamitin sa mga mag-aaral sa pagbubukas ng klase sa Lunes ang anim na silid-aralan sa Dinalungan, Aurora na malapit sa fault line.

Matatagpuan ito sa Mariano D. Marquez Memorial High School sa Aurora.

Pero ayon sa Aurora LGU, ligtas ang ibang mga silid-aralan sa lugar kaya hindi dapat mangamba ang mga magulang.

Sa ngayon, tiniyak ng lokal na pamahalaan ang sapat na bilang ng classroom sa lalawigan kasabay ng pagbubukas ng School Year 2022-2023 sa Lunes.

Labing tatlong pamilya ang lumikas dahil sa landslide sa bayan ng Barlig, Mountain Province kagabi.

Ayon sa Barlig Disaster Risk Reduction and Management Office, bandang 10 ng gabi gumuho ang lupa sa bahagi ng bundok sa Barangay Fiangtin kung saan natabunan ang bahagi ng kalsada.

Wala namang natabunang bahay o nasaktan na residente sa naturang insidente.

Nabatid na ang nararanasang mga pag-ulan sa mga nakalipas na araw ang dahilan ng paglambot ng lupa sa naturang lugar.

Nakapagtala ang Department of Health Center for Health Development o DOH-CHD ng 8,054 tuberculosis cases sa Ilocos Region mula Enero 1 hanggang Hunyo 30 ngayong taon.

Sa isang virtual forum, sinabi ni DOH-CHD medical officer, Dr. Rheuel Bobis na karamihan sa mga tinamaan ng sakit ay mga nasa hustong gulang o adults at matatanda dahil sa mababang immunity ng mga ito.

Ayon kay Bobis, lumalapit na aniya ang DOH at local government units o LGUs sa mga komunidad upang masuri ang mga may TB.

Tiniyak din ng doktor na may sapat na supply ng gamot ang mga ospital o health centers sa mga lokal na pamahalaan.

Niyanig ng magnitude 5.2 na lindol ang Bayan ng Bulan sa Sorsogon kaninang alas -3:22 ng umaga

Ayon sa Philippine Institute of Volcanology and Seismology (PHIVOLCS), may lalim itong 27 kilometro.

Tectonic naman ang pinagmulan ng naturang lindol.

Naitala naman ang Intensity 3 sa Legazpi City, Albay; Mahaplag, Leyte, Intensity 2 naman sa Tabaco, Albay at Intensity I sa Naval, Biliran; Iriga City, Pili, Camarines Sur; Calubian, Ormoc City, Leyte; Prieto Diaz, Sorsogon.

Samantala, wala namang inaasahang pinsala pero asahan na ang mga aftershocks kasunod ng naturang pagyanig.

Patuloy na nakakapagtala ng mababang enrollment rate ang Bangsamoro Autonomous Region in Muslim Mindanao (BARMM).

Ayon kay Senator Sherwin Gatchalian, Chairperson ng Senate Basic Education Committee, nangyari ito noong 2012 hanggang 2013 na may 744, 872 enrollees, at 2020 hanggang 2021 na may 596, 060 enrollees.

Malayo ang tala ng kalapit na lugar ng BARMM sa umaabot sa mahigit 1 milyon ang nagpapatala.

Bilang solusyon, tiniyak ni Education Undersecretary Epimaco Densing na ginagawa nila ang lahat upang mahikayat ang mga magulang sa barmm na i-enroll na ang kanilang mga anak lalo’t pasukan na sa Lunes.

Patay ang isang driver ng ambulansiya sa Biliran matapos atikihin sa puso habang nagmamaneho.

Kinilala ang biktima na si Roderick Cesora, 55- anyos at driver ng Rural Health Unit sa Caibiran.

Sa inisyal na imbestigasyon ng mga otoridad, nawalan ng malay si Cesora habang tumatakbo ang sasakyan.

Dito na pumihit sa kabilang linya ang ambulansiya at nabangga ang dalawang nakaparadang motorsiklo.

Sinubukan pang gisingin si Cesora ng katabi nito na si Ariel Verunque pero hindi na ito tumugon.

Nasugatan naman sa pangyayari ang driver ng isa sa mga motorsiklo na si Tyron James Ralar.

Patay ang isang pulis sa Northern Samar Police Provincial Office matapos aksidenteng mabaril ang kaniyang sarili.

Kinilala ng Philippine National Police ang biktima na si Police Corporal Mar Dino Estellero, 35- anyos at residente ng Barangay Balite San Jose, Northern Samar.

Batay sa imbestigasyon, nililinis ni Estellero ang kaniyang baril nang dumulas ang kaniyang kamay at makalabit ang gatilyo.

Dito na pumutok ang baril at tinamaan sa ulo ang biktima.

Agad namang rumesponde sa lugar ang MDRRMO at mabilis ng isinugod sa hospital ang Pulis pero idineklara din itong Dead on Arrival.

Patuloy ang isinasagawang imbestigasyon ng PNP ukol sa nangyaring insidente.