Isa ang nasawi at sugatan ang dalawang iba pa matapos tamaan ng kidlat sa Trece Martirez sa Cavite.
Nakilala ang nasawi na si Eldrin Musa na dead on arrival sa ospital dahil sa matinding tama ng kidlat partikular sa kaniyang dibdib.
Ayon kay Mark Arjay Layno, isa sa mga nasugatan sa likod, biglaan ang pangyayari habang nasa tindahan sila malapit sa paradahan ng tricycle kaya’t halos wala na siyang matandaan.
Ang isa aniyang kasamahan nila ay nakaranas naman ng mild shock.
Hinuli sa ikinasang buy-bust operation ng mga otoridad ang isang anak ng alkalde sa barangay 6, San Carlos City, Negros Occidental.
Ayon sa San Carlos Police na pinamumunuan ni Chief of Police Lt. Col. Jesus Mesahon, target umano ng mga pulis ang isang drug personality na kinilalang si Chito Atienza, 46-anyos na nagbebenta ng ilegal na droga sa kaniyang bahay.
Naaresto din ang isang babaeng senior citizen na kinilalang si Rosalia Nemenzo, 60-years old at isang lalaking kinilalang si Nestor Era Jr., 40-anyos na napag-alamang anak ni Negros Occidental Mayor Marilyn Era matapos maaktuhang bumibili ng iligal na droga.
Nakuha mula sa mga suspek ang mga drug paraphernalia at 13 sachet ng hinihinalang shabu na may kabuuang timbang na 15 gramo at nagkakahalaga ng P102,000.
Nahaharap ngayon sa kasong paglabag sa Republic Act 9165 o Comprehensive Dangerous Drugs Act of 2002 ang mga naarestong suspek.
Nahaharap sa tatlong mabibigat na kaso ang isang dating barangay chairman na inaresto makaraang ikasa ang search and warrant operation ang mga otoridad sa brgy. Wagud, Pinukpuk, Kalinga.
Nabatid na inaresto ang suspek na kinilalang si Reynold Sagmayan Gongob, 47-anyos matapos mag-isyu ng search and warrant operation si Judge Jerson Angog ng Branch 25 Regional Trial Court, Tabuk City Kalinga sa tulong narin ng mga tauhan ng Regional Drug Enforcement Unit, Regional Intelligence Division, at Kalinga Provincial Police Office.
Ayon sa mga otoridad, si Gongob ay kabilang din sa regional top ten on illegal drug personality, na ngayon ay nahaharap sa kasong paglabag sa Republic Act 9165 o Comprehensive Dangerous Act of 2002; paglabag sa RA 10591 o Comprehensive Firearms and Ammunition Regulation Act; at paglabag sa Presidential Decree 705 o Illegal Logging.
Nakuha sa loob ng bahay ng suspek ang dalawang heat sealed plastic sachets na naglalaman ng umano’y shabu na may timbang na aabot 12 gramo at may halagang P81,600; 7 pang small heat-sealed plastic transparent sachets ng shabu na may timbang na 2 gramo at may halagang P13,600.
Bukod pa diyan, nakuha din ng mga operatiba ang isang box na naglalaman ng 20 rounds ng caliber 7.62 ammunition; isang box na naglalaman ng 40 rounds ng caliber 5.56 mm ammunition; anim na piraso ng caliber 7.62mm ammunition; 11 piraso ng caliber 5.56mm ammunition; dalawang piraso ng cal .45mm ammunition; apat na pirasong blasting cap at isang maliit na fuse; isang gun suppressor; tatlong piraso ng short magazine ng caliber 5.56mm; isang magazine para sa caliber .45mm; isang piraso ng mi911 a2 cal.45 pistol case at isang bandolier.
Nakuha naman sa bakuran ng suspek ang 61 piraso ng narra flitches; pitong molave flitches; limang acacia at isang tapol, na may kabuuang board feet flitches na 946.79 na nagkakahalaga ng mahigit P106,408 at dalawang unit chainsaw.
Aabot sa 143 indibidwal ang tinamaan ng diarrhea outbreak sa barangay Napungas, Asuncion sa Davao del Norte.
Ayon kay barangay Napungas Chairman Mariolito Maneja, wala pang naitatalang bilang ng mga nasawi sa naturang sakit pero karamihan sa mga tinamaan ay isinugod sa ospital.
Nito lamang Miyerkules, pitong residente sa nabanggit na bilang ang na-admit sa barangay health center, anim naman ang dinala sa district hospital, limamput siyam ang nananatili sa kani-kanilang mga bahay habang limamput apat naman ang nakarekober na mula sa naturang sakit.
Sinabi ni Maneja na nagsimula ang pagtama ng diarrhea noong Agosto a-10 kung saan, 30% ng naapektuhan ng kaso ay mga bata.
Samantala, batay sa ikinasang confirmatory test ng Provincial Health Office nitong Huwebes, natuklasang mayroong bacteria ang tubig ng bukal na ginagamit ng mga residente.
Sa ngayon, patuloy pang nag-immbestiga ang mga tauhan ng PHO kung may iba pang dahilan ng pagtaas ng kaso ng naturang sakit sa Davao del Norte.
Patay na at nakalagay sa sako ang pitong taong gulang na babae nang matagpuan ito sa Pila, Laguna.
Ayon kay Erna Amadeo, naglalaro lang sa labas ng bahay ang kaniyang anak na si Leah Joy sa Barangay Masico nang bigla na lang itong mawala.
Noong araw ding iyon, may nakitang sako ang kanilang kapit-bahay.
Nang buksan ito ng ama ng biktima na si Edmundo, dito na nila nakita ang hubad nilang anak na may lupa pa sa mata at bibig.
Hinihinalang ginahasa ang paslit at pinagbintangan naman ng pamilya ang 14 anyos nilang kapit-bahay na marami na umanong reklamong natatanggap.
Gayunman, nang puntahan ng mga otoridad, wala na sa bahay ang lalaki.
Naganap ang krimen isang buwan matapos ang kahalintulad na insidente sa San Pedro City.
Arestado ang isang 17-anyos na lalaki matapos ang ginawang pagpatay sa isang school principal sa Roxas City, Capiz.
Inarestado ang binatilyo sa kanilang bahay sa brgy. Balat-an, Mambusao, Capiz.
Ayon sa suspek, nag-iinuman sila sa apartment ng biktimang si Jun Mencedez, 57-anyos sa brgy. Mongpong nang tangkain umano siyang gamtin ng principal dahilan para manlaban ito at nagawang saksakin ang biktima gamit ang gunting.
Batay sa autopsy report, nagtamo ng maraming saksak sa katawan at leeg ang biktima na nagresulta sa kaniyang agarang pagkamatay.
Sugatan din sa pananaksak ang anak ng biktima matapos nitong pigilan ang suspek na mabilis tumakas pero agad ding nahuli ng mga otoridad.
Sa ngayon, hinihintay pa ang magiging desisyon ng Roxas City Social Welfare and Development Office para sa isasampang kaso laban sa suspek.
Nagkasa ng buy-bust operation ang pinagsanib puwersa ng Anti-Drug Operatives ng Philippine Drug Enforcement Agency (PDEA) Cagayan Provincial Office at local police para puksain ang isang drug den sa Bassig st., Ugac Sur Tuguegarao City, Cagayan.
Naaresto sa nasabing lugar ang tatlong suspek na kinilalang sina Sam Escaño, 22 years old; Franklin Escaño, 60 years old; at Harvey Alcantara, 20 years old na naaktuhang nagbebenta ng pinatuyong dahon na hinihinalang marijuana sa isa sa mga operatiba na nagpanggap na bumibili ng ipinagbabawal na gamot.
Nakumpiska sa operasyon ang nakatuping papel na naglalaman ng mga tuyong dahon na hinihinalang marijuana, isang brown envelope na naglalaman ng isang brick ng tuyong dahon ng marijuana, iba’t-ibang uri ng drug paraphernalia, buy-bust money, at cellular phone.
Nahaharap sa kasong paglabag sa Republic Act 9165 o Comprehensive Dangerous Drugs Act of 2002 ang mga inarestong suspek.
Nakapagtala ang PHIVOLCS ng 28 volcanic tremors sa Bulkang Taal sa Batangas sa nakalipas na 24 oras.
Ayon sa PHIVOLCS, tumagal ito ng 4 hanggang 12 minuto, kabilang ang low-level background tremor.
Nagbuga rin ang bulkan ng plumes na umabot sa 2, 800 meters ang na napadpad sa hilaga at hilagang-silangang direksyon.
Nagpakawala rin ito ng 4, 312 tonnes ng sulfur dioxide noong Martes.
Muli namang binalaan ng PHIVOLCS ang publiko hinggil sa posibleng panganib gaya ng steam-driven, phreatic o gas-driven explosions, volcanic earthquakes, minor ashfall, at lethal accumulations o expulsions ng volcanic gas.
Sa ngayon, nananatili sa Alert level 1 o low-level unrest sa Taal Volcano.
Natukoy na ng mga otoridad ang suspek sa pagpatay sa dalagitang si Princess Marie Dumantay sa Bustos, Bulacan noong nakaraang linggo.
Ayon kay PNP spokesperson, Col. Jean Fajardo, nakausap na ng mga otoridad ang mga witness sa kaso na kaibigan nilang si Princess.
Batay sa ipinakitang larawan ng PNP, positibong tinukoy ng mga kaibigan ng 15- anyos na biktima ang suspek dahil ito ang huling kasama ni Dumantay nang mawala ito.
Nakilala umano ng dalagita ang suspek sa social media at sumama na rito kahit hindi pa lubusang kakilala.
Nasangkot na noon ang hindi pa pina-pangalanang suspek sa Rape case at paglabag sa Special Protection of Children Against Abuse, Exploitation, and Discrimination Act.
Sa ngayon, nahaharap na sa kasong Murder ang suspek habang hinihintay pa ang resulta ng autopsy sa biktima.
Limang araw bago ang pagbabalik-eskwela, ilang paaralan ang nalubog sa baha bunsod ng walang tigil na pag-ulan sa mga Lalawigan ng North Cotabato at Maguindanao.
Kinumpirma ni Ditchel Annagoe, Principal ng Malabuwaya Elementary School sa Bayan ng Kabacan, North Cotabato na nasa P500-K halaga ng computers, printers, aklat at printed modules ang hindi na magagamit matapos malubog sa tubig.
Ganito rin ang sinapit ng ilan pang public schools sa mga Barangay Lumayong at Dilangalen na kapwa malapit sa Pulangi River na umapaw dahil sa malakas na pag-ulan.
Mahigit 100 computer sets naman ang nasira sa Datu Udtog Matalam High School sa Bayan ng Pagalungan, Maguindanao.
Tinaya ng Department of Education sa mahigit P1-M na ang halaga ng mga napinsalang kagamitan sa mga nabanggit na paaralan habang ina-assess pa ang lawak ng pinsala ng baha sa iba pang school facilities.
Sa kabila nito, tuloy pa rin ang pagbabalik-klase ng mga mag-aaral sa ilalim ng Cotabato Schools Division simula Agosto a – 22.