RONDA PROBINSYA

Muling nakapagtala ng mga pagyanig sa Bulkang Taal sa nakalipas na 24 oras.

Ayon sa PHIVOLCS, umabot sa 17 volcanic earthquakes ang naitala sa Taal kahapon.

Nagbuga rin ang bulkan ng 3,802 tonnes ng sulfur dioxide simula noong Lunes.

Nagkaroon naman ng upwelling o pag-akyat ng mainit na volcanic fluids sa main crater lake at na-obserbahan umano ang Volcanic Smog o Vog.

Nakitaan pa ang Taal ng “voluminous emission” ng usok na umabot hanggang 1, 500 meters ang taas patungo sa hilagang-silangang direksyon.

Samantala, bahagya ring namaga ang Taal Volcano Island at Western Taal Caldera habang umimpis ang Eastern Taal Caldera.

Muling binalaan ng PHIVOLCS ang publiko hinggil sa posibleng panganib gaya ng steam-driven, phreatic, gas-driven explosions dulot ng taal, na kasalukuyang nasa Alert Level 1.

Nasa 21 kababaihan na biktima ng Sex Trade ang nareskyu ng mga otoridad sa isang prostitution den sa Bayombong, Nueva Vizcaya.

Ayon kay National Bureau of Investigation (NBI) Bayombong District Office head agent Virgilio Reganit, nagtatrabaho ang mga biktima bilang Guest Relations Officer (GRO) sa sunrise videoke bar sa Barangay Sta. Rosa ng nasabing bayan, at binabayaran umano ang mga ito ng mula P1,000 hanggang P3,000 para makipag-talik sa kanilang mga kostumer.

Sa ikinasang Anti-Human Trafficking Operation, inaresto sina Evangeline Torres-Escalante, 43-anyos, at Analyn Estabillo-Torres, 45-anyos, mga manager ng nasabing bar habang patuloy pang pinaghahanap ang may-ari ng bar na kinilalang si Christopher Jun Domingo, 38-anyos.

Nabatid na bago nagkasa ng operasyon ang mga operatiba, isinailalim muna sa surveillance operation ang mga suspek na ngayon ay nahaharap sa kasong paglabag sa Republic Act 92080 o Anti-Trafficking in Persons Act of 2003 sa Provincial Prosecutors Office ng Nueva Vizcaya.

Arestado ang 700 katao matapos ikasa ang one-time bigtime operation ng mga otoridad sa Central Visayas.

Aabot sa tatlong kilo ng shabu na nagkakahalaga ng P25 milyong ang nasamsam ng mga otoridad sa operasyon sa loob ng 24 na oras.

Ayon kay Police Brig. Gen. Roque Eduardo Vega, hepe ng Police Regional Office-Central Visayas (PRO-7), umabot sa 149 operasyon ang inilatag sa rehiyon na nagresulta sa pagkakakumpiska ng 3, 738 grams ng shabu na nagkakahalaga ng P25, 420, 780.

Samantala, nagkasa rin ng operasyon laban sa Illegal gambling, loose firearms at pagtugis sa mga wanted na kriminal ang mga otoridad kung saan kabuuang 709 na personalidad ang naaresto.

Layunin ng hakbang na mabawasan ang kriminalidad sa rehiyon para matiyak ang kaligtasan ng publiko laban sa mga kriminal at iba pang sangkot sa mga ilegal na aktibidad.

Patay matapos pagbabarilin ng hindi kilalang suspek ang isang pulis sa Bayawan, Negros Oriental.

Kinilala ang biktima na si Police CPL. Rey Ambo na nakadestino sa 705th MC Regional Mobile Force Batallion 7.

Ayon sa mga otoridad, pauwi na sana ang biktima sakay ng kaniyang motorsiklo nang tambangan ng salarin.

Dead on Arrival si Ambo at hindi pa matukoy kung ilang tama ng baril ang natamo at kung anong klaseng baril ang ginamit ng suspek.

Patuloy pang iniimbetigahan ng Negros Oriental Provincial Police Office ang naganap na insidente.

Niyanig din ng Magnitude 4 na lindol and Davao Del Sur alas-7:47 kagabi.

Ayon sa PHIVOLCS, namataan ang pagyanig sa layong 3 kilometers hilagang bahagi ng Matanao, Davao Del Sur.

May lalim ang lindol na 36 kilometers at tectonic ang pinagmulan ng pagyanig.

Naitala ang Instrumental Intensity II sa Kidapawan City, Cotabato; Tupi, Koronadal City, South Cotabato habang Intensity I sa Kiamba at Alabel, Sarangani; General Santos City, South Cotabato; Columbio at Sultan Kudarat.

Samantala, nakapagtala din Magnitude 4.5 na lindol ang Ilocos Norte alas-4:19 kahapon ng hapon.

Natunton ang lindol sa layong 10 kilometers munisipalidad ng Carasi ng nabanggit na lalawigan.

Ayon sa PHIVOLCS, may lalim ang lindol na 87 kilometers at tectonic ang pinagmulan nito.

Naitala ang Intensity IV sa Carasi, Bacarra, Badoc, Paoay, Sarat, Dingras, Bangui, Adams, Burgos, Currimao, City of Laoag, City of Batac, Solsona, Pasuquin, Piddig at Vintar, Ilocos Norte; Bangued, at Dolores, Abra; Banayoyo, Bantay, Cabugao, Caoayan, Galimuyod, Lidlidda, Magsingal, San Emilio, San Ildefonso, San Juan, Santo Domingo, Sinait, at City of Vigan, Ilocos Sur; Claveria, at Santa Praxedes, Cagayan.

Intensity III sa Flora, Luna, Pudtol, at Santa Marcela, Apayao; Abulug, at lasam, cagayan habang Intensity II naman sa San Nicolas at Pagudpod, Ilocos Norte.

Nakapagtala din ng Instrumental Intensity IV sa City of Laoag, at Pasuquin, Ilocos Norte habang Intensity III naman sa Sinait, at City of Vigan, Ilocos Sur; at Claveria, Cagayan.

152 pamilya o 772 katao ang nagsilikas at nagpalipas ng gabi sa evacuation center sa Mandaue City, Cebu dahil sa pagbaha bunsod ng malakas na pag-ulan.

Pawang mga Taga-Sitio Laray, Barangay Umapad ang mga naapektuhan ng pagbaha noong Sabado.

Ayon kay Mandaue City Disaster Risk Reduction and Management Office chief Buddy Ybañez, pansamantalang tumuloy ang mga evacuee sa Umapad Elementary School.

Bukod sa malakas na pag-ulan, kabilang din sa mga sanhi ng pagbaha ang pag-apaw ng Butuanon River.

Agad naman anyang nag-uwian ang mga nasabing residente kahapon.

Samantala, pitong pamilya ang nawalan ng bahay matapos ang landslide sa Sitio Tapoko Lessandra Miramonte, Barangay Pit-Os sa Cebu City.

Lumikas ang mga naturang residente pero saglit umuwi ang mga ito sa kanilang mga bahay na nagtamo ng mga bitak-bitak, upang kumuha ng mga kagamitan at nagbalikan sa mga evacuation center.