RONDA PROBINSYA

Niyanig ng Magnitude 5.5 na lindol ang Davao Del Sur alas-4:23 kahapon ng hapon.

Ayon sa PHIVOLCS, natunton ang pagyanig sa layong 12 kilometers kanlurang bahagi ng Munisipalidad ng Magsaysay ng nabanggit na probinsya.

May lalim ang lindol na 24 kilometers at tectonic ang origin o pinagmulan nito.

Naitala ang Intensity V sa Kidapawan City; Davao City; Tupi at Polomolok, South Cotabato; at Malungon, Sarangani.

Intensity IV sa Sta. Cruz, Bansalan, Digos City, at Matanao sa Davao Del Sur; Koronadal City; Tampakan, Norala, at Banga sa South Cotabato; Alabel, Sarangani; Lutayan, Columbio, Pres. Quirino, Senator Ninoy Aquino sa Sultan Kudarat; Tulunan at M’lang, Cotabato.

Intensity III sa Cotabato City; Tantangan, South Cotabato; Surallah, Palimbang, Isulan, Tacurong, at Esperanza sa Sultan Kudarat; Magpet, Arakan, Pigcawayan at Pres. Roxas, Cotabato; Kiamba, at Glan, Sarangani habang Intensity II naman sa Maasim, Sarangani.

Nagkaroon naman ng Instrumental Intensity V sa Kidapawan City, cotabato at Tupi, South Cotabato; Intensity IV sa Davao City, Davao del Sur; Alabel, Sarangani; Koronadal City, General Santos City, South Cotabato; at Columbio, Sultan Kudarat

Intensity III sa Kiamba, Glan, Sarangani; Surallah, T’boli, at Santo Nino, South Cotabato; INTENSITY II sa Nabunturan, Davao De Oro; at Maasim, Sarangani habang Intensity I naman sa Gingoog City, Misamis Oriental.

Samantala, pinag-iingat naman ng pagasa ang publiko dahil mataas ang tiyansa na magkaroon ng pinasala at aftershock matapos ang pagyanig.

Lumampas na sa forecast volume para sa buong buwan ng Agosto ang rainfall volume na naitala sa Lalawigan ng Cebu sa nakalipas na dalawang linggo.

Ayon kay PAGASA-Visayas chief Al Quiblat, umabot na sa 230 millimeters o ikinukunsiderang “above normal” ang rainfall volume sa Cebu.

Nakapagtala anya ng 157.9 millimeters na normal average rainfall ngayong buwan para sa nakalipas na tatlong dekada.

Pero noong Agosto a – 3, nasa 107 millimeters ng ulan ang naitala habang 66 millimeters noong Agosto a – 4.

Nangangahulugan ito na nalampasan na ang monthly average sa loob lang ng dalawang araw na pag-ulan, hindi pa kasama ang mga pag-ulang naranasan noon pang mga nakalipas na araw.

Ipinaliwanag ni Quiblat na ang “abnormal” rainfall ngayong buwan ay dahil sa La Niña phenomenon, na nagdudulot ng malakas na mga pag-ulan sa Pilipinas at mga karatig bansa.

Nanawagan sa mga residente ang Zamboanga LGUs na paigtingin ang kanilang pagbabantay sa kanilang mga alagang baboy dahil laganap parin ang African Swine Fever (ASF) sa kanilang lugar.

Ayon kay Office of the City Veterinarian (OCVET) chief, Dr. Mario Arriola, batay sa monitoring ng Department of Agriculture (DA), infected o nananatili pa ring nasa red zone classification ng naturang sakit ang kanilang lungsod.

Sinabi ni Arriola na nasa 27 barangay ang tinamaan ngayon ng naturang sakit kabilang na dito ang Tumaga, San Roque, Manicahan, Curuan, Vitali, Ayala, at Culianan.

Sa datos ng OCVET, nasa 2,977 na ang naapektuhan ng sakit habang 872 na ang pinatay na baboy sa nakaraang pitong araw.

Dahil dito, pinayuhan ni Arriola ang publiko na kaagad na iulat sa Office of the City Veterinarian sakaling tamaan ng sakit o nangamatay ang kanilang alagang baboy.

Arestado ang siyam na indibidwal makaraang magsagawa ng operasyon ang mga otoridad sa Barangay Guitnang Bayan II, Antipolo Rizal.

Aabot sa mahigit P403, 000 halaga ng shabu ang nasabat ng mga Anti-Narcotics agents mula sa mga drug suspect sa dalawang operasyon na ikinasa nito lamang sabado at linggo.

Kinilala ang mga suspek na sina Reden Delas Armas; Catherine Niegas; Benjie Poliquit; Armin Diaz; at Bernie Doria na nahuling nagbebenta ng shabu.

Nakumpiska sa mga suspek ang 15 plastic sachet ng shabu na may timbang na aabot sa 50 gramo na tinatayang nagkakahalaga ng P340, 000.

Ayon sa mga otoridad, si Delas Armas ay miyembro umano ng isang Criminal Syndicate at kasama rin sa Drug watch list ng PNP bilang isang High-Value Individual (HVI).

Samantala, arestado din sa isang operasyon ang suspek na sina Charlie Estabilla; Romeo Dominador; Richard Saysay; at Rickrod Gegania sa Barangay Sta. Cruz na nakuhanan naman ng 15 gramo ng methamphetamine na tinatayang nagkakahalaga ng P103, 500.

Nakakulong na ngayon ang mga suspek at nahaharap sa paglabag sa Republic Act 9165 o Comprehensive Dangerous Drugs Act of 2002.

Bumuo na ng special investigation task group (SITG) ang Philippine National Police para tumutok sa imbestigasyon sa pagpatay sa tserman ng Barangay Anurturu sa Rizal, Cagayan.

Ayon kay PNP chief Gen. Rodolfo Azurin Jr., binuhay ang SITG matapos ang pamamaril sa biktimang si Roberto de Ocampo.

Sa inisyal na pagsisiyasat, lulan ng motorsiklo si de Ocampo nang pagbabarilin ng mga nakamotorsiklong salarin sa Barangay Gumarueng sa bayan ng Piat.

Sugatan naman sa insidente ang kanyang asawa na si Leonora.

Nabatid na nire-review na rin ng pulisya ang mga kuha ng mga CCTV camera sa lugar kung saan tinambangan si de Ocampo.