RONDA PROBINSYA

Pinili ni Negros Oriental Governor Henry Pryde Tevez na magpaubaya na sa Department of Interior and Local Government upang maiwasan ang pagka-antala ng paghahatid ng serbisyo sa publiko at pagkakaroon ng mga hindi kanais-nais na kaganapan sa kanilang lalawigan.

Ito’y matapos na hindi agad maglabas ang Korte Suprema ng Temporary Restraining Order laban sa desisyon ng Commission on Elections na nagpapawalang bisa sa pagkapanalo ni Teves sa Gubernatorial race noong May 9 elections.

Ayon sa Gobernador, hindi niya nais masakripisyo ang mga empleyado at serbisyo ng pamahalaan sa mga taga-Negros Oriental.

Naniniwala si Teves na kung hindi siya magpaparaya, kahit na siya ang duly elected na gobernador ng lalawigan ay maaaring magdulot ito ng karagdagang tensyon o pagka-paralisa ng government service sa buong lalawigan.

Sa ginanap na deliberasyon sa Supreme Court, hindi sila naglabas ng TRO, sa halip ay pinagkomento ang magkabilang panig sa loob ng maximum na 15 days bago mag-desisyon sa hirit na tro.

Gayunman, inihayag ni Atty. Ferdinand Topacio, abogado ni Teves, ligal na manatili sa pwesto ang kanyang kliyente dahil wala namang denial sa TRO petition.

Naniniwala si Topacio na dapat ay manatili sa posisyon ang kanyang kliyente habang wala pang final ruling ang s.c. sa kaso.

Labis rin ang pagkabigla ni Topacio sa ginawa ni Teves, dahil nagpupulong pa anya sila ng mga abogado nang biglaan itong magdesisyon na magparaya.

Nareskyu ng mga tauhan ng Philippine Coast Guard (PCG) ang mahigit 100 pasahero makaraang sumadsad ang sinasakyan nilang barko sa Benoni Port sa Camiguin na sakop ng Misamis Oriental.

Ayon sa PCG, sakay din ng Super Shuttle Ferry 21 ang 17 kargamento na minamaneho ng kapitan na kinilalang si Ian Sumaylo.

Ayon kay Sumaylo, habang siya ay nagmamaneobra patungong Balingoan Port, napansin ng kaniyang chief mate na nakapatay ang kanilang “steering power” dahilan para ito ay sumadsad.

Agad namang ininspeksyon ng mga otoridad ang naturang barko kung saan, nakumpirma na wala itong anumang sira at wala ring oil spill.

Makakatanggap ng ayuda mula sa lokal na pamahalaan ang mga mangingisdang maaapektuhan ng shellfish ban sa Sorsogon Bay.

Ayon sa lokal na pamahalaan ng lungsod ng Sorsogon, walang dapat ipag-alala ang mga mangingisda dahil noon pa man ay may inihahatid nang tulong ang pamunuan sa mga matinding naapektuhan ng red tide lalo na kung ito ang kanilang kabuhayan.

Sa pahayag naman ng Bureau of Fisheries and Aquatic Resources (BFAR)-Sorsogon, sa ngayon ay ligtas ang kanilang lugar sa red tide matapos mag negatibo sa huling sample na ipinadala sa ahensya at walang naipatupad na Shellfish ban.

Sa kabila nito, nanawagan ang BFAR sa mga residente ng lalawigan na paigtingin ang pag-iingat sa pagkain ng mga shellfish at linisin o hugasan ng maigi upang mas lalong maging ligtas sa kalusugan ng bawat isa.