Bangkay na lamang nang matagpuan ang isang Grade 7 student na 4 na araw nang nawawala sa Samar.
Ayon sa mga otoridad, sa isang damuhan natagpuan ang katawan ni Gelieca Lacaba, edad 12- anyos.
Huling nakita si Lacaba noong miyerkules habang papasok sa eskwelahan
Sa ngayon, iniimbestigahan na ng mga otoridad kung sino ang suspek at ano ang motibo nito sa pagpatay sa dalagita.
- sa panunulat ni Hannah Oledan
Inilunsad ng Department of Information and Communications Technology (DICT) ang tatlong broadband ng masa sites sa tatlong malalayong lugar sa Zamboanga City.
Unang nagtungo ang DICT sa Sacol upang alamin ang posibilidad ng paglalagay ng stable internet service sa Isla.
Matapos ang isinagawang assessment ng ahensya, nabatid na maaari pang palawigin ang connectivity sa Tigtabon at Pangapuyan.
Maaaring ma-access sa piling lugar ang Broadband ng Masa sites kung saan, sa Sacol Island ay accessible ang libreng internet service sa Madrasah, Landang Laum Elementary School, Landang Laum Barangay Hall, at Landang Gua Elementary School.
Sa Pangapuyan Island ay maaari itong ma-access sa Pangapuyan Elementary School at Pangapuyan Barangay Hall, habang accessible naman ang broadband ng masa site sa Tigtabon sa Tigtabon Barangay Hall.
Nasawi ang dalawang batang lalaki matapos makulong sa nasunog nilang bahay sa Plaridel, Bulacan.
Kinilala ang nasawing magkapatid na sina Lorenzo at Reynan Dela Cruz.
Base sa imbestigasyon, dakong alas-6:30 ng gabi nang magsimulang maganap ang sunog.
Napag-alamanan na umalis ng kanilang bahay ang ina ng dalawang bata para umani ng gulay dakong alas-4:20 ng hapon.
Natupok naman ang bahay ng mga ito bago umuwi ang ina ng mga bata.
Ayon sa awtoridad, hindi kaagad nai-report ang insidente dahil walang kapitbahay ang mga ito.
Samantala, patuloy namang iniimbestigahan ng awtoridad ang naturang insidente.—mula sa panulat ni Hannah Oledan
Nasawi ang isang dating bise alkalde ng bayan ng Calbiga, Samar makaraang barilin ng isang awol o absent without official leave na sundalo sa national highway na sakop ng Brgy. Timbangan.
Kinilala ang biktima na si Miguel Abaigar, 54 taong gulang, residente ng Canticum sa nasabing bayan.
Sa inisyal na imbestigasyon, namimisikleta si Abaigar nang barilin sa likod ng gunman gamit ang isang kalibre .45 bago mabilis na tumakas sakay ng isang motorsiklo.
Agad namang nasakote ang suspek sa pagpatay na si Allan Malagueno ng Brgy. Bato, Paranas, Samar.
Sa ngayon, inaalam pa ng mga awtoridad ang motibo sa krimen.
Tumaas ng 203% ang mga kaso ng dengue sa Negros Oriental nitong nakalipas na siyam na buwan kumpara sa kaparehong panahon noong 2021.
Ayon kay Assistant Provincial Health Officer Dr. Liland Estacion, batay sa report ng Provincial Epidemiology Surveillance Unit (PESU) ay pumalo sa 1,747 dengue cases ang naitala mula Jan. 1 hanggang Oct. 1 ngayong taon kung saan walo rito ang nasawi.
Sa kaparehong panahon noong nakaraang taon, nasa 576 cases lamang ang naitala ng PESU.
Nabatid na karamihan sa mga tinamaan ng dengue sa probinsya ay mga lalaki o katumbas ng 918 individuals habang 829 naman ang mga babae.
Namigay ng P7.6 milyong halaga ng disaster relief supplies ang Estados Unidos sa Cagayan bilang donasyon.
Ayon sa US Embassy, kabilang sa mga pinamahagi ang mga tent, medical supplies, dive equipment at dalawang rubber boats na may outboard motors.
Mismong si US Embassy Civil Affairs Team leader Captain Stephen Coleman ang nag-turnover ng donasyon sa Tuguegarao Provincial Disaster Risk Reduction and Management Office o PDRRMO, Philippine Coast Guard o PCG, at mga ospital.
Ayon kay Atty. Mabel Villarica-Mamba, kinatawan ni Cagayan Governor Manuel Mamba, kasama sa mga makikinabang sa donasyon ang dalawampu’t walong bayan at isang lungsod sa lalawigan.
Inihayag ng Commission on Elections o Comelec na umarangkada na ang plebisito sa Ormoc City ngayong araw, Oktubre 8, na layong pagsamahin ang 29 barangays sa lungsod at saka hahatiin ito sa tatlong barangay na lamang.
Ayon kay Comelec spokesperson John Rex Laudiangco, mahigit 10,000 registered voters ang inaasahang makikiisa sa aktibidad.
Ang botohan ay nagsimula na kaninang alas-7:00 ng umaga at matatapos mamayang alas-3:00 ng hapon.
Pinaghahanda na ni Pangulong Bongbong Marcos Jr., ang mga ahensya sa pagtaas ng alert status ng Mayon.
Ito ang inihayag ni PBBM matapos itaas sa Alert level 2 ang Bulkang Mayon.
Ani ng Pangulo, patuloy na nakikipag-ugnayan sa mga ahensya tulad ng Philippine Institute of Volcanology and Seismology (PHIVOLCS), National Disaster Risk Reduction and Management Council (NDRRMC), Local Government Unit (LGU) at iba pang ahensya para masiguro na ang lahat ay handa sa posibleng pagbago ng sitwasyon.
Itinaas ng PHIVOLCS ang Bulkang Mayon sa lalawigan ng Albay sa ilalim ng Alert level 2 dahil sa mababaw na propeso ng magmatic na posibleng mauwi sa phreatic eruptions o magmatic eruption.
Pinapayuhan ang publiko na huwag na munang pumasok sa Permanent Danger Zone (PDZ) upang maiwasan ang panganib mula sa biglaang pagsabog, pagbagsak ng bato at pagguho ng lupa. —sa panulat ni Jenn Patrolla
Nasabat ang P1-M halaga ng hinihinalang shabu ng mga elemento ng Philippine National Police (PNP) sa magkahiwalay na operasyon sa Cebu.
Batay sa ulat na nakarating sa Camp Crame, ikinasa ang unang operasyon sa Banilad, Cebu City ng City Intelligence Unit at Drug Enforcement Unit kung saan aabot sa P442-K na halaga ng ipinagbabawal na droga ang nakumpiska.
Samantala, sa isa pang operasyon sa Paknaan, Mandaue City, nahulihan ng P714-K na halaga ng pinaniniwalaang shabu ang isang High-Value drug suspect.
Mahaharap naman ang mga suspek sa kasong paglabag sa Comprehensive Dangerous Drugs Act of 2002. —ulat mula kay Gilbert Perdez (Patrol 13)
Tatlo ang patay kabilang ang dating Provincial Board Member ng Aurora at dating Vice Mayor ng Dipaculao makaraang tambangan sa Baler-Casiguran Road, sa nasabing bayan.
Kinilala ang mga biktimang sina Narciso Amansec, 60-anyos, dating Alkalde ng nasabing bayan, asawang si Merlinda, 61- anyos at driver nilang si Leonard Talosa, 42-anyos.
Lulan ang mga biktima ng maroon Isuzu D-Max na may plakang CAU-1358 nang paulanan ng bala ng mga hindi nakilalang salarain sa Purok 1, Barangay Dibutunan, dakong ala-5 ng hapon noong Lunes.
Ayon kay Dipaculao Municipal Police Office chief, Maj. Eduardo Mendoza Jr., patungo sanang Barangay Diarabasin ang mga biktima nang maganap ang krimen.
Nagsasagawa na anya sila ng imbestigasyon upang matukoy ang motibo sa pamamaslang at sino ang posibleng nasa likod nito.
Matapos ang tangkang pagreretiro sa pulitika dahil sa tatlong beses na pagkatalo, muling sumabak si Amansec sa pagka-bise gobernador pero natalo muli kay dating governor Gerardo Noveras noong May 9 elections.