Aabot sa P122.4 million na halaga ng hinihinalang shabu ang nasabat ng mga otoridad sa ikinasang buy-bust operation sa Barangay Busay, Cebu City.
Ayon sa Pulisya, nakatakas ang suspek nang matunugan nito na undercover police ang ka-transaksyon.
Nairekober ng mga otoridad ang nasa 18 kilo ng shabu at Toyota Innova naturang lugar.
Nagsasagawa na ng imbestigasyon ang Cebu City Police at inaalam na kung konektado sa malaking sindakto ng iligal na droga ang suspek. —sa panulat ni Jenn Patrolla
Inihatid na sa kani-kanilang huling hantungan ang dalawa sa limang rescuer na nasawi sa kasagsagan ng pananalasa ng Bagyong Karding sa Bulacan.
Umalingawngaw ang sirena ng mga bumbero at emergency vehicles nang ihimlay si Jerson Resurreccion sa Catmon Cemetery sa bayan ng Sta. Maria, kahapon.
Ang 33-anyos na si Jerson ang Team Leader ng mga rescuer nang maganap ang trahedya sa kasagsagan ng kanilang misyon sa Bayan ng San Miguel.
Inilibing na rin ang rescuer na si Marby Bartolome sa Musuleyo ng kanilang pamilya sa Malolos City.
Noon namang Sabado ay inihimlay na rin ang tatlo pang rescuer na sina George Agustin, Troy Agustin at Narciso Calayag Jr., sa kani-kanilang hometown.
Pawang binigyang-pugay ng Bulacan Provincial Government at National Disaster Risk Reduction Management Council ang limang biktima.
Tiklo ng isang drug suspect matapos mahulihan ng 2.7 million pesos na halaga ng shabu sa isang buy-bust operation sa Dasmarinas, Cavite.
Kinilala ang suspek na si Lewis Longcanaya na ikinokonsidera rin bilang isang high-value target.
Ayon sa Police Regional Office 4-A, nahuli si Longcanaya sa barangay H2 dakong mag-a-alas-6 ng gabi kahapon.
Nasabat naman mula rito ang 400 gramo ng shabu.
Samantala, arestado rin ang dalawang suspek sa isa pang isinagawang sting operation sa Taytay, Rizal.
Nahuli sina Benedict Victoria at Mavie Maaba bandang alas-7 ng gabi sa barangay Dolores.
Nakuha naman mula sa mga suspek ang 136,000 pisong halaga ng shabu.
Kasalukuyang nakakulong ang apat na suspek na nahaharap sa kasong paglabag sa Comprehensive Dangerous Drugs Act of 2002.—sa panulat ni Hannah Oledan
Inihatid na kahapon sa kanilang huling hantungan ang dalawa sa limang Bulacan Rescuers, na nasawi habang rumeresponde sa kasagsagan ng paghagupit ni Bagyong Karding.
Inilibing si Troy Justin Agustin, sa Plaridel, Bulacan, habang sa Calumpit naman si George Agustin.
Ngayong araw naman ng Linggo nakatakdang ilibing sina Marby Bartolome, Jerson Resurrecion, at Narciso Calayag Jr.
Ginanap naman sa Provincial Capitol Gymnasium ang pagbibigay ng huling pagkilala at pagpupugay sa mga pumanaw na rescuers.
Una nang sinabi ni Bulacan Gov. Daniel Fernando, na gumamit ng bangka ang mga rescuers sa pagresponde matapos na masira ang kanilang sinasakyang trak at habang patungo sa Bayan ng San Miguel, nabagsakan sila ng isang pader na nabuwal dahil sa flashflood.
Nagpahayag naman ng labis na kalungkutan si Pang. Ferdinand “Bongbong” Marcos Jr., sa pagkasawi ng limang Bulacan PDRRMO Rescuers.
Ayon kay Pang. Marcos, mananatili sa puso’t isipan ng bawat isa ang katapangan at kagitingan na kanilang ipinakita.
Nakumpiska ng Philippine Drug Enforcement Agency (PDEA) ang 25 bariles ng kemikal na ginagamit sa paggawa ng shabu mula sa isang barko na dumating mula sa Cebu galing sa Liberia.
Ayon sa Kapitan, inutusan lang sila ng may-ari na dalhin ang mga kemikal na kailangan sa paglilinis ng barko mula sa Japan.
Hindi rin makapagbigay ng dokumento ang mga naarestong indibidwal sa Bureau of Customs (BoC).
Pahayag naman ng PDEA, labag sa batas ang pagpapadala ng hydrochloric acid ng walang dokumento.
Gayunman, nakatakda namang sampahan ng kaukulang kaso ng (BOC) at PDEA ang pamunuan ng barko. —sa panulat ni Jenn Patrolla
Arestado na ang apat na suspek na pumatay sa isang LGBTQ o Lesbian, Gay, Transgender, at Queer na Guro sa Abra.
Ito ay matapos magsagawa ng hot pursuit operation ang mga otoridad hinggil sa naganap na krimen noong Setyembre a-28.
Kinilala ang mga suspek na sina Sonny Boy Gandeza Tullas, construction worker; Abelardo Talape, Traffic enforcer; Aldrin Alagao, alias “Bull,” at Rommel Paa, alias “Ambong.”
Natukoy naman ang motorsiklong gamit ni Tulas at Talape nang isinagawa nito ang krimen sa pamamagitan ng CCTV.
Nadakip si Talape sa isinagawang checkpoint habang kusang-loob na sumuko si Alagao sa mga tauhan ng Bangued MPS.
Si Paa naman ay nahuli ng mga Provincial Intelligence Unit ng Abra Provincial Police Office sa Barangay Cabaroan, Tayum, Abra.
Batay sa testimonya ng mga suspek, alitan sa lupa at personal na lumang samang loob ang itinuturong dahilan ng pagpatay sa biktima.
Sinampahan naman ng kasong murder ang mga suspek sa Office of the Provincial Prosecutor, Bangued, Abra. —sa panulat ni Hannah Oledan
Suspendido pansamantala ang mga aktibidad ng pagmimina at pagku-quarry sa Bulacan kasunod ng pagkamatay ng limang rescuer at isang sibilyan noong kasagsagan ng bagyong Karding.
Ito ang tiniyak ni Bulacan Governor Daniel Fernando.
Aniya, maglalabas ito ng Executive order upang masuspindi ang naturang aktibidad sa lalawigan.
Sinabi rin ng Gobernador na hindi nito mapapayagan ang pagmimina dahil maaaring pumasok ng todo ang bagyo kung masira ang Sierra Madre.
Kaugnay nito, umabot sa P3-B ang halaga ng pinsala sa sektor ng agrikultura sa lalawigan.
Samantala, kabilang sa mga tinamaan ng matinding bagyo ang San Miguel, San Rafael, San Ildefonso at Doña Remedios Trinidad. —sa panulat ni Hannah Oledan
Pinatawan ng hanggang 23 taong pagkakabilanggo ang isang babaeng sex trafficker sa Iligan City.
Ito’y matapos maghain ng guilty plea o umamin sa pagkakasala ang hindi pinangalanang akusado sa kasong may kaugnayan sa Online Sexual Abuse or Exploitation of Children (OSAEC).
Ayon sa dokumento mula sa korte na inilabas ng International Justice Mission (IJM), inamin ng babae na may kinalaman siya sa pang-aabuso sa limang babae kung saan pinag-perform ang mga ito ng sexual acts sa pamamagitan ng online platforms.
Maliban dito, napatunayan din ng korte na guilty ang nasabing akusado sa mga kasong paglabag sa Anti-Child Pornography Act at Cybercrime Prevention Act.
Mahigit P3-bilyong na ang halaga ng pinsala ng bagyong Karding sa sektor ng agrikultura sa Nueva Ecija.
Sa pagtaya ng Provincial Disaster Risk Reduction and Management Council (PDRRMC), pinakamatinding naapektuhan ang ekta-ektaryang palayan sa lalawigan.
Damay din ang mga maisan, high-value crops, kabilang ang mga gulayan.
Samantala, bagaman unti-unti namang bumabalik ang mga negosyo limang araw matapos manalasa ang bagyo, wala pa ring kuryente sa districts 3 at 4.
Alinsunod sa rekomendasyon ng PDRRMC kay Governor Aurelio “Oyie” Umali, wala pa ring klase ngayong araw sa lahat ng antas sa mga nasabing distrito dahil hindi pa naibabalik ang power supply.
Ang District 3 ay binubuo ng Cabanatuan City, mga bayan ng Bongabon, Gabaldon, General Mamerto Natividad, Laur, Palayan at Santa Rosa.
Binubuo naman ang district 4 ng Gapan City, mga bayan ng Cabiao, General Tinio, Jaen, Peñaranda, San Antonio, San Isidro at San Leonardo.
Pumalo sa P1.5 million ang halaga ng ari-ariang naabo matapos sumiklab ang sunog sa Nueva Vizcaya partikular na sa national highway, brgy. Quirino sa Solano.
Ito’y matapos lamunin ng apoy ang tatlong stalls na kinabibilangan ng isang food store, shoe repair shop at fruit stand.
Ayon sa mga otoridad, posibleng ang pinagmulan ng sunog ay ang sinindihang apoy ng lalaking may diperensiya umano sa pag-iisip na naninirahan sa isang bakanteng kwarto malapit sa tatlong stalls na nasunog.
Ayon sa nakakita, mabilis na tumakbo ang naturang lalaki papalayo sa silid na tinutuluyan nito na siyang pinagmulan ng apoy.
Kasama sa mga nasunog ang mga appliances, refrigerators, mga paninda at ilang computer sets matapos tumagal ng dalawang oras ang sunog bago naapula ng mga bumbero.
Sa ngayon, inaalam pa ng mga otoridad ang pagkakakilanlan sa suspek at kung ano ang motibo nito sa pagsunog.