Natagpuan ang katawan ng isang lalaki na nawala sa kasagsagan ng pananalasa ng bagyong Karding.
Ayon sa Bureau of Fire Protection (BFP), nasa 62 taong gulang na lalaki at residente ng Cambio, San Miguel, Bulacan at positibong kinilala ng pamilya ang natagpuang katawan.
Unang naiulat ang lalaki nitong mga nakaraang araw kasabay ng paghagupit ni bagyong Karding.
Matatandaan na isa ang bayan ng San Miguel sa Bulacan ang malakas na tinamaan ng bagyo at nag-iwan baha sa ilang mga lugar.
Binigyang-pugay din ni Pangulong Bongbong Marcos ang limang rescuer sa San Miguel, Bulacan na nasawi sa gitna ng kanilang misyon sa kasagsagan ng pananalasa ng Typhoon Karding.
Sa kanyang Twitter post, nagpahayag ng labis na kalungkutan si Pangulong Marcos sa sinapit nina George Agustin, Troy Justin Agustin, Marby Bartolome, Narciso Calayag Junior at Jerson Resurreccion.
Mananatili anya sa alaala ng lahat ang ipinakitang katapangan at katatagan ng limang rescuer.
Nag-alay din ng panalangin si PBBM para sa lima at nagpaabot ng pakikidalamhati sa kanilang pamilya.
Nasa gitna ng operasyon ang limang rescuer noong linggo ng hatinggabi sa San Miguel nang tangayin ng rumaragasang baha dulot ng malakas na ulang dala ng bagyo.
Pumalo na sa P4.5 million ang halaga ng pinsalang idinulot ng pananalasa ng bagyong Karding sa sektor ng agrikultura at imprastraktura.
Sa datos ng National Disaster Risk Reduction and Management Council (NDRRMC), P3 million ang inisyal na pinsala na iniwan ng Typhoon Karding sa imprastraktura habang P1.5 million naman sa sektor ng agrikultura.
Kabilang sa napinsala sa sektor ng imprastraktura ang mga tulay, kalsada at mga gusali na nasira dahil sa malakas na hangin at pagguho ng lupa.
Nasira din ang mga pananim ng mga magsasaka sa ilang lugar sa Luzon partikular na sa Nueva Ecija kung saan, pinaka naapektuhan ang palay, mais, at iba pang mga gulay.
Ayon sa NDRRMC, posible pang madagdagan ang halaga ng pinsala sakaling makuha na nila ang opisyal na report mula sa iba’t-ibang rehiyon na matinding hinagupit ng bagyong Karding.
Patay ang isang lalaki sa Tanay, Rizal habang pinaghahanap naman ang dalawang iba pa matapos matangay ng ilog sa gitna ng pananalasa ng bagyong Karding.
Kinilala ni Tanay Police Chief, Lieutenant Colonel Rodolfo Santiago II ang nasawi na si Arthur Panes, 75 anyos habang nawawala sina Aimy Panes at Carlo Laurel at nailigtas si Aika Laurel, pawang residente ng Barangay San Isidro.
Tumatawid ang lima sa Lanatin River dakong alas-nuwebe ng gabi noong linggo nang tangayin ang mga ito ng malakas na daloy ng tubig.
Lunes na nang makita ng mga rescuers ang bangkay ni Arthur habang ang sanggol naman na si Aika ay nakitang buhay at nakasabit sa mga kawayan sa gilid ng ilog.
Sa ngayon, tuloy ang pagsasagawa ng search-and-rescue operations ng mga otoridad upang mahanap ang mag-amang sina Carlo at Aimy.
Anim na dike sa bayan ng Candaba, Pampanga ang nasira makaraang rumagasa ang tubig mula sa Pampanga River nang manalasa ang bagyong Karding sa Central Luzon.
Dahil dito, nalubog sa baha ang ekta-ektaryang mga palayan kaya’t naunsyami ang pag-a-ani ng ilang magsasaka.
Ayon sa Candaba Municipal Disaster Risk Reduction Management Office, wasak ang mga dike sa barangay Mapaniqui, Barangca, Visal Sto. Nino, Visal Sto. Cristo, Pulonggubat at San Pablo.
Mula sa 33 barangay, mahigit kalahati o 16 sa mga ito ang lubog sa tubig.
Samantala, nanlumo rin ang ilang magsasaka sa Tarlac City dahil pinadapa ng bagyo ang mga palay na aanihin na sana.
Inihayag ni barangay San Manuel Chairman Crisanto Deang na 90% ng mga aanihin sanang palayan ang pinadapa ng malakas na hangin.
Gayunman, sa pagtaya ng provincial government, nasa 30% pa lamang ng mga palayan sa lalawigan ang nakapag-ani na.
Nalubog din sa baha ang ilang bahagi ng lalawigan ng Bulacan dahil sa malakas na ulang dala ng bagyong Karding.
Ayon kay Bulacan Governor Daniel Fernardo, kabilang sa pinaka-matinding nalubog ang Bayan ng San Miguel.
Bagaman, nagpadala na sila ng rescue team sa naturang lugar, aminado si Fernando na kasalukuyan nilang hindi ma-contact ang mga miyembro ng team.
Samantala, inaalam na rin nila ang sitwasyon sa bayan ng Doña Remedios Trinidad na binayo naman ng malakas na hangin.
Sumampa na sa mga bahay ang tubig-dagat sa gitna ng hagupit ng bagyong Karding sa Polillo Island, Quezon.
Kinumpirma ni Geneva Mopera, Public Information Officer ng Polillo Local Government, dakong ala-5 kahapon nagsimulang pasukin ng tubig ang Barangay Poblacion.
Ito, ayon kay Mopera, ay dahil sa sobrang laki ng mga alon na sinabayan pa ng high tide.
Labing-pitong coastal barangay na ang apektado ng storm surge o daluyong at mga pagbaha sa nasabing bayan.
Kabilang ang polillo sa mga lugar na isinailalim sa Public Storm Signal no. 5.
Patuloy na binabantayan ng National Irrigation Administration (NIA) ang Pantabangan Dam, sa Nueva Ecija at Magat Dam, sa Isabela dahil sa epektong dulot ng bagyong Karding.
Mismong si NIA administrator Benny Antiporda ang nanguna sa pagmonitor sa mga naturang dam sa NIA Central Office Command Center.
Bahagi ito ng Crisis management plan and quick action response ng ahensya lalo na sa panahon ng kalamidad.
Ito’y upang maiwasan ang maaaring pinsalang idulot ng bagyo sa mga naturang dam.
Nagsimula nang magsilikas ang mga residente sa limang coastal town sa Zambales bunsod ng bagyong Karding.
Ayon sa Zambales Provincial Government, nagsasagawa na sila ng pre-emptive evacuation sa mga bayan ng Sta. Cruz, candelaria, San Antonio, San Felipe at ilang bahagi ng Subic upang matiyak ang kaligtasan ng mga residente.
Sinuspinde na rin ang ilang klase sa lahat ng lebel maging ang mga pasok sa lahat ng mga Government offices maliban sa skeletal force na nakatutok sa mga kalamidad.
Bukod pa dito, hinati narin ang buong probinsiya sa tatlong command center habang nakahanda na rin ang mga relief packs para sa mabilis na pagtugon sa mga lugar na maaapektuhan ng bagyong Karding.
Samantala, nagdeploy narin ang lokal na pamahalaan ng mga equipments, mga sasakyan, rescue groups sakaling magkaroon ng emergency bunsod ng bagyong Karding.
Niyanig ng Magnitude 5 na lindol ang Davao Occidental alas-7:16 kagabi.
Ayon sa PHIVOLCS, namataan ang pagyanig sa layong 132 kilometers silangan ng Sarangani, Davao Occidental.
May lalim na 137 kilometers ang lindol at tectonic ang origin o pinagmulan nito.
Naitala ang Intensity II sa General Santos City at Instrumental Intensity II sa Davao City, Davao del Sur; Kiamba, Malungon, at Sarangani habang Intensity I naman sa maasim, at Alabel, Sarangani; General Santos City, T’boli, Koronadal City, at South Cotabato.
Wala namang inaasahang damage sa lugar pero asahan ang aftershocks matapos ang pagyanig.