RONDA PROBINSYA

Kumalas mula sa CPP-New People’s Army ang nasa 204 miyembro ng cause oriented groups sa Central Luzon nitong Biyernes.

Batay sa ulat ng Police Regional Office-3, ang mga militanteng grupo na kumalas ng suporta sa CPP-NPA ay mula sa Alyansang Manggagawang Bukid ng Gitnang Luzon (AMGL) Nueva Ecija chapter; Nelson Mesian Command sa ilalim ng Kilusang Larangang Guerilla-Tarlac-Zambales; Milisyang Bayan; Kalipunan ng Damayang Mahihirap (KADAMAY) at United Luisita Workers Union.

Nagsi-suko naman ang mga ito sa PRO-3 at nakiisa sa seremonya na isinagawa sa Makatao Center sa camp Olivas, Pampanga.

Namahagi naman ang lokal na pamahalaan ng Pampanga ng mga grocery items para sa mga nagsi-sukong komunistang grupo.

Samantala, hindi pa nababatid ang dahilan ng pag-kalas ng mga naturang grupo.—mula sa panulat ni Hannah Oledan

Wala nang buhay at palutang lutang sa ilog nang matagpuan ang isang lalaking may sakit na epilepsy sa bayan ng Tanza, Cavite.

Ayon sa pulisya, kinilala ang biktima na si Jimmy Villa, residente ng barangay Bunga.

Sa imbestigasyon na pinangungunahan ni Police Sergeant Jonathan Lagario, dakong alas-11:20 ng gabi nang makita ang labi ng biktima sa bunga river.

Batay sa pamilya ng biktima, nagpaalam si Villa na mamimingwit ng isda sa ilog ngunit sumapit na ang gabi at hindi pa rin ito nakakauwi.

Maaari umanong inatake ito ng sakit na naging sanhi upang ito ay mahulog sa ilog at malunod.—mula sa panulat ni Hannah Oledan

Matagumpay na naresolba ng Batangas Police ang twin robbery sa Radio Nation 105.5 FM station at isang Law office sa Padre Garcia sa Lipa City, Batangas ngayong linggo matapos matunton ang pinagtataguan ng mga suspek.

Ayon kay Lt. Col. Ariel Azurin, commander ng Lipa City police, lutas na ang nangyaring nakawan sa Maraña Law office sa Brgy. Marauoy, Lipa City, Batangas noong nakalipas na Oktubre 12. Kabilang sa mga kinuhang gamit sa law office ang isang Macbook kung saan ginamit ang APP para malaman ang kinaroroonan ng ninakaw na laptop sa barangay Quisao, Pililia, Rizal.

Natagpuan ang laptop sa mag-live-in partner na sina Erica May Antibo at Joel Pilapil nang inspeksyunin ay magkapareho ang serial number ng Macbook Pro-16 sa ninakaw sa Maraña Law office. Narekober din sa bahay ng mga suspek ang iba’t ibang kagamitan.

Kaagad namang ipinarating sa Padre Garcia Municipal Police Station (MPS) at nag-dispatch ng team at napag-alamang ito ang mga ninakaw na gamit sa radio natin FB station noong Oktubre 10.

Dati nang nasakote si Pilapil alyas “John Joel Sales Pilapil” noong Nobyembre 27, 2015 sa Brgy. Marfrancisco, Pinalamayan, Oriental Mindoro sa kasong pagnanakaw ng mga kagamitan at pera, ngunit nakapagpiyansa.—mula sa panulat ni Maize Aliño-Dayundayon

Nasakote ng awtoridad ang tatlong lalaki na wanted sa kasong rape sa magkakahiwalay na operasyon sa rehiyon ng Mimaropa.
Kinilala ni Police Regional Office 4B chief Brig. Gen. Sidney Hernia ang mga nadakip na sina Epelimenico Flores Diaz, Rodel Dion Alcain at Allan Mangao Gacute.
Si Diaz ay matagal nang tinutugis ng batas dahil sa tatlong counts ng kasong rape sa Brooke’s Point Palawan Regional Trial Court Branch 165.
Apat na counts naman ng kasong rape din ang kinakaharap ni Alcain sa Marikina City RTC Branch 192.
Samantala, kasong panghahalay din ang nakahain laban kay Gacute sa Culasi, Antique RTC Branch 13.
Batay sa datos ng Regional Investigation and Management Division ng Mimaropa Police, aabot na sa 431 wanted persons ang nahuli nito mula noong Enero ngayong taon.

Aabot sa 16 katao ang nailigtas ng awtoridad matapos lumubog ang sinasakyan nilang motorized banca sa katubigang sakop ng Rapu-Rapu Island sa Albay.

Ayon sa Rapu-Rapu Police, isa pang bangka ang nakakita sa lumubog na motorized banca na nagkataong dumaan lang sa lugar.

Sinabi naman ni Captain Philip Nathaniel San Buenaventura, officer-in-charge ng Rapu-Papu Police na nakaranas ng engine failure ang makina ng bangka matapos ang malalaking alon.

Sa ngayon, dinala na sa pantalan ng barangay Bagaobawan ang mga nasagip na pasahero para sa agarang medical assistance.

Tiklo ang isang high school teacher sa San Jose Del Monte City, Bulacan matapos akusahan ng 17 anyos niyang estudyante ng pangmomolestya at pagbabanta.

Kinilala ang suspek na si Mark Matthew Calimlim, 29 anyos, residente ng Sapang-Palay.

Ayon kay San Jose Del Monte Chief-Of-Police, Lt. Col. Ronaldo Lumactod, nag-alok ng indecent proposal ang suspek at nagbantang ibabagsak kapag hindi pinagbigyan.

Ginahasa pa umano ni Calimlim ang biktima sa isang bakanteng lote at kinunan ang kanilang pagtatalik habang nasundan pa ito sa isang hotel.

Nagbanta pa ang suspek na ikakalat sa social media ang sex  video kung hindi magpapadala ng nude picture ang  estudyante.

Nahaharap na sa kasong Acts of Lasciviousness ang guro.  – sa panulat ni Hannah Oledan