RONDA PROBINSYA

Kinumpirma ng Bureau of Fisheries and Aquatic Resources (BFAR), na nagpositibo sa redtide ang siyam na lugar sa Visayas at Mindanao.

Ayon sa BFAR, kabilang sa nakitaan ng Paralytic Shellfish Poison (PSP) o toxic red tide ang coastal waters ng Milagros sa Masbate; Sapian Bay, President Roxas, Panay, at Pilar sa Capiz; Dauis at Tagbilaran City sa Bohol; Dumanquillas Bay sa Zamboanga Del Sur at Lianga Bay sa Surigao Del Sur.

Sinabi ng ahensya na ligtas pa ring kainin ang mga lamang-dagat na nahahango sa mga nasabing lugar, maliban lamang sa mga shellfish.

Nagpaalala ang BFAR, na doblehin ang pag-iingat sa pagkain ng mga lamang dagat at linising maigi bago lutuin at kainin.

Isang eroplano ang sumadsad sa madamong bahagi ng Mactan Cebu International Airport.

Kinumpirma ni Eric Apolonio, spokesman ng Civil Aviation Authority of the Philippines na pasado alas-11 kagabi nang mag-overshoot ang Airbuss 333 Aircraft ng Korean Airlines Flight KE631.

Ayon kay Apolonio, pansamantalang sinuspinde ang lahat ng flights matapos isara ang runway sa naturang paliparan.

Agad naman anyang nagpadala ng Cebu Fire and Rescue Teams at Medical personnel sa crash site.

Inaalam na rin ng Aircraft and Accident Investigation Board ng CAAP ang sanhi ng pagsadsad ng eroplano. —ulat mula kay Raoul Esperas (Patrol 45)

Patay ang pitong miyembro ng Philippine Army habang sugatan naman ang pito pa nilang kasamahan makaraang  sumalpok ang sinasakyan nilang army vehicle sa isang cement truck mixer sa kahabaan ng National Highway ng Purok-2, sa Brgy. Buenasuerte, Uson, Masbate.

Dead-on-arrival ang mga biktimang kinilalang sina Private First Class (PFC) John Mark Aragon; PFC Elizer Lahoy-Lahoy; PFC Venzelle Gumba; PFC Ardie Rabi; PFC Rodgen Palapar; PFC Cristian Badong; at ang driver ng sasak­yan na si SGT. Bernardino Kyamko Jr. na namatay habang nilalapatan nang paunang lunas sa hospital.

Batay sa imbestigayson ng mga otoridad, mabilis na binabagtas ng Army KM Service Vehicle SAB-2067 ang kahabaan ng highway patungong Brgy. Paguihaman sa Bayan ng Uson sakay ang labing apat na sundalo para maghatid ng supplies sa kanilang detachment sa naturang lugar.

Dito na nagsimulang pumutok ang kaliwang hulihang gulong ng army vehicle dahilan para mawalan ng kontrol at sumalpok sa isang nakaparada na cement mixer truck.

Sa ngayon, patuloy pang nagpapagaling ang pito pang sugatang sundalo habang patuloy ding isinasagawa ang imbestigasyon ng mga otoridad hinggil sa insidente.

Aabot sa P30-M halaga ng giant clams o taklobo ang nasamsam ng mga otoridad sa isang magsasaka sa Borbon, Cebu.

Kinilala ang suspek na si Anecito Pogado, 46-anyos na residente ng Barangay Bongoyan sa nabanggit na lalawigan.

Ayon sa mga otoridad, nasa mahigit dalawang toneladang taklobo ang nakuha sa isinagawang joint buy-bust operation ng mga tauhan ng Criminal Investigation and Detection Group-Lapu-Lapu City Field Unit (CIDG-LCFU), 300^th Air Intelligence Security Wing of the Philippine Air Force, Naval Forces Central, at Bureau of Fisheries and Aqua­tic Resources (BFAR).

Napag-alaman din na ang mga nakuhang taklobo na itinuturing na endangered species o nanganganib ng maubos ay Naibebenta sa ibang bansa sa halagang P15,000 bawat isa.

Nahaharap ngayon sa kaukulang kaso ang suspek habang inaalam na rin kung may kasabwat ito sa pagbebenta ng taklobo.