RONDA PROBINSYA

Patuloy na tinututukan ng Philippine National Police (PNP) ang sitwasyon sa ilang lugar sa Mindanao na nakararanas ng matinding pagbaha bunsod ng walang-tigil na pag-ulan.

Ayon sa Police Regional Office Bangsamoro Autonomous Region (PRO BAR), naka-deploy na ang kanilang mga search, rescue and retrieval at reactionary standby support force teams partikular na sa mabababang lugar.

Aabot sa 160 tauhan ng PNP ang nagbabantay sa nasa 119 evacuation centers at nagpapatrol sa mga lugar na iniwan ng mga lumikas.

Sa ngayon, patuloy na ginagawa ang search and rescue operations sa mga lalawigan ng Cotabato at Maguindanao na nakararanas ng malakas na pagbaha. —mula sa panulat ni Hannah Oledan

Muling umapaw ang Siaton River sa Negros Oriental na ikinabahala ng mga residente ng nasabing lugar.

Batay sa ulat, Biyernes ng gabi tumunog ang siren, hudyat na umabot na sa critical level ang naturang ilog.

Sapilitan namang lumikas ang mga residenteng nakatira sa low-lying areas patungo sa pinaka-malapit na paaralan.

Binaha rin ang Siaton District Hospital, dahilan para mahirapan itong makapagbigay ng agarang tulong sa mga pasyente.

Apat na lugar naman sa Siaton ang hindi madaanan bunsod ng landslides na tumama sa lugar.

Bukod sa Siaton, apektado rin ang Bayawan City at Basay town.

Samantala, nasa 374 na pamilya ang inilikas kagabi dahil sa malakas na pag-ulan na nagdudulot ng matinding pagbaha dahil sa bagyong Paeng. —mula sa panulat ni Hannah Oledan

Nagsasagawa ng Pre-emptive evacuation ang Bayan ng Candijay, Bohol matapos ang pananalasa ng bagyong Paeng.

Ayon kay Jerry Lacang-Fuentes, Head ng Candijay Disaster Risk Reduction and Management Office, isinasagawa ang Pre-emptive Evacuation ng mga residenteng naninirahan sa mga flood prone at landslide prone areas para matiyak ang kaligtasan ng mga resindente.

Alas-4:00 kahapon, hindi bababa sa dalawampu na  apektadong pamilya mula sa  Barangay Cambane ang kasalukuyang nasa Tambongan National High School habang limang pamilya mula sa Barangay Luan sa Luan Elementary School, at 11 pamilya mula sa Barangay Panadtaran sa Panadtaran Elementary School.

Itinuturing na landslide at flood prone areas ang Cambane, Luan at Pandataran.

Samantala, naghatid na ng tulong ang lokal na pamahalaan sa mga apektadong pamilya. —sa panulat ni Jenn Patrolla

Dalawa ang nasawi habang 34 ang isinugod sa ospital dahil sa Diarrhea sa Tacloban City, Leyte.

Ayon kay mayor Alfred Romualdez, kabilang sa namatay ang sampung buwang gulang na sanggol dahil sa matinding dehydration.

Nagsagawa naman ng rapid test at napag-alamang nagpositibo sa cholera ang mga biktima.

Karamihan sa mga na-ospital ay residente ng barangay Abucay at Marasbas.

Ipinag-utos na ni Romualdez ang pagsusuri sa lahat ng water refilling stations sa mga apektadong lugar. —mula sa panulat ni Jenn Patrolla

Balik-operasyon na bukas, October 25 ang Mactan Cebu International Airport.
Ayon ito sa pamunuan ng nasabing paliparan, matapos mag-overshoot ang isang eroplano ng korean air sa isang runway kagabi.
Gayunman, ipinabatid ng naturang paliparan na para lamang sa mga maliliit na domestic aircraft ang pagbubukas ng operasyon nito mamayang alas-12:01 ng hatinggabi.