RONDA PROBINSYA

Umabot na sa 20 katao ang patay habang lima pa ang nawawala matapos gumuho ang lupa sa barangay Kusiong sa Datu Odin Sinsuat, Maguindanao Del Norte.
Sinabi ni chairman Jaffer Sheen Sinsuat na hindi inaasahan ang pagguho ng Mount Minandar kung saan isa ito sa pinakasikat na bundok sa Maguindanao.
Kabilang sa mga nawawala ay ang apat na sanggol at isang matandang babae.
Samantala, nananatili ang mga residente ng barangay Kusiong sa mga evacuation centers.
Itinuturing na ang Mt. Minandar ang isa sa mga pinakaligtas na lugar sa Datu Odin Sinsuat kung saan ito ay nagsilbing relocation area para sa Maguindanaons noong nagkaroon ng tsunami noong Agosto 1976 kasunod ng 8.1 magnitude quake sa Cotabato trench.

Ipinalilipat ang petsa ng magkapatid na mambabatas mula sa Lanao Del Norte ang kauna-unahang regular eleksyon ng Bangsamoro Autonomous Region in Muslim Mindanao (BARMM).

Ayon kina Lanao Del Norte 1st District Rep. Khalid Dimaporo at 2nd District Rep. Sittie Aminah Dimaporo, nais na ipagpaliban ang halalan kaya’t naghain sila ng magkahiwalay na panukalang House Bill 4213 at 4220.

Nabatid na mananatili ang Bangsamoro Transition Authority (BTA) ang magiging interim government kung ito’y maaprubahan. —mula sa panulat ni Jenn Patrolla

Pumalo na sa 15,000 na pamilya o 72,000 na indibidwal ang apektado ng bagyong Paeng sa Bicol region.

Nananatili sa mga evacuation centers ang mga lumikas na Pilipino.

Ayon kay Gremil Alexis Naz, Spokesperson of Office of Civil Defense-Bicol ang mga nasabing indibidwal na lumikas ay mula sa mga landslide at flood-prone areas habang higit daang katao naman ang tumutuloy sa ibang tirahan.

Nagsimula na rin ang lokal na pamahalaan sa preemptive at forced evacuation sa mga high risk areas. —mula sa panulat ni Jenn Patrolla

Nakitaan ng bird flu o highly pathogenic avian influenza type a o H5N1 ang mga ipinamahaging free-range chicken sa mga benepisyaryo sa Laoag, Ilocos Norte.
Ayon sa provincial government ng Laoag, nagpositibo ang mga manok sa virus matapos itong maipamahagi ng Department of Agriculture-Regional Field Office 1 noong October 20 para sa mga benepisyaryo ng Balik-Probinsya 2 Program.
Kasalukuyan namang nagsasagawa ng surveillance at disinfection ang provincial government upang ma-kontrol ang pagkalat ng virus.
Ayon sa US Centers for Disease Control and Prevention, ang H5N1 ay nakamamatay para sa mga hayop at maaaring makaapekto sa mga tao at makapagdulot ng matinding sakit.
Samantala, inatasan naman ang mga magsasaka na ipagbigay-alam sa mga local agriculture office ang anumang poultry mortality habang sinabihan naman ang mga residente na nakararamdam ng sintomas ng influenza na magpatingin sa doktor. —mula sa panulat ni Hannah Oledan

Patay 53 indibidwal habang 22 ang nawawala sa Maguindanao dahil sa pagbaha at pagguho ng lupa bunsod ng pananalasa ng bagyong Paeng.

Apat na tulay ang hindi madaanan matapos masira nang umapaw ang tubig sa mga ilog.

Patuloy namang isinasagawa ang search and retrieval operations sa lalawigan sa mga napaulat na nawawala.

Nagpapatuloy rin ang LGU sa pamimigay at pag-repack ng ayuda para sa mga residenteng nasa evacuation centers. —mula sa panulat ni Maize Aliño-Dayundayon

Nalubog sa baha ang ilang barangay sa bayan ng Kawit, Cavite kagabi kasunod na pananalasa ng bagyong Paeng.

Patuloy ang ikinakasang rescue operation ng Cavite Provincial Disaster Risk Reduction Management Office (PDRRMO) kasama ang local DRRMO sa mga apektadong residente sa Cavite.

Ayon kay Mark Bawalan, division head ng Cavite PDRRMO, maraming pamilya ang na-trap sa San Juan sa Noveleta kaya humingi ng saklolo ang LGU sa provincial government.

Bagaman humina ang buhos ng ulang dala ng bagyo kaninang madaling araw, nananatili pa ring baha sa lugar kung saan wala ring kuryente. —mula sa panulat ni Maize Aliño-Dayundayon

Patuloy na dumarami ang bilang ng mga gumuhong tulay bunsod ng hagupit ng bagyong Paeng.

Bumagsak ang Marabong bridge sa Brgy. Tamburaga, bayan ng Burauen sa Leyte kahapon.

Ayon sa mga residente, luma at marupok na ang tulay at kinakain ng malakas na agos ng tubig ng gilid nito sa tuwing bumabaha.

Sa ngayon ay nakaabang na ang mga kawani ng lokal na pamahalaan upang abisuhan ang mga motorista na huwag munang daanan ang tulay.

Gumuho naman ang Paliwan bridge sa Antique bunsod ng malakas na agos ng tubig.

Hindi naman madaanan ang Oyungan bridge sa bayan ng Miagao, Iloilo matapos gumuho ang bahagi nito at pansamantalang isasara para sa lahat ng uri ng sasakyan.

Bumigay naman at hindi na madaanan ang Nituan bridge na nagdurugtong sa Parang, Maguindanao at Lanao Del Sur dahil sa pagragasa ng malakas na tubig.

Dahil dito, wala munang biyahe mula Cotabato patungong Pagadian at Cotabato – Marawi, Cotabato – Iligan, pati na rin Cagayan De Oro.

Samantala, isang detour bridge ang nasira sa Naval, Biliran kung saan 186 pamilya ang inilikas sa evacuation center. —mula sa panulat ni Hannah Oledan