RONDA PROBINSYA

Patay ang dalawang indibidwal habang sugatan naman ang apat matapos mahulog sa irrigational canal ang kanilang sasakyan sa Sitio Tuliao, Barangay Calanan, Tabuk City, Kalinga.

Ayon sa mga tauhan ng Tabuk City Police Station, 2nd Kalinga Provincial Mobile Force Company at Tabuk City Disaster Risk Reduction and Management Office, isang blue double cab elf ang nahulog sa canal matapos itong mawalan ng kontrol  kung saan, patuloy pang nagpapagaling ang mga biktimang nagtamo ng severe head injury.

Kinilala ang mga sugatang biktima na sina Cesar Camtugan, driver; Marlon Kis-Ing, 35years old; Jaymar Badillo, 31years old; Daniel Cudal, 57years old at Jayson Kinto, 37 years old habang hindi na pinangalanan ang dalawang biktimang nasawi.

Sa ngayon, patuloy pang nagsasagawa ng operasyon ang mga otoridad matapos ang insidente.

Nasa 81 indibidwal ang tinamaan ng Tuberculosis (TB) sa bayan ng Camaligan, Camarines Sur.

Ayon sa Municipal Health Office ng LGU Camaligan, karamihan sa mga dinapuan ang mga matatanda habang 10% naman dito ay mga bata.

Nabatid na sa unang anim na buwan ng taong 2022,  pumalo sa mahigit 26,000 ang kabuuang kaso ng TB kabilang na dito ang 16,290 na lalaki at 9,711 na babae.

Nilinaw ng lokal na pamahalaan na ang naitalang bilang ay mas mababa kumpara sa ibang bayan kung saan, patuloy na ginagamot ang mga tinamaan ng naturang sakit.

Samantala, minomonitor narin ang mga naging close contact kasabay ng pagpapa-inom ng mga gamot upang maiwasan ang pagdami ng kaso dahil mabilis umano itong nakakahawa sa pamamagitan lamang ng droplet o laway mula sa taong infected nito.

Nagpaalala naman sa publiko ang kagawaran na sakaling may mga sintomas na katulad ng dalawang linggo nang inu-ubo, sinisipon, masakit ang likod, at biglaang pagpayat, mas mainam na magpakunsulta na agad sa doktor.

Arestado sa mga otoridad ang nasa 21 empleyado matapos masangkot sa illegal online casino sa Biñan City at San Pedro, Laguna.

Ayon kay Police Colonel Randy Glenn Silvio, acting Provincial Director ng Laguna PPO, sa ikinasang Anti-Gambling Operation, naaktuhan ang mga suspek na nangungulekta ng mga bet money para sa online casino.

Nakumpiska sa mga inaresto ang ibat-ibang kagamitan sa iligal na aktibidad kabilang na ang 11 pakete ng hinihinalang tuyong dahon ng marijuana, mga drug paraphernalia, P29,500 na bet money, computer at iba pang gamit sa online game.

Nasa kustodiya na PDEA ang mga naaresto at mahaharap sa kasong paglabag sa kasong RA 9165 o Comprehensive Dangerous Drug Acts of 2002.

Isa na lamang ang naitalang aktibong kaso ng COVID-19 sa Lucena City sa lalawigan ng Quezon.

Ayon sa City Public Information Office, ang natitirang pasyente ay mula sa barangay gulang-gulang.

Batay sa datos hanggang nitong Disyembre 12, nakapagtala ang siyudad ng kabuuang 6,815 COVID-19 cases, 6,583 recoveries at 231 fatalities.

Samantala, nakapagtala naman ng tig-anim na aktibong kaso ng COVID-19 ang bayan ng Lucban, Candelaria, Gumaca at Atimonan.

Nasawi ang isang construction worker matapos matabunan ng gumuhong lupa sa Barangay Natipuan, Nasugbu, Batangas.

Kinilala ang biktima na si Francis Ortiz, 33 taong gulang at residente ng Sitio Sisa, Barangay Wawa.

Batay sa report ng Nasugbu police, nasa ilalim ng nasa 20 feet na excavated foundation sa isang private resort club ang biktimang si Ortiz nang gumuho ito Biyernes, dakong alas-4:30 ng hapon.

Mahigit 4 na oras ang isinagawang retrieval operations bago natagpuan ang katawan ng biktima.

Kasalukuyan namang iniimbestigahan at inaalam kung sino ang may responsibilidad sa insidente. - sa panunulat  ni Maze Aliño-Dayundayon