RONDA PROBINSYA

Nakumpiska ng mga tauhan ng 58th infantry “Dimalulupig” battalion ang isang high-powered firearm at war materials sa Misamis Oriental.

Ayon kay LT. Col. Christian Uy, Commanding Officer ng IB, nakatanggap sila ng report mula sa isang concerned citizen hinggil sa aktibidad ng mga rebelde dahilan para magkaroon ng bakbakan na tumagal ng 15 minuto.

Mabilis na nakatakas ang mga kalaban ng gobyerno kung saan, nadiskubre ng mga otoridad ang lumang Battle Dress Attire (BDA) uniforms na ginagamit umano ng mga rebelde upang linlangin ang mga sibilyan at makagawa ng iligal na aktibidad.

Sa ngayon, dinala na sa headquarters ng 58IB ang mga nakumpiskang armas at war materials para sa proper disposition habang patuloy pang nagsasagawa ng opersyon ang mga militar laban sa mga rebelde.

Niyanig ng lindol ang lalawigan ng Abra, kahapon.

Ala-5:05 ng hapon nang tumama ang magnitude 5.1 at natunton ang sentro sa layong tatlong kilometro, timog-silangan ng Bayan ng Pilar.

Naramdaman ang Intensity 5 sa Pilar at Lacub, Abra; intensity 4 sa Banayoyo, Ilocos Sur; Licuan-Baay, Abra; Intensity 3 sa Nueva Era, Ilocos Norte; San Fernando City, La Union;

Intensity 2 sa Baguio City; La Trinidad, Benguet habang intensity 1 sa Pasuquin, Ilocos Norte at Itogon, Benguet.

Ayon kay Phivolcs Science Research Assistant Dan Dy, tectonic ang origin ng lindol na may lalim na 8 kilometro.

Inaasahan anya ang aftershocks at pinsala matapos ang pagyanig.

Hulyo a – 27 nang tamaan din ng Magnitude 7 ang Abra at Magnitude 6.4 noong Oktubre a – 25 na kapwa nagdulot ng casualties at pinsala sa mga imprastraktura.

Umabot sa P13,046,480.00 ang halaga ng iligal na droga na nasabat ng mga otoridad sa loob ng isang linggo sa Cebu.

Ayon kay BGen Roderick Alba, hepe ng One-Cebu Inter-Agency Interdiction Task Force Police Regional Office, layunin ng pulisya na labanan ang kontra-droga kasama si Governor Gwendolyn Garcia at palakasin ang seguridad sa lugar.

Mapayapa anya ang pagdiriwang ng unang araw ng ‘Misa de Gallo’ sa Central Visayas sa tulong ng pamahalaan, local security team at mga volunteer group.

Nagpakalat naman ng mahigit 3K Pulis upang matiyak ang kaligtasan at kaayusan.

Samantala, inaasahan ng lalawigan ang pagdagsa ng mga turista dahil sa mahabang Christmas Break. —sa panulat ni Jenn Patrolla

Nakapagtala ang Department of Agriculture (DA) ng unang kaso ng African Swine Fever sa lalawigan ng Guimaras.

Ayon kay Jose Albert Barrogo, DA-Western Visayas Regional Technical Director for Operations, nakatanggap ang ahensya ng reklamo mula noong Disyembre a-15.

Kasunod nito, agad na nagpulong ang DA Regional ASF Task Force upang talakayin ang mga posibleng hakbang at interbensyon para maiwasan ang pagkalat ng ASF.

Naglabas ang pamahalaang panlalawigan ang Excutive Order Series of 2022, pansamantalang ipinagbabawal ang pagpapasok at paglabas ng mga baboy at produktong baboy na mula sa Munisipalidad ng Buenavista.

Paiigtingin naman ng ahensya ang surveillance at monitoring activities sa mga karatig barangay at iba pang backyard farms sa munisipyo. —sa panulat ni Jenn Patrolla

Pinalawig ng Department of Human Settlements and Urban Development (DHSUD) ang ‘Pambansang Pabahay para sa mga Pilipino Housing Program sa Region 12′.

Kabilang sa mga pumirma ng Memorandum of Understanding (MOU) ang General Santos City, Koronadal City, Polomolok sa South Cotabato, Tacurong City sa Sultan Kudarat at Probinsya ng South Cotabato.

Ayon sa DHSUD Undersecretary Samuel Young, mas maganda ang konsepto ng programang ito para matulungan ang mga pamilyang informal settler kabilang ang mga katutubo sa Region 12.

Layunin ng ahensya na magtayo ng isang milyong bahay taun-taon sa susunod na anim na taon upang matugunan ang pabahay sa bansa.

Samantala, batay sa datos, aabot sa 148,253 informal settler na pamilya sa Region 12 noong July 2022. —sa panulat ni Jenn Patrolla