RONDA PROBINSYA

Pinalawig pa ng anim na buwan ang pinaiiral na Pork Ban sa lalawigan ng Cebu.

Ayon kay Governor Gwendolyn Garcia, hindi na muna papayagang makapasok sa kanilang probinsya ang mga produktong karne galing sa Isla ng Panay at Guimaras matapos makapagtala ng mga kaso roon.

Mababatid na natapos na ang naunang Pork Ban sa Cebu noong Dis. 12, at nauna namang na-i-ulat ng Department of Agriculture (DA) ang unang kaso ng ASF sa Guimaras noong nakaraang linggo, Dis. 16.

Samantala, magkakabisa naman ang anim na buwang Pork Ban mula Enero 1 hanggang Hunyo 30 ng susunod na taon. —sa panulat ni Hannah Oledan

Nailigtas ang walong mag-anak matapos lumubog ang sinasakyang bangka sa karagatan ng Nasugbu, Batangas.

Ayon kay Nasugbu MDRRMO Head Alex Pimentel, galing sa Bataan ang mga pasahero na patungo sa Lian, Batangas para sa Christmas Party nang biglang alunin ang bangka.

Tumuloy pa rin anya bumiyahe ang bangka kahit may gale warning na ang Philippine Coast Guard.

Kinilala ang walo na sina Allan Jordan, 62; June Mojica, 50; Aillen Corsiga, 32; Marvin Taregon, 31; Jaderick, 16; Arvin Taregon, 12; Aivy Miles Taregon, 9, at Arianne Taregon, 7.

Agad nagsagawa ng rescue operations katuwang ang mga residente ng Sitio Iba sa Barangay Payapa nang makitang lumulutang ang mga biktima.—sa panulat ni Jenn Patrolla

Patay ang tatlo katao matapos sumiklab ang sunog sa Barangay Poblacion 2 sa Tagbilaran City.

Ayon kay Tagbilaran City Mayor Jane Yap, kabilang sa mga nasawi ang isang lalaki, babae at bata na natagpuang magkayakap sa ikalawang palapag ng kanilang bahay na hindi pa pinapangalanan.

Nakaligtas naman ang isa pang miyembro ng pamilya na isang altar boy, na sa simbahan natulog nang maganap ang sunog.

Batay sa imbestigasyon ng City Fire Department sa lugar, nagsimula ang sunog dakong alas-12:10 ng umaga sa hindi matukoy na bahay.

Madali ito kumalat lalo’t karamihan sa mga bahay ay gawa sa kahoy at light materials na nakatupok ng limampung kabahayan na kinabibilangan ng 88 pamilya.

Sa ngayon, hindi pa matukoy ng mga fire investigator ang sanhi ng sunog gayundin ang halaga ng pinsala.

Patay ang walong taong gulang na bata sa Marinduque matapos mabundol ng van habang nangangaroling.

Batay sa imbestigasyon ng Philippine National Police (PNP), ikwinento ng pinsan ng biktima na nangangaroling lamang sila nang maganap ang aksidente.

Tumawid umano ang dalawa sa kalsada pero naiwan ang biktima kaya nabundol ito ng van.

Agad dinala sa ospital ang dalawa pero nasawi na ang isa habang nagpapagaling ang isa pang bata.

Sa ngayon, dinala na sa istasyon ng pulis ang driver ng van na kinilalang si Val Rosales Jacobe, na hindi nagbigay ng pahayag.

Patuloy pang tumataas ang bilang ng mga kaso ng cholera sa Negros Occidental.

Naitala ang pinakamataas na kaso ng sakit sa Talisay City na nasa 23, sinundan ng Silay City, 21 kaso at isang namatay.

Habang sa EB Magalona ay mayroong 14 na kaso at isang namatay; Cadiz City, Apat na kaso; Victorias City, dalawang kaso; Pulupandan at Manapla, dalawang kaso bawat isa, at Murcia, isa ang nasawi.

Nuong Oktubre, naitala na ang pagtaas ng kaso sa nasabing lalawigan.

Samantala, umabot na sa 486 ang mga kaso ng acute gastroenteritis sa lungsod kung saan 17 na ang namatay.

Nalubog sa baha ang 25 bayan sa Bicol Region dahil sa walang-tigil na pag-ulan.

Ayon kay Gremil Alexis Naz, tagapagsalita ng Office of Civil Defense (OCD) sa Bicol, pumalo na sa 141 pagbaha ang naitala sa 25 bayan sa Albay, Camarines Norte, at Camarines Sur.

Nakadepende ang datos sa bilang ng mga naapektuhang pamilya at indibidwal.

Sa ngayon, pagtitiyak ni Naz na nakahanda na ang lokal na pamahalaan sa pamamahagi ng tulong para sa mga sinalanta ng baha.

Nagbabala sa publiko ang Provincial Health Office (PHO)-Sorsogon na doblehin ang pag-iingat kaugnay sa patuloy natumataas na kaso ng Hand Foot and Mouth Disease (HFMD) sa kanilang lalawigan.

Ayon kay Field Health Technical Services Sanitary Inspector IV Jeanelita Avanica, nangungunang tinatamaan sa nasabing sakit ay ang mga kabataang nasa edad 10 pababa.

Sinabi ng opisyal na umabot na sa 576 ang bilang ng naturang kaso na pinakamaraming naitala sa Lungsod ng Sorsogon kaya dapat na panatilihin ang pagiging malinis sa sarili partikular na ang paghuhugas ng kamay at katawan.

Kailangan din na mas mapalakas ang resistensya ng bawat isa at panatilihin ang pagsusuot ng face mask dahil madali itong makahawa.