RONDA PROBINSYA

Bangkay na nang matagpuan sa Matnog, Sorsogon ang isang mangingisdang taga-Catanduanes na nawawala simula pa noong Lunes, Disyembre 26.

Kinilala ang mangingisdang si Noel Zafe, 58 anyos, na narekober sa baybayin ng Barangay Paghuliran dakong alas-12:00 ng tanghali kahapon.

Ayon kay Mark Joseph Matira, Head of Operations ng Municipal Disaster Risk Reduction and Management Council ng Virac, isa si Zafe sa limang mangingisda na hindi na nakauwi noong bisperas ng pasko.

Maliban dito, nakita na rin anya ang bangkay ng isa pang mangingisdang si Arnel Araojo, 43 anyos sa baybayin ng Barangay Calanaga sa Rapu-Rapu, Albay.

Samantala, nagpapatuloy ang paghahanap sa tatlo pang kasamahan ni Zafe na sina Dante David, 41 anyos; Domingo Borilla Junior, 33 anyos at Jason Mandasoc, 31 anyos.

Bukod dito, pinaghahanap pa rin ang iba pang mangingisda mula naman sa bayan ng Viga, Catanduanes na Sinaringo Tupig, Willy Uchi, Jobert Teaño at Juanito Estrella Junior.

Disyembre 21 nang mangisda ang mga biktima sakay ng motorized banca at inaasahan sanang uuwi noong 23 pero hindi na nagawang makabalik pa.

Patay sa karambola ng tatlong sasakyan ang isang konsehal habang sugatan naman ang isang alkalde sa Quezon, Isabela.

Kinilala ang biktima na si Quezon, Isabela Sangguniang Bayan (SB) member Candido Andumang habang ang sugatang biktima naman ay kinilalang si Quezon Mayor Jimmy Gamazon Jr.

Ayon sa mga otoridad, naganap ang insidente bisperas ng pasko kung saan, binabaybay ng nasawing biktima ang naturang lugar at pauwi na sana ng Poblacion sakay ng pick-up truck nang dumiretso ito sa kabilang linya ng kalsada.

Batay sa imbestigasyon, bumaliktad ang sinasakyan ni Andumang matapos sumagi sa kasalubong na SUV na minamaneho naman ni Mayor Gamazon.

Naisugod pa sa pinakamalapit na pagamutan ang biktima pero idineklara din itong dead-on-arrival.

Patuloy namang nagpapagaling sa ospital si Mayor Gamazon habang iniimbestigahan pa ng mga otoridad ang insidente.

Nakaantabay na ang Disaster Risk Reduction and Management Office (DRRMO) ng Tandag City sa posibleng flashfloods at landslides sa Surigao del Sur.

Ito’y dahil sa nararanasang malakas na pag-ulang dala ng shear line dahilan upang itaas ang red warning level sa lungsod at ilang bayan sa nabanggit na probinsya.

Ayon kay Vitchie Bandoy, Tandag City CDRRMO Head, naka-activate na ang kanilang Emergency Operations Center bilang paghahanda sa posibleng pagbaha.

Kabilang anya sa kanilang tinututukan ang mga flood at landslide prone area.

Samantala, ipinag-utos naman ni Tandag City Mayor Roxanne Pimentel ang pagbabawal sa pagpalaot at paliligo sa dagat. –sa panulat ni Jenn Patrolla

Dalawa ang nasawi sa matinding pagbaha bunsod ng malakas na pag-ulan sa Misamis Occidental sa gitna ng pagdiriwang ng Pasko.

Kinilala ang mga biktimang sina Mario Sambiog at anak na si Elenita Calamian, kapwa residente ng Barangay Mialen, Oroquieta City.

Ayon sa Office of Civil Defense, hanggang leeg ang baha at pawang bubong na lamang ng bahay ang nakikita sa naturang lugar.

Mahigit 300 pamilya naman ang nagsilikas sa Northern Mindanao, kabilang sa Misamis Occidental at Eastern Visayas.

Una nang inihayag ng PAGASA na ang pag-ulan ay dulot ng shear line at Northeast monsoon o Amihan. –sa panulat ni Jenn Patrolla

Nailigtas ang apat na mangingisda matapos tumaob ang sinasakyan nilang bangka habang pumapalaot sa Palapag, Northern Samar kahapon.

Ayon sa Palapag MDRRMO, unang lumubog ang bangkang may sakay na dalawang mangingisdang kapwa residente ng Barangay Mapno.

Habang ang isa pang bangka ay may sakay rin na dalawang mangingisda na mula naman sa Barangay Monbon.

Agaran namang nasaklolohan ang mga mangingisda at naibalik sa dalampasigan.

Mababatid na umiiral ngayon ang gale warning sa karagatan ng Northern Samar at nakararanas din ang lalawigan ng pabugsu-bugsong pag-ulan bunsod ng Low Pressure Area. —sa panulat ni Hannah Oledan