Kaagad nalinis at naagapan ang posibleng epekto sa mga pananim na gulay ng andap o frost na bumalot sa isang greenhouse sa Atok, Benguet.
Nakitaan ng maninipis na yelo ang gutter ng nasabing greenhouse na nalinis din naman kaya’t hindi na nakaapekto sa mga pananim na repolyo at letsugas.
Ayon sa vegetable farmers, inaasahan na nila ang pagtama ng andap kasabay ng peak season ng amihan sa unang quarter ng taon.
Nilinaw ng Department of Health (DOH) na wala silang naitalang bagong kaso ng anthrax sa tao at nasawi sa mga kalabaw dahil sa nasabing sakit.
Ayon sa DOH Epidemiology Bureau at Regional Epidemiology Surveillance Unit ng Region 2, kontrolado na ng bansa ang sakit na anthrax.
Noong Disyembre 23, unang kinumpirma ng DOH na isandaan dalawampu’t limang katao sa lalawigan ng Cagayan ang kumain ng karne ng dalawang “may sakit at namatay” na kalabaw.
Sa nasabing bilang, 26 ang nagpakita ng sintomas ng anthrax sa tao na agad nagamot at na-tag bilang recover noong Disyembre 22.
Umabot naman sa 18,000 pasahero ang dumagsa sa Bicol Central Station sa Naga City, Camarines Sur kasabay ng unang araw ng trabaho ngayong taong 2023.
Pinaka-marami sa mga biyahero ay pabalik ng Metro Manila matapos mag-pasko at bagong taon sa Bicol.
Ayon kay Bicol Central Station Manager Nonoy Reforsado, posibleng tumagal pa ng ilang araw ang buhos ng mga pasaherong pabalik ng Metro Manila.
Kahit nagdagdag anya ng bus ang ilang kumpaniya ay hindi pa rin umano kinakaya ang dami ng pasahero.
Sa kabila nito, wala namang naging problema o naitalang anumang aberya sa nasabing terminal.
Pansamantala munang ipinatigil ng Mines and Geosciences Bureau (MGB) sa Davao ang lahat ng mining activities sa Pantukan at Monkayo sa probinsiya ng Davao de Oro.
Dahil ito sa patuloy na pag-ulang nararanasan dahil sa trough ng Low Pressure Area o LPA.
Batay sa abiso ng Geohazard MGB Davao, pinaalalahanan nito ang mga small scale miners na manatili muna sa ligtas na lugar dahil sa posibilidad na landslide.
Inirekomenda naman nito sa mga residente sa Purok Ecoland, Sitio Diat, Barangay Napnapan, Pantukan at Purok 15, 16 at 17 sa Barangay Diwata, Monkayo na magsagawa ng pre-emptive evacuation dahil sa posibilidad ng pagguho ng lupa.
Sa ngayon, patuloy ang pagmonitor ng lahat ng Local Government Units at Local Disaster Risk Reduction and Management Councils sa kalagayan ng panahon sa lugar.
Sugatan ang dalawa katao sa Iloilo City matapos maminsala ang isang buhawi.
Kinilala ng Arevalo Police Station ang mga nasugatan na sina Vilma Villarete, 63- anyos at apo nitong 9- anyos.
Nasugatan ang dalawa matapos matumbahan ng puno ang kanilang tahanan sa Barangay Sta. Cruz sa Arevalo, Iloilo City dakong alas-5 kaninang madaling araw.
Gawa umano sa light materials ang tahanan ng mga biktima kung saan naganap ang buhawi nang sila ay natutulog.
Agad namang isinugod sa ospital ang bata habang minor scratches ang tinamo ni Lola Vilma.
Sa ngayon, batay sa pinakahuling datos ng Iloilo City Operation Center, pumalo na sa 18 bahay sa Distrito ng Arevalo ang napinsala dahil sa buhawi, labing-isa sa Barangay Sta. Cruz habang 7 sa Barangay Sto. Dominggo.
Patuloy naman ang clearing operations ng City Disaster Risk Reduction Management Office sa tatlong barangay.
Niyanig ng magnitude 4.8 na lindol ang Surigao del Sur kaninang umaga.
Ayon sa PHIVOLCS, naganap ang pagyanig dakong ala-6:09 ng umaga at natunton ang episentro nito sa layong 73 kilometro hilagang-silangan ng Hinatuan, Surigao del Sur.
Naitala ang instrumental Intensity III sa Nabunturan, Davao de Oro habang Instrumental Intensity I naman sa Bislig City, Surigao del Sur at Alamada, Cotabato.
Sa kabila nito, sinabi ng PHIVOLCS na wala namang inaasahang aftershocks at pinsala matapos ang pagyanig.
Nasabat ang mahigit P1.4M na halaga ng shabu sa isinagawang search warrant operation sa Maura, Appari, Cagayan.
Kinilala ang mga suspek na sina Rolando Uri, 52-anyos, Mila Malana, 50-anyos at Michael Uri, 30- anyos, kapwa residente ng nabanggit na lugar.
Ayon kay Police Major Jefferson Mukay, hepe ng Aparri Police Station, narekober ang 60 piraso ng heat-sealed transparent plastic sachets ng shabu na may timbang na 298grms.
Kabilang din dito ang pinatuyong dahon at fruiting tops ng marijuana.
Kasalukuyan ng nakapiit na ang mga suspek sa Appari Police Station.
Nahaharap naman sa kasong paglabag sa Republic Act of 9165 o Comprehensive Dangerous Drugs Act of 2002 ang tatlong suspek. —sa panulat ni Jenn Patrolla
Pumalo sa P1.2M na halaga ng ari-arian sa sumiklab na sunog Barangay Calamba Cebu City, sa gitna ng pagdiriwang ng bagong taon.
Ayon kay Fire Officer III, Emerson Arceo, imbestigador ng Cebu City Fire Station, posibleng dahil ito sa electrical short circuit lalo na’t ancestral house pa ang natupok ng apoy.
Sinabi naman ng nasunugan na hindi sila nagsindi ng anumang paputok kasabay ng pagsalubong sa New Year.
Patuloy pa rin iniimbestigahan ng mga otoridad ang pinagmulan ng sunog. —sa panulat ni Jenn Patrolla
Patay ang isang 38 taong gulang na negosyante matapos pagbabarilin sa harap ng kanilang bahay sa Green Meadows Subdivision sa Barangay Tugbok sa lungsod ng Davao.
Kinilala ng Davao City Police ang biktima na si Yvonne Plaza Chua.
Batay sa CCTV footage na nakalap ng Tugbok police, makikita ang isang lalaki na bumaba ng motorsiklo kasama ang isang kasabwat at binaril sa ulo si Chua bago mabilis na tumakas.
Iniimbestigahan pa rin ng mga awtoridad ang motibo sa pamamaril.
Pumalo sa P9.1-M ang halaga ng mga pananim na napinsala ng kalamidad sa Agusan del Norte.
Ayon sa report ng Provincial Disaster Risk Reduction Management Office (PDRRMO), mahigit 38 ektarya ng lupang sakahan ang apektado ng mga pagbaha, partikular sa apat na barangay sa bayan ng Santiago.
Kabilang naman sa mga napinsala ang halos 14 ektaryang gulayan, 13ektaryang maisan at higit sampung ektaryang palayan.