RONDA PROBINSYA

Halos isang milyong indibidwal sa Bicol Region, pansamantalang nananatili sa mga evacuation center

Tinatayang aabot sa isang milyong indibidwal ang inilikas sa Bicol Region dahil sa bagyong Rolly.

Ayon kay National Disaster Risk Reduction and Management Council (NDRRMC) Administrator Undersecretary Ricardo Jalad, base sa natanggap nilang ulat mula sa lokal na pamahalaan ng Albay, nasa 174,616 pamilya o 794,000 indibidwal ang pansamantalang nananatili ngayon sa mga evacuation center.

1,329 pamilya o 6,645 indibidwal naman ang inilikas mula sa Calaguas islands sa Camarines Norte at halos 200,000 na mga katao naman ang nag-evacuate sa Camarines Sur.

Samantala, sa Metro Manila, inilikas narin ang mga residenteng naninirahan sa mga baybaying dagat, tulad ng Manila Bay.

November 1, 2020 0 comment

RONDA PROBINSYA

128 pamilya sa CamSur inilikas bilang pag-iingat sa Bagyong Rolly

written by DWIZ 882

Nagsimula nang ilikas ng provincial government ng Camarines Sur ang mga residente nito bilang pag-iingat sa Bagyong Rolly.

Ayon sa Philippine Coast Guard (PCG), nasa 128 mga pamilya mula sa Barangay Ipil at Iraya sa bayan ng Buhi ang inilikas.

Batay sa pinakahuling abiso ng PAGASA, nakasailalim ang probinsya ng Camarines Sur sa tropical cyclone wind signal number 2.

October 31, 2020 0 comment

HEADLINES RONDA PROBINSYA

Sorsogon nagpatupad na ng pre-emptive evacuation

written by DWIZ 882

Isasailalim sa pre-emptive evacuation ang nasa 15,000 indibidwal o tinatayang 4,000 mga pamilya sa probinsya ng Sorsogon dahil sa banta ni Bagyong Rolly.

Ayon kay Sorsogon Governor at dating Senador Chiz Escudero, ito’y makaraang ipag-utos niya ang pre-emptive mandatory evacuation 12 oras bago maramdaman sa probinsya ang bagyo.

Pinag-utos ko na ang pre-emptive evacuation sa mga binabahang lugar, mababang lugar at mga lugar prone sa landslide. 12 hours bago namin inaasahang masimulan maramdaman ‘yung epekto ng Bagyong Rolly ani. Escudero

Pagtitiyak ni Escudero, kumpleto sa mga evacuation centers ang kanilang probinsya para tumugon sa pangangailangan ng ligtas na lugar na tutulugan ng mga residenteng ililikas gaya ng mga nakatira sa mababang lugar o ‘yung mga malalapit sa ilog, tabing dagat maging sa mga nasa landslide prone area.

Pagdidiin pa ni Escudero, nakahandang umalalay ang provincial government ng sorsogon sa mga LGU’s nito hinggil sa pamamahagi ng relief packs sa mga masasalanta ng bagyo.

Sa katunayan ang bumabalikat niyan kasi karamihan sa mga LGU ngayon, naubos nha ‘yung calamity at QRF funds dahil sa pandemya ng covid. Ang probinsya na lamang ang may pinakamalaking reserba diyan. Kaya’t kami ang aalalay sa mga LGU kaugnay sa relief packs sa mga i-evacuate namin sa mga susunod na oras. ani Escudero sa panayam ng DWIZ

October 31, 2020 0 comment

HEADLINES NATIONAL NEWS RONDA PROBINSYA

Mahigit P1.6-B na droga nakumpiska sa 2 Chinese sa Nueva Ecija

written by DWIZ 882

Nakumpiska ng mga awtoridad ang higit sa P1.6-B halaga ng hinihinalang droga sa dalawang Chinese nationals sa Cabanatuan sa Nueva Ecija.

Batay sa imbestigasyon ng Bureau of Customs (BOC), dumating ang cargo noong 24 ng Oktubre sa Ninoy Aquino International Airport (NAIA) na naunang idineklara bilang ‘work bench tables’ na nagmula sa Malaysia.

Mababatid na dumaan sa x-ray ang naturang kargamento at makaraang masuri ito, ay nakitang mga hinihinalang mga shabu na nakalagay sa tea bag na aabot sa 240 kilos ang timbang at nagkakahalaga ng P1.632-B.

Kasunod nito, agad na nagkasa ng operasyon ang BOC-NAIA, PDEA at NAIA Inter-Agency Drug Interdiction Task Group na nagbigay daan para maaresto ang dalawang Chinese nationals.

Sa ngayon, ay nagpapatuloy ang ginagawang imbestigasyon ng mga awtoridad para malaman kung sino ang nasa likod ng ipinadalang cargo na naglalaman ng iligal na droga.

October 31, 2020 0 comment

NATIONAL NEWS RONDA PROBINSYA

600 pamilya sa Infanta sa Quezon ililikas na bago manalasa ang bagyong Rolly

written by DWIZ 882

Nakatakda nang ilikas ang may 600 pamilya sa Brgy. Dinahican sa bayan ng Infanta, lalawigan ng Quezon.

Ito’y bilang paghahanda na rin sa pananalasa ng bagyong Rolly na nagbabanta sa gitna at katimugang Luzon kabilang na ang Metro Manila.

Gayunman, pahirapan sa mga awtoridad ang paglilikas dahil marami sa mga residente ang mas pinipili ang kanilang mga ari-arian kaysa sa sariling kaligtasan.

Maliban sa Brgy. Dinahican, binabantayan din ng mga awtoridad ang anim pang barangay para isailalim sa pre-emptive evacuation.

October 31, 2020 0 comment

NATIONAL NEWS RONDA PROBINSYA

Oplan byaheng Undas isinagawa ng PCG

written by DWIZ 882

Pinagana na ng Philippine Coast Guard (PCG) ang kanilang oplan biyaheng Undas para sa taong kasalukuyan.

Ayon sa Coast Guard, aabot sa mahigit 1,600 tauhan nila ang nakakalat na sa mga pantalan para magkasa ng inspeksyon sa may 247 barko at mahigit 380 motorbanca.

Kasama rin sa iinspeksyunin ng coast guard ang may 6,637 outbound passengers at nasa 5,838 inbound passengers sa iba’t-ibang pantalan sa bansa.

Samantala, nakapagsagawa na rin ng kanilang inspeksyon ang Southern Tagalog District Office ng coast guard sa may 51 mga barko.

Habang nakapagtala naman ng mahigit 1,660 outbound gayundin ng 1,594 na inbound passengers ang coast guard sa National Capital Region (NCR).

October 31, 2020 0 comment

RONDA PROBINSYA

3 ASG sumuko sa Sulu

written by DWIZ 882

Sumuko sa tauhan ng Joint Task Force Sulu ang tatlong miyembro ng Abu Sayyaf Group kabilang na ang isang kidnapper nito.

Kinilala ni 6th Special Forces Battalion Commander Lt/Col. Rafael Caido ang sumukong kidnapper na si alyas “Dexter” na tubong Patikul sa Sulu.

Sinasabing sangkot si alyas Dexter sa pagdukot ng mga Indonesian seafarers na sakay ng isang bangkang pangisda sa karagatang sakop ng Malaysia noong Enero ng taong ito.

Magugunitang nagsagawa ng joint operation ang puwersa ng army, navy at air force sa Sulare Island, Parang, Sulu noong Enero 18 kung saan napatay ang ilang bandido.

Inamin ni Dexter na kasama siya sa grupo ng mga kidnapper subalit hindi umano niya alam noong panahon na iyon na magsasagawa sila ng pagdukot.

Samantala, sumuko rin ang dalawa pang miyembro ng Abu Sayyaf Group na kinilalang sina Albasir Salim alyas Abu Sadad na tauhan ng napatay na ASG sub-leader na si Sibih Pisih at Edwin alyas Splakang Panduga Abdulmain na nasa ilalim naman ni ASG subleader Ekoh Udjaman.

Kasamang isinuko ng 3 ang kanilang mga armas na kinabibilangan ng isang M1 carbine, isang G1 battle rifle at isang M1 grand rifle.

October 31, 2020 0 comment

HEADLINES NATIONAL NEWS RONDA PROBINSYA

44 na bagong kaso ng COVID-19 naitala sa PNP

written by DWIZ 882

Nakapagtala ng 50 bagong COVID-19 recoveries ang hanay ng Philippine National Police (PNP).

Ito ang dahilan ayon sa PNP Health Service kaya’t umakyat na sa 6,582 ang kabuuang recoveries ng PNP sa nasabing virus.

Dahil dito, nasa 581 na lamang ang aktibong kaso ng virus sa hanay ng pambansang pulisya.

Gayunman, 44 na bagong kaso ang naitala ng PNP kaya’t umakyat na sa 7,185 ang kabuuang bilang nito.

Tig-anim ang naitala sa NCRPO at Western Visayas, tig apat naman mula sa Eastern Visayas, Zamboanga Peninsula, Davao Region at CARAGA.

Tig-tatlo naman ang naitala sa National Administrative Support Unit at sa Cordillera Administrative Region habang dalawa naman mula sa Cagayan Valley.

Habang tig-isa naman ang naitala sa National Headquarters, Central Luzon, Calabarzon, Mimaropa, Bicol, Central Visayas, Northern Mindanao, Soccsksargen at Bangsamoro Autonomous Region.

Samantala, nananatili naman sa 22 ang bilang ng mga nasawi sa hanay ng PNP dahil sa nasabing virus.

October 31, 2020 0 comment

RONDA PROBINSYA

2 lider terrorista, napatay na umano ng miltar sa mga nakalipas na bakbakan — Wesmincom

written by DWIZ 882

Tiwala ang militar na patay na ang lider terroristang si Furuji Indama sa kanilang pinaigting na opensiba sa Zamboanga Sibugay noong isang buwan.

Ito ang inihayag ng Western Mindanao Command (Wesmincom) kasunod ng pagkakapaslang sa Abu Sayyaf member na nakilala lamang sa alyas na Botak nitong HUWEBES.

Ayon kay Wesmincom Chief Lt/Gen. Corleto Vinluan Jr., batay sa mga nakalap nilang imporasyon at masusing pagsisiyasat ay nakumpirma nilang wala na nga si Indama.

Bagama’t hindi nakita ang labi ni Indama, kitang kita mismo ani Vinluan ng mga sundalong nakabakbakan ng mga bandido na napuruhan ang lider terrorista sa kanilang engkuwentro.

Gayunman, hindi inabandona ng kaniyang mga tauhan si Indama at pilit pa rin itong sinagip hanggang sa maitago sa kabila na rin ng matinding palitan ng putok sa pagitan ng magkabilang panig.

Samantala, inihayag din ni Wesmincom Spokesman Lt/Col. Alaric Avelino Delos Santos na kasalukuyang bina-validate din ng militar ang pagkakapaslang sa isa pang lider terrorista na si Mundi Sawadjaan na nasa likod ng serye ng pambobomba sa Jolo, Sulu.

October 31, 2020 0 comment

NATIONAL NEWS RONDA PROBINSYA

Landslide, flashflood prone areas pinatututukan ng DILG

written by DWIZ 882

Pinagana na ng Department of the Interior and Local Government (DILG) ang Oplan Listo kasunod ng napipintong pananalasa ng bagyong Rolly.

Ayon kay DILG Sec. Eduardo Año, inatasan na niya ang lahat ng mga ahensyang nasa ilalim ng kaniyang tanggapan na maagang ilikas ang mga nasa mabababang lugar na bantad sa landslide at flash floods.

Giit ng kalihim, kinakailangan ng mabilisang pagkilos ngayong panahon ng kalamidad lalo’t inaasahang magiging kasing lakas ito ng super bagyong Yolanda na tumama sa bansa noong 2013.

Dagdag pa ni Año, madaling palitan ang mga nasirang ari-arian pagkatapos ng sakuna subalit hindi ang buhay sa sandaling ito’y mawala dulot ng pagwawalang bahala sa kaligtasan ng lahat.

Kasunod nito, sinabi rin ni Año na bukas na bukas ngayon ang mga paaralan para gamiting evacuation center subalit dapat pa rin aniyang isaalang-alang ang mga pag-iingat lalo’t kasabay ng bagyo ay may umiiral pa ring pandemya ng COVID-19.

October 31, 2020 0 comment

Newer Posts

Older Posts