RONDA PROBINSYA

Tiwala ang militar na patay na ang mga lider ng Abu Sayyaf Group (ASG) na sina Furuji Indama at Hatib Hajan Sawadjaan.

Ito ang inihayag ng Western Mindanao Command (Wesmincom) kasunod ng pagkakapatay sa Abu Sayyaf member na nakilala lamang bilang alyas Botak.

Ayon kay Wesmincom Spokesman Lt/Col. Alaric Avelino Delos Santos, nakita mismo ng mga sundalo na malubhang nasugatan si Indama sa kanilang naging engkuwentro sa Zamboanga Sibugay nitong Setyembre.

Gayunman, pilit pa rin itong sinagip ng kanyang mga kasamahan hanggang sa maitago sa kabila ng matinding putukan.

Sa hiwalay na panayam, kapwa naman kinumpirma nila Army Chief Lt/Gen. Cirilito Sobejana at Wesmincom Chief Lt/Gen. Corleto Vinluan na patay na si Indama batay na rin sa mga impormasyong kanilang nakalap. — ulat mula kay Jaymark Dagala (Patrol 9)

Hindi na muna magpapapasok ng mga locally stranded individuals (LSI)’s at balik-bansang mga OFW’s ang Oriental Mindoro hanggang Nobyembre a-11.

Ito ang inanunsyo ng lokal na pamahalaan ng Oriental Mindoro matapos matindin salantain ng Bagyong Quinta.

Ayon sa Oriental Mindoro LGU’s, kinakailangan muna nilang ipaayos ang kanilang mga isolation at quarantine facilities na nasira ng nagdaang bagyo.

Maliban dito, nagpapatuloy din ang isinasagawang rehabilitation measures ng kanilang mga health at disaster offices sa mga pamilyang naaapektuhan ng Bagyong Quinta.

Naka-blue alert na ang lalawigan ng Pangasinan bilang paghahanda sa posibleng pananalasa ng Bagyong Rolly.

Nangangahulugan itong naka-alerto na ang lahat ng mga kinauukulang ahensya ng gobyerno kabilang ang pagpo-posisyon ng rescue equipment.

Mino monitor din ng mga otoridad ang water level sa iba’t ibang ilog sa Pangasinan gayundin ang San Roque Dam.

Kumilos na rin ang mga residente at pinatibay ang kanilang mga bahay partikular ang kanilang mga bubong sakaling manalasa ang Bagyong Rolly na maaaring magdala malalakas na ulan at hangin na nasa signal number 3 o 4.

Inaasahang magla landfall ang Bagyong Rolly sa Central Luzon Quezon area sa Linggo ng gabi o Lunes ng umaga.

Isang engkuwentro ang sumiklab sa pagitan ng tropa ng pamahalaan at mga hinihinalang miyembro ng Abu Sayyaf Group sa Indanan Sulu.

Ayon kay Western Mindanao Command (Wesmincom) Commander Lt. General Corleto Vinluan Jr., tumagal ng 20 minuto ang bakbakan sa pagitan ng militar at tinatayang 15 miyembro ng Abu Sayyaf.

Pinaniniwalang mga tauhan ito nina ASG Leader Mundi Sawadjaan at Radulan Sahiron.

Sinabi ni Vinluan, walang nasawi sa panig ng militar habang hindi pa nila matiyak sa grupo ng mga bansido.

Narekober naman sa lugar ng engkuwentro ang ilang mga matataas na kalibre ng armas, tatlong duyan, dalawang pares ng combat boots, dalawang backpack at kopya ng passport ng pinaniniwalang pagmamay-ari ng dalawang Indonesian nationals.