NATIONAL NEWS

Posibleng tumagal hanggang sa susunod na buwan ang “super flu” na nakakaapekto sa maraming Pilipino sa gitna ng umiiral na amihan season sa bansa.

Ayon kay infectious diseases specialist Dr. Rontgene Solante, ang tinatawag na “super flu” o subclade K ng influenza A ay may kaparehong mga sintomas at haba ng paggaling tulad ng iba pang mga variant ng trangkaso, na maaaring tumagal nang mahigit sampung araw o hanggang dalawang linggo, lalo na sa mga indibidwal na patuloy na nagtatrabaho.

Batay sa datos ng World Health Organization, natukoy ang subclade K ay nakaapekto sa tatlumpu’t apat na bansa, kabilang ang Pilipinas, sa loob ng anim na buwan.

Aabot sa dalawandaang walumpu’t tatlong kaso ng influenza A sa bansa mula Enero hanggang Oktubre noong nakaraang taon.

Batay sa isinagawang genetic sequencing, mahigit 50 kaso ang A, kung saan pito sa bawat sampung sample ng A ang inuring kabilang sa subclade K.

Dagdag pa ni Solante, maraming admission sa ospital ng subclade K sa maraming bansa dahil sa mas nakakahawa, lalo na sa mga hindi nabakunahan, habang ang mga umiiral na bakuna ay nananatiling epektibo.

Kaya naman, pinayuhan ng eksperto na mas mainam na magpabakuna ang mga bata at mga seniors, lalo na sa mga may planong maglakbay sa temperate countries.

Posibleng tumagal umano ng anim na buwan bago humupa ang nag-aalburutong Bulkang Mayon sa Albay, Bicol.

Ayon kay Phivolcs Director Teresito Bacolcol, kung pagbabatayan ang naging aktibidad ng bulkan noong 2023, umabot lamang sa mahigit tatlong kilometro ang inabot ng lava flow.

Gayunman, sa kasalukuyang aktibidad ng Bulkang Mayon ay wala pa umanong namamataang pagluwa ng lava o nagbabagang apoy mula sa bunganga ng bulkan.

Nilinaw rin ng Phivolcs official na ang malakas na volcanic unrest ay mabilis lamang, hindi katulad ng mahina gaya ng ipinapakita ngayon ng bulkan.

Batay sa tala ng ahensya, tumagal ng dalawang buwan bago humupa ang bulkan matapos pumutok noong 2018, habang noong 2000 ay umabot lamang ito ng dalawang linggo hanggang sa kumalma, pero umabot ito sa Alert Level 5 status.

Binigyang-diin ni Bacolcol na bagamat patuloy ang matinding aktibidad, wala pang dahilan na isailalim ito sa Alert Level 4 status dahil wala pang nasusubaybayang matinding parameters tulad ng pagtaas nang madalas na pyroclastic density currents o “uson,” lava fountaining, lava flow, at madalas na volcanic earthquakes.

Hindi dapat sayangin ang oras sa tinatawag na Cabral files.

Ito ang iginiit ni Senate President Vicente “Tito” Sotto III, kasabay ng pagsasabing mas mahalagang tutukan ang mga dokumento mula sa Department of Budget and Management.

Nang tanungin kung may bigat ang nasabing mga dokumento, sinabi ni SP Sotto na hindi dapat ito pag-aksayahan ng panahon.

Ang dapat aniyang pag-aksayahan ng panahon ay kung ano-ano ang mga proyektong ni-release sa nasabing files.

Sinabi rin ng lider ng Senado na mas nais niyang imbestigahan ang posibleng mga ghost flood control projects sa Luzon, Visayas, at Mindanao at papanagutin ang mga nasa likod nito.

Ang Cabral files ay mga sinasabing listahan ng mga ipinasok na proyekto at ng kanilang mga proponent na iniuugnay sa yumaong dating Department of Public Works and Highways Undersecretary na si Catalina Cabral.

Inaasahang tataas ang singil sa kuryente ng mahigit walong milyong customer ng Meralco ngayong buwan.

Ito’y sa harap ng pagbaba ng halaga ng piso at bagong pass-through charge para suportahan ang renewable energy.

Ayon kay Meralco spokesman Joe Zaldarriaga, may upward pressure sa generation charge dahil maraming power supply costs ang dollar-denominated.

Makaaapekto rin anya sa January billing ang koleksiyon ng green energy auction allowance matapos itong aprubahan ng Energy Regulatory Commission, bilang suporta sa pag-unlad ng renewable energy sources sa bansa.

Matatandaang nagsara ang piso sa 58-pesos 79-centavos kada dolyar nitong December 29, mas mahina kumpara sa 58-pesos 64-centavos noong Nobyembre.

Isa sa bawat dalawang pamilyang Pilipino ang nagsasabing mahirap sila.

Ito ang resulta ng pinakahuling pagsusuri ng Social Weather Stations na inilabas kahapon, Enero a-nuwebe.

Ayon sa SWS, 51% ng 1,200 respondents nito sa buong bansa ang nagsasabing mahirap sila, habang 37% naman ang nagsabi na hindi sila mahirap.

Nasa 12% naman ang nagsabing nasa gitna sila ng pagiging mahirap at hindi mahirap.

Naitala ng SWS ang pinakamaraming respondent na nagsabi na sila’y mahirap sa Mindanao, na sinundan naman ng Visayas, Balance Luzon, at Metro Manila.

Naniniwala si dating Senate President Franklin Drilon na dapat nang buwagin ang Independent Commission for Infrastructure.

Ito’y kasunod ng pagbibitiw sa pwesto nina dating Public Works Secretary Rogelio “Babes” Singson at Rossana Fajardo bilang commissioner ng ICI.

Ipinunto ni Drilon ang hindi pagtatalaga ni Pangulong Ferdinand Marcos Jr. ng mga bagong commissioner ng ICI kaya tila nakatakda na itong mabuwag.

Bukod sa ICI, tinukoy ng dating Senate president ang mga ahensyang may hurisdiksyon at maaaring magpatuloy sa imbestigasyon ng maanomalyang flood control projects.

Mahigit apat na libong estudyante sa Albay ang lumipat sa modular at blended learning matapos ilikas kasama ang kanilang pamilya dahil sa patuloy na banta ng Bulkang Mayon.

Ayon kay Alvin Cuz, Disaster Risk Reduction and Management coordinator ng Department of Education Albay Division, mahigit anim na raang estudyante ang nailikas mula sa mga lugar na nasa loob ng six-kilometer permanent danger zone, habang mahigit tatlong libong estudyante naman ang naapektuhan sa apat na paaralan na kasalukuyang ginagamit bilang mga evacuation center.

Ilan sa mga pamilya ay nananatili sa mga community evacuation center na inilaan ng mga lokal na pamahalaan.

Dagdag ni Cuz, patuloy ang DepEd sa pagmo-monitor at pagsasagawa ng on-site inspections upang matiyak ang kaligtasan ng mga estudyante at mga school personnel.

Hihiling ang House Infrastructure Committee ng mga kopya ng mga dokumento ng yumaong Public Works Undersecretary na si Maria Catalina Cabral.

Nakatitiyak si House Infracomm co-chairman at Bicol-Saro Partylist Rep. Terry Ridon na may sarili pang mga kopya ang DPWH ng mga dokumento ni Cabral kahit na naisumite na ang mga ito sa Office of the Ombudsman.

Nilinaw ni Rep. Ridon na ang paghingi ng mga kopya ng tinaguriang “Cabral files” ay hindi layuning pabulaanan ang mga kopyang inilabas sa publiko ni Batangas First District Rep. Leandro Leviste, kundi upang maging bahagi lamang ng kanilang files.

Dagdag pa ng Bicol-Saro representative, mahalaga para sa House Infracomm na magkaroon ng mga kopya ng mga dokumento sakaling buhayin ng tri-committee ang mga pagdinig nito hinggil sa maanomalyang flood control projects sa oras na mabuwag ang ICI.—sa panulat ni John Riz Calata

Masusing binabantayan ng Philippine National Police ang posibleng bentahan ng iligal na droga ngayong araw ng Traslacion.

Ayon kay PNP Public Safety Division chief, Col. Julius Domingo, hindi nila inaalis ang posibilidad na may ilang indibidwal ang gumagamit ng iligal na droga upang manatiling gising sa magdamag lalo na’t puyatan ang pagdiriwang ng pista ng Poong Nazareno.

Katuwang ng PNP ang Philippine Drug Enforcement Agency at iba pang ahensya sa pagbabantay sa mga drug syndicate na maaaring samantalahin ang pagdiriwang.

Mananatiling suspendido ang mga pagdinig ng House Infrastructure Committee (Infracomm) hinggil sa flood control anomaly.

Ito ang sinabi ni House Committee on Public Accounts chairman at Bicol Saro party-list Rep. Terry Ridon, na wala silang balak na i-resume o ipagpatuloy ang mga pagdinig hanggat mayroon o umiiral pa rin ang Independent Commission for Infrastructure (ICI).

Sa harap na rin ito ng pagbitiw ng mga credible members ng komisyon gaya nina Commissioner Rosanna Fajardo, Baguio City Mayor Benjamin Magalong, at dating DPWH Sec. Babes Singson na nagpapatunay na may mali at problema ang ICI.

Iginiit ni Congressman Ridon na mananatiling “indefinitely suspended” ang kanilang hearings dahil nagpapatuloy pa rin ang pagsisiyasat ng ICI sa flood control scandal.

Nauna na ring nanawagan ang mambabatas para sa agarang replacement o pagtatalaga ng kapalit ng mga nag-resign na commissioner ng ICI.

Sa kabila nito, sinabi ng mambabatas na hihingi sila ng payo sa House Committee on Rules kung maaari ba silang magsagawa ng mga pagdinig sa “non-DPWH issues” gaya na lamang ng “super health centers,” farm-to-market roads o FMR, at school buildings.