NATIONAL NEWS

Palalawakin ng Department of Education ang school-based feeding program nito sa 2026 upang masaklaw ang humigit-kumulang 4.6 milyong mag-aaral sa buong bansa, na susuportahan ng 25.7 bilyong pisong pondo mula sa 1.01 trilyong pisong budget ng ahensya para sa basic education.

Ayon sa DepEd, layon ng pinalawak na feeding program na tugunan ang malnutrisyon at mapabuti ang partisipasyon sa paaralan, lalo na ng mga mag-aaral sa mga unang baitang at ng mga itinuturing na nutritionally at risk.

Sa ilalim ng pinalawak na programa, magbibigay ang DepEd ng masustansiyang pagkain sa loob ng 200 feeding days para sa humigit-kumulang 1.52 milyong kindergarten learners at 1.79 milyong mag-aaral sa Grade 1.

Makakatanggap din ng pagkain sa loob ng 200 feeding days ang karagdagang 1.18 milyong mag-aaral sa Grades 2 hanggang 6 na itinuturing na wasted o severely wasted.

Dagdag ni Sec. Angara, higit pa sa pagtugon sa gutom ang layunin ng programa dahil nilalayon din nitong suportahan ang kahandaan sa pag-aaral at mapanatili ang pagpasok ng mga estudyante sa paaralan.

Walang binabantayang direktang banta kaugnay ng pagho-host ng Pilipinas sa Association of Southeast Asian Nations Summit ngayong taon.

Sinabi ni ASEAN NOC Deputy Director General for Operations Potenciano Camba na ipinatutupad ang isang “whole of government” approach upang matiyak ang matagumpay na pagho-host ng bansa, kabilang ang pakikilahok ng mga law enforcement agency at security forces.

Ayon kay Camba, ang Philippine National Police, na susuportahan ng Armed Forces of the Philippines, ang mangangasiwa sa seguridad ng mga ministerial meetings, habang ang Department of National Defense at ang AFP ang magiging pangunahing responsable sa seguridad ng mga lider sa panahon ng leaders’ summit.

Nang tanungin tungkol sa posibleng pag-usbong ng mga “political protesters” kaugnay ng mga isyung panloob ng bansa habang isinasagawa ang mga summit, sinabi ni ASEAN NOC Director-General for Operations Ma. Hellen De la Vega na kanilang pakikinggan ang hinaing ng mga magpo-protesta dahil ang Pilipinas ay isang demokratikong bansa.

Binanggit din ni De la Vega na ang mga local government unit ay kabilang din sa mga paghahanda at operasyon, at marami ring youth volunteers ang tutulong sa pagsasagawa ng pagho-host ng Pilipinas sa ASEAN 2026.

Posibleng itaas sa 45 piso kada kilo ang maximum suggested retail price o MRP sa imported rice sa susunod na linggo.

Ayon kay Department of Agriculture Secretary Francisco Tiu Laurel Jr., kasunod ito ng nakaumang pagtaas ng rice tariffs sa 20 percent.

Ide-deklara anya ang pinal na desisyon sa Enero a-kinse, at nakadepende ang magiging presyo sa galaw ng exchange rate at presyo ng bigas sa international market.

Tiniyak ni Sec. Laurel na patuloy nilang binabantayan ang mga factor na makaaapekto sa presyo upang maprotektahan ang mga mamimili habang sinisiguro ang sapat na supply ng bigas sa bansa.

Siniguro ng Department of Agriculture na mayroon silang pangmatagalang plano para sa food security ng bansa.

Ayon kay Agriculture Secretary Francisco Tiu Laurel Jr., mahalaga ang digitalization sa pangmatagalang plano ng ahensya para sa food security ng bansa.

Ibinahagi ni Sec. Laurel na matatapos na ngayong buwan ang command center ng DA na magsisilbing sentro ng datos, katuwang nila ang Philippine Statistics Authority, upang maging mas maayos na mapamahalaan ang supply at produksyon ng pagkain.

Binigyang-diin ng kalihim na natukoy na rin ng ahensya ang tamang balanse sa importasyon at lokal na produksyon ng bigas, at iginiit na hindi dapat mag-over import upang maprotektahan ang presyo ng palay ng mga magsasaka.

Pinag-aaralan pa ng Office of the Ombudsman ang tamang proseso sa pagbubukas ng tinaguriang “Cabral files” upang matiyak na magiging maayos at walang magiging isyu sa pagbubukas nito.

Naniniwala si Ombudsman Jesus Crispin Remulla na ang tanging makapagpapatunay sa mga dokumento ay ang computer na hawak ng kanilang tanggapan, at hindi sapat ang pahayag ng sinumang nagsasabing alam nila ang laman nito.

Dagdag pa ni Ombudsman Remulla, delikado ang paglalabas ng mga dokumentong hindi pa beripikado, lalo na kung nagmula aniya ito sa taong namatay na.

Dahil dito, nakatakda siyang makipagpulong kina Public Works Secretary Vince Dizon at Commission on Audit Chairperson Gamaliel Cordoba upang talakayin ang prosesong posibleng sundin sa pagbubukas ng files.

Nabatid na itinurn-over ng Department of Public Works and Highways sa Ombudsman ang “Cabral files.”

Ibinasura ng International Criminal Court ang hirit ni dating Pangulong Rodrigo Duterte para sa karagdagang ulat ng mga eksperto tungkol sa kanyang kalusugan at pag-iisip.

Sinabi ng ICC Pre-Trial Chamber 1 na ang isang panel na binubuo ng tatlong independent experts ay nagsumite na ng pinagsama at kani-kanilang mga report noong December 2025 upang matukoy ang kakayahan ni Duterte na lumahok sa mga pre-trial proceedings.

Ayon sa chamber, ganap nang naipaliwanag ng mga nasabing report ang mga factor sa ilalim ng Article 58(1)(b) ng Rome Statute, kabilang ang risk of flight, witness interference, o iba pang krimen, at ang paghingi ng panibagong report ay kalabisan na sa mandato ng mga eksperto.

Ang Article 58(1)(b) ng Rome Statute ng ICC ay naglalahad ng kapangyarihan ng Pre-Trial Chamber na maglabas ng mga warrant of arrest o summons kung mayroong makatwirang batayan upang mapatunayan na ang isang tao ay nakagawa ng mga krimeng saklaw ng hurisdiksiyon ng ICC.

Pinaghahandaan na ng probinsya ng Albay ang posibleng full-scale eruption ng Bulkang Mayon, at ang magiging epekto nito sa mga residente.

Ayon kay Albay Governor Noel Rosal, inihahanda na nila ang mga maaaring gawin sakaling lalo pang lumakas ang pag-alburuto ng bulkan, kabilang ang mas malawak na evacuation.

Sa kasalukuyan, halos tatlong libo katao na ang inisyal na nailikas, ngunit posible itong umabot sa pitumpung libo kung lalong lumala ang sitwasyon at itaas ang alert level status.

Kaugnay nito, binigyang-diin din ng gobernador ang pangangailangan ng sapat na tulong mula sa national government, lalo na sa supply ng pagkain at mahahalagang suplay na kakailanganin ng mga apektadong residente, lalo na kung tumagal pa ang nasusubaybayang aktibidad ng bulkan.

Maliban dito, naghahanap na rin ang probinsya ng tamang lugar upang maging permanenteng lilipatan ng mga residenteng patuloy na naninirahan sa loob ng 6-kilometer permanent danger zone.

Sa gitna ng mga tanong hinggil sa paggamit ng unprogrammed appropriations, nilinaw ng Malacañang na may malinaw na papel ang Kongreso sa pagbabantay sa paggugulan ng naturang pondo.

Ayon kay Palace Press Officer Undersecretary Claire Castro, bahagi ng oversight function ng Kongreso ang pagsusuri sa paglalaan at pagre-release ng unprogrammed appropriation, lalo na kung ito ay para sa mga hindi inaasahang gastusin o kung may nakikitang posibleng anomalya.

Sinabi rin ni Usec. Castro na bukas si Pangulong Ferdinand Marcos Jr. sa ganitong uri ng pagsusuri, dahilan kung bakit may tinatawag na conditional implementation sa paggamit ng nasabing pondo.

Giit pa ng palace official, malinaw ang paninindigan ng Pangulo na hindi dapat magamit sa pansariling interes ang pondo ng bayan at dapat itong ilaan lamang kung tunay na kinakailangan.

Dagdag ni Usec. Castro, tatlo lamang ang pangunahing pinaglalaanan ng unprogrammed appropriations sa 2026, kabilang ang suporta sa foreign-assisted projects, ang revised AFP modernization program, at ang risk management program na nakatuon sa kahandaan sa mga emergency at hindi inaasahang sitwasyon.a

Bagamat matagal nang hindi pumapasok sa Senado, kinumpirma ni Senador Imee Marcos na nagtatrabaho pa rin si Senador Ronald “Bato” dela Rosa.

Ayon kay Senador Marcos, patuloy na nakakakapirma si Senador dela Rosa ng mga mahahalagang dokumentong dapat nitong lagdaan.

Nanindigan din si Senador Marcos na medyo hindi tama ang sinasabing “no work, no pay” dapat ang mga senador na hindi pumapasok sa trabaho.

Nabatid na mula pa noong Nobyembre, hindi na dumadalo sa sesyon sa Senado si Sen. dela Rosa mula nang maiulat ang sinasabing inilabas na arrest warrant ng International Criminal Court laban sa kanya.

Giit ni Senador Marcos, kung totoo man ang sinasabing warrant of arrest, dapat na itong agarang ilabas.

Maaaring ilipat ang government contractor na si Sarah Discaya sa National Bureau of Investigation detention sakaling maaprubahan ang kanyang inihain na mosyon para mailagay sa kanilang kustodiya.

Ayon kay NBI Director Angelito Magno, maaaring ilipat sa Building 14 ng Maximum Security Compound sa Muntinlupa City ang contractor, sa oras na magkaroon na ng court order sa kanyang mosyon.

Nabatid na may dalawampu’t siyam na selda sa naturang pasilidad at naa-access lamang sa New Bilibid Prison main road, malapit sa Bureau of Corrections Museum.

Sa ngayon, nakakulong si Discaya, kasama ang walong kapwa akusado sa kasong graft at malversation of public funds sa Lapu-Lapu City Jail sa Cebu.