NATIONAL NEWS

Pinaghahandaan na ng iba’t ibang grupo ang panibagong kilos-protesta sa EDSA upang ipagdiwang ang ika-apatnapung anibersaryo ng EDSA People Power Revolution na gaganapin sa susunod na buwan.

Ito’y kaugnay sa pagtutol hinggil sa katiwalian sa flood control projects at iba pang proyekto.

Ayon kay Kilusang Mayo Uno Chairman Jerome Adonis, nananatili ang panawagan na managot at magsalita ang lahat ng sangkot, kabilang sina Pangulong Ferdinand Marcos Jr., Vice President Sara Duterte, at iba pang opisyal ng pamahalaan, upang magbigay-linaw sa mga isyung kinakaharap ng bansa.

Mahalagang magsimula anya ang mas malawak na talakayan ng mga Pilipino hinggil sa posibleng alternatibo sa umiiral na sistema ng pamahalaan.

Dahil dito, isinusulong ng grupo ang diskusyon hinggil sa pagbuo ng isang transitional council na pamumunuan ng mga sibilyan at kinatawan ng iba’t ibang sektor ng lipunan.

Kabilang anya sa mga mungkahing reporma ay ang pagtaas ng sahod, pagpapababa ng presyo ng mga bilihin, pagpapanagot sa mga tiwaling opisyal, pagsusulong ng hybrid elections, at pagpapatibay ng isang tunay na anti-political dynasty bill.

Ibinunyag ng pamahalaan na na-detect na sa Pilipinas ang kumakalat na super flu cases sa United Kingdom at Estados Unidos.

Gayunpaman, ayon sa Department of Health, recovered o gumaling na ang labimpitong kaso nito na naitala sa bansa, partikular sa Metro Manila.

Ayon kay Health Secretary Ted Herbosa, hindi ito dapat magdulot ng pagkabahala sa publiko.

Sa kabila nito, at dahil mayroong bagong variant ng super flu na ito, nagpapaalala ang kalihim sa mga Pilipinong tutungo sa Britanya at Amerika na maging maalam na mayroong kumakalat na super flu doon, at mainam kung magpaturuk ng Northern Hemisphere vaccine.

Makakasuhan na sa susunod na linggo, Enero 15, ang ilang senador at kongresista na kabilang sa mga nasasangkot sa flood control anomalies.

Ito, ayon kay Senator Imee Marcos, ang impormasyong nakarating sa kanya, at sinasabi rin niyang kumpleto na ang ebidensya at puwede nang isampa sa korte.

Ayon kay Sen. Marcos, mayroon nang draft ng kaso laban kina Senador Jinggoy Estrada at Joel Villanueva; dating Senador Ramon “Bong” Revilla; at sina Congressmen Edwin Gardiola at Eric Yap.

Wala naman anyang nakalap na direct evidence laban kina Senador Chiz Escudero at Mark Villar; at mga dating senador na sina Grace Poe at kasalukuyang Makati Mayor Nancy Binay.

Kinuwestiyon din ni Senator Marcos kung bakit Senado ang napuntirya sa mga kaso, gayong ang sangkot sa anomalya ay nasa Kamara.

Lumampas na rin anya sa target ng Independent Commission for Infrastructure o ICI na may makakasuhan pagsapit ng Disyembre a-kinse, at balita niya ay bubuwagin na ang nasabing komisyon sa Pebrero a-primerong dahil na rin anya sa pagbibitiw ng mga miyembro nito.

Isinusulong sa Senado ang Senate Bill Number 1074, o Overseas Filipino Worker Protection Act, na naglalayong bawasan ng 50% ang remittance fees para sa mga overseas Filipino workers.

Ayon kay Senador Jinggoy Estrada, na naghain ng naturang panukala, isa itong mahalagang hakbang upang maprotektahan ang pinaghirapang kita ng mga OFW laban sa labis na singil, hindi patas na gawain, at pinansyal na pagsasamantala.

Bilang insentibo, maaaring mag-claim ng tax deduction sa operational costs ang mga bangko at remittance centers kapalit ng pagpapatupad ng limampung-porsiyentong diskwento sa remittance fees.

Sa paghahain niya ng naturang panukala, binigyang-diin ni Sen. Estrada na umabot sa record-breaking na 38.34 billion US dollars ang OFW remittances noong 2024, tatlong porsiyentong mas mataas kumpara noong 2023; katumbas anya ito ng 8.3% ng gross domestic product at 7.4% ng gross national income ng bansa.

Para sa proteksiyon ng mga nagpapadala, mahigpit ding ipinagbabawal ang misappropriation ng pondo, hindi otorisadong bawas, labis na singil, at anumang pagtaas ng bayarin nang walang paunang konsultasyon sa pamahalaan.

Ang mga lalabag ay maaaring parusahan ng hanggang anim na taong pagkakakulong, multa mula 50,000 hanggang 750,000 pesos, at karagdagang parusa sa ilalim ng umiiral na mga batas sa pagbabangko.

Umakyat sa record-high na ₱17.65 trilyon ang kabuuang utang ng pamahalaan sa pagtatapos ng November 2025.

Ayon sa Bureau of the Treasury, mas mataas ito ng ₱85.84 bilyon kumpara nitong October 2025 dahil sa net issuance ng parehong domestic at external debt.

Sa kabuuang utang ng bansa, mula sa domestic sources ang ₱12.12 trilyon o 68.66%, habang ₱5.5 trilyon o 31.34% naman ang external o utang sa labas ng bansa.

Iginiit ng ahensya na patuloy nitong binabantayan ang debt levels upang masiguro ang maayos na pamamahala sa pananalapi ng pamahalaan at mapanatili ang kakayahang magbayad ng bansa.

Bahagyang bumaba sa 4.4% ang unemployment rate o antas ng kawalan ng trabaho sa bansa noong Nobyembre 2025.

Ayon sa Philippine Statistics Authority, katumbas ito ng humigit-kumulang 2.25 milyong Pilipino na walang trabaho.

Mas mababa ito kumpara sa 5.0% na unemployment rate na naitala noong October 2025.

Samantala, ang employment rate o antas ng may trabaho noong November 2025 ay tinatayang nasa 95.6%.

Mas mababa ito kumpara sa 96.8% noong November 2024, ngunit mas mataas naman kaysa sa 95.0% na naitala noong October 2025.

Patuloy namang sinusubaybayan ng PSA ang kalagayan ng labor market upang matukoy ang mga hamon at pagkakataon sa sektor ng paggawa.

Bumaba ang bilang ng mga mag-aaral na hirap sa pagbasa sa mga pampublikong paaralan mula nang magsimula ang kasalukuyang school year.

Ayon sa Department of Education, malaking tulong dito ang pagpapatupad ng Academic Recovery and Accessible Learning o ARAL Program, batay sa mid-school year assessments na may 96% submission rate nitong Enero 5.

Batay sa datos ng DepEd, tumaas sa limang puntos ang average reading readiness ng mga mag-aaral sa Grades 3 hanggang 6, habang mas mataas naman ang naitalang pag-angat sa anim hanggang siyam na puntos sa Grades 7 hanggang 10.

Dahil dito, tinatayang 3.42 milyong mag-aaral sa elementarya at 1.72 milyon sa junior high school ang mas lumapit sa angkop na antas ng kasanayan sa pagbasa.

Iniuugnay ni Education Secretary Sonny Angara ang positibong resulta sa mas structured remediation, tutok na tutorial sessions, at regular na monitoring ng mga mag-aaral sa ilalim ng ARAL Program.

Inaasahang matatapos ng Department of Health sa kalagitnaan ng Pebrero ang mga bagong patakaran para sa Medical Assistance to Indigent and Financially Incapacitated Patients (MAIFIP).

Ayon kay Health Secretary Teodoro Herbosa, susundin muna ng DOH ang umiiral na 2025 rules habang binubuo ang updated guidelines para sa taong ito.

Iginiit ng kalihim na hindi na kailangang ng mga pasyenteng nagpapagamot sa mga ospital ng kanilang kagawaran ang guarantee letter mula sa mga pulitiko, maliban lamang sa ilang pribadong ospital na may memorandum of agreement.

Ang anumang kasulatan anya mula sa pulitiko ay personal nilang pananagutan at hindi babayaran ng pamahalaan.

Kinumpirma ni Manila Mayor Francisco Domagoso na ligtas gamitin ang mga pangunahing tulay sa Maynila para sa Traslacion ng Poong Nazareno bukas, Enero 9.

Ito’y matapos maglabas ng safety certification ang Department of Public Works and Highways nang humingi ang lungsod ng assessment dahil sa inaasahang pagdagsa ng daan-daang libong deboto sa prusisyon.

Ayon sa DPWH–National Capital Region, sinuri sa ilalim ng 2025 Road and Bridge Inventory and Assessment ang Quezon Bridge, Carlos Palanca Bridge, Ayala Bridge, at Arlegui Bridge 1.

Batay sa pagsusuri, binigyan ng rating na “fair,” na nangangahulugang nananatiling matibay at maaaring gamitin nang ligtas.

Dagdag pa ng DPWH, maayos ang mga railings at barricades at walang nakitang sagabal sa mga daanan ng tao.