NATIONAL NEWS

Naniniwala ang Makabayan bloc sa Kamara na garantisado pa rin ang korapsyon sa ilalim ng nilagdaang 2026 national budget ni Pangulong Ferdinand Marcos Jr.

Ito’y kahit i-veto ng Pangulo ang 92.5 billion pesos na halaga ng unprogrammed appropriations sa pambansang pondo.

Ayon sa grupo, nagtataguyod pa rin sa pork barrel system, patronage politics, at systemic corruption sa pamahalaan ang pinirmahang budget.

Giit ng mga mambabatas sa Makabayan, pampalubag-loob lamang ng Pangulo ang pag-veto sa bilyong pisong U-A funds at paglihi sa bilyong pisong pork barrel funds dahil hindi na-veto ang allocables sa Department of Public Works and Highways.

Tinanggal na ng Land Transportation Office ang registration fee para sa mga custom-made motorcycle top box at saddle bag upang mabawasan ang gastos ng mga rider na naghahanap-buhay gamit ang motorsiklo.

Alinsunod ito sa direktiba ni Pangulong Ferdinand Marcos Jr. at Acting Transportation Secretary Giovanni Lopez na bawasan ang pasanin ng mga rider, lalo na ang mga nasa delivery services at iba pang manggagawang gumagamit ng motorsiklo sa trabaho.

Ayon kay LTO Chief, Assistant Secretary Markus Lacanilao, itinigil na nila ang paniningil ng 100-peso registration fee para sa bawat top box o saddle bag.

Bahagi anya ito ng polisiya ng 7-point reform agenda ng LTO na layong alisin ang hindi kailangang gastos habang pinananatili ang mga pamantayan sa kaligtasan sa kalsada.

Bagaman tinanggal ang bayad, nilinaw ng ahensya na nananatiling mandatory ang registration ng lahat ng custom-made motorcycle accessories upang masuri ang roadworthiness, kaligtasan, at pagsunod sa mga pamantayan ng ahensya.

Kumpiyansa ang Department of Economy, Planning, and Development o DEPDev na walang magiging epekto sa ekonomiya ng Pilipinas ang umiigting na alitan sa pagitan ng Estados Unidos at Venezuela.

Ayon kay DEPDev Secretary Arsenio Balisacan, walang inaasahang kapansin-pansing epekto ang nasabing tensyon at hindi ito makagugulo sa kalakalan at kabuuang takbo ng ekonomiya ng bansa.

Iginiit din ng kalihim na nananatiling matatag ang lokal na ekonomiya sa kabila ng mga pandaigdigang tensyon.

Nauna nang nagpahayag ng pag-aalala ang Department of Foreign Affairs sa tumitinding sigalot at nanawagan sa Amerika at Venezuela na igalang ang international law at ibalik ang kapayapaan.

Nanawagan si dating Ilocos Sur Governor Luis “Chavit” Singson sa publiko, lalo na sa mga religious organizations at kabataan, na lumahok sa ikinakasa niyang “one time, big time” rally laban sa korapsyon.

Ayon kay Singson, nais niyang idaos agad ang kilos-protesta at magmartsa patungong Malacañang.

Wala pa namang ibinigay na petsa ang dating gobernador kung kailan idaraos ang nasabing kilos-protesta, ngunit bukas siyang idaos ito sa Pebrero, kasabay ng paggunita sa anibersaryo ng EDSA People Power Revolution.

Binigyang-diin pa ni Singson ang mahalagang papel ng kabataan sa pagkilos kaya’t nais niyang ang mga kabataan ang magtakda ng petsa at manguna sa naturang panawagan.

Tinabla ng Malacañang ang hamon ni dating Ilocos Sur Governor Chavit Singson kay Pangulong Ferdinand Marcos Jr. na makipag-debate hinggil sa sinasabing korapsyon sa pamahalaan.

Ayon kay Palace Press Officer Undersecretary Claire Castro, hindi debate ang solusyon sa korupsiyon kundi ang aktwal na imbestigasyon at pagpapanagot sa mga umaabuso sa kaban ng bayan na kasalukuyan na anyang ipinatutupad ng pamahalaang Marcos.

Giit pa ni Usec. Castro, malinaw ang direktiba ng Pangulo na iimbestigahan at walang sinumang poprotektahan sa lahat ng maanomalyang proyekto, kabilang ang flood control projects.

Nanindigan din si Castro na hindi nagpapakabayani si Pangulong Marcos kundi tinutupad lamang ang kanyang obligasyon na linisin ang pamahalaan at ipagtanggol ang interes ng mamamayan.

Aniya pa, kailangan ng bansa ang tunay na good governance na kumikilos at hindi ang mga pahayag na nakatuon lamang sa pagpapapansin sa media.

Binigyan ng palugit ng Department of Justice si dating Ako Bicol Party-list Rep. Elizaldy Co hanggang sa Enero a-kinse para magsumite ng counter-affidavit sa kasong plunder na inihain laban sa kanya.

Ayon kay Justice Spokesman Polo Martinez, binigyan ng palugit si Co upang sagutin ang reklamo dahil walang dumalong abogado para sa kanya sa preliminary investigation kahapon.

Nabatid na ito ang unang kasong plunder na inihain ng National Bureau of Investigation sa DOJ laban sa dating kongresista habang may isa pa siyang kasong kasalukuyang iniimbestigahan.

Maliban dito, nauna na ring naglabas ng warrant of arrest laban kay Co at sa labing pitong iba pa sa kasong malversation na nagkakahalaga ng 289.5 million pesos kaugnay ng maanomalyang flood control project sa Mindoro.

 Bumaba ng dalawampu’t walong porsyento ang mga naitalang sunog dulot ng paputok sa pagsalubong sa Bagong Taon.

Ito ang inihayag ng Bureau of Fire Protection matapos nitong isapubliko ang datos nito sa pagtatapos ng Kapaskuhan.

Ayon pa kay BFP spokesperson Fire Superintendent Anthony Arroyo, umabot lang sa nasa 349,000 pesos ang halaga ng pinsala sa ari-arian sa 2025 December holiday season, o 99.42 percent na mas mababa kaysa naitalang mahigit 60 million pesos noong 2024.

Dagdag pa ni Arroyo, malaki ang naging epekto ng pagdidisiplina ng publiko sa nagdaang Pasko at Bagong Taon, maging sa kooperasyon ng mga ahensya ng pamahalaan upang mapababa ang mga insidente ng sunog sa nakalipas na holiday season.

Pinag-aaralan na ng Philippine National Police ang pagpapalawak sa implementasyon ng batas laban sa mga motorsiklong gumagamit ng open pipe at ilegal na modified muffler o tambutso.

Ayon kay Acting PNP Chief Lieutenant General Jose Melencio Nartatez Junior, layon nitong maisulong ang disiplina sa kalsada sa hanay ng mga rider, at inatasan na niya ang Highway Patrol Group at lahat ng regional offices na mahigpit na ipatupad ang umiiral na batas at lokal na ordinansa laban sa mga ilegal na modification ng mga sasakyan.

Tiniyak naman ng PNP na magiging pantay-pantay ang pagpapatupad ng kampanya laban sa maiingay na tambutso upang maiwasan anya ang “selective enforcement.”

Matatandaang sa pagdiriwang ng Bagong Taon, pinaigting ng National Capital Region Police Office ang operasyon laban sa mga indibidwal na gumagamit ng open pipe at modified muffler para maiwasan ang labis na ingay, mapanatili ang kaayusan ng publiko, at matiyak ang mapayapang selebrasyon sa mga residential na komunidad.

Sa kabila nito, iginiit ni Lt. Gen. Nartatez na hindi anti-rider ang naturang kampanya at hindi simpleng isyu ang paggamit ng maiingay na tambutso dahil direkta nitong naaapektuhan ang kaligtasan ng publiko, kaayusan ng komunidad, at usapin ng noise pollution, lalo na sa mga residential area.

Pinawi ni Pangulong Ferdinand Marcos Jr ang pangamba ng publiko hinggil sa pambansang budget at nangakong mas paiigtingin ang pananagutan sa paggastos.

Ayon kay Pangulong Marcos, naririnig ng administrasyon ang tinig ng taumbayan at kaisa sila sa hangaring matiyak na bawat piso ay napupunta sa tamang proyekto.

Binigyang-diin ng Pangulo na mas magiging masinop, maingat, at responsable ang pamahalaan sa paggamit ng pondo ng bayan sa 2026.

Dadaan anya sa masusing pagsusuri ang bawat programa upang masiguro ang malinaw at direktang benepisyo sa mamamayan.

Hinikayat din ng Pangulo ang publiko na makilahok sa pagbabantay at pagpapatibay ng demokrasya para sa isang bagong Pilipinas.

Itinuturing na pangunahing pang-akit ng turismo ng Pilipinas sa 2026 ang Palawan, matapos itong mapasama sa listahan ng mga “best destinations” ng mga international travel guide na Business Traveller at Frommers.

Ayon sa Business Traveller, muling sumisigla ang island-hopping sa Palawan dahil sa mga limestone cliffs, jungle coves, at likas na ganda ng mga isla nito, na naglagay sa Pilipinas bilang nag-iisang Southeast Asian destination sa kanilang talaan.

Malaki rin ang papel ng tinatawag na “set-jetting” tourism, matapos piliin ang Palawan bilang shooting location ng pelikulang The Last Resort na ipapalabas sa Pebrero.

Ayon sa Expedia at Frommers, ang pelikula ay nagbigay ng “Hollywood spotlight” sa probinsya, na inaasahang hihikayat ng mas maraming dayuhang turista. —Sa panulat ni Jordan Gutierrez