NATIONAL NEWS

Iginiit ni Education Secretary Sonny Angara na patuloy ang kanilang paghahain ng reklamo laban sa mga sangkot sa tinatawag na “ghost students” sa Senior High School voucher program.

Ayon kay Secretary Angara, may ilang reklamo nang naisampa ang DepEd noong nakaraang taon, habang labindalawa pang kaso ang kasalukuyang iniimbestigahan at nakaumang nang sampahan ng reklamo.

Bilang hakbang para maiwasan ang pag-abuso, binago na ng kagawaran ang sistema ng pagbabayad ng nasabing voucher, kung saan hindi ina-advance ang pondo sa mga paaralan, at mahigpit na sinusuri kung talagang naka-enroll at pumapasok ang mga benepisyaryo.

Binigyang-diin ni Secretary Angara na layon ng paghihigpit na tiyakin na napupunta lamang sa lehitimong mag-aaral ang pondo ng pamahalaan at mapanagot ang mga sangkot sa anomalya.

Una nang sinita ng Commission on Audit ang DepEd dahil sa overpayments na natuklasan sa nasabing programa mula taong 2022 hanggang 2024.

Muling nanindigan ang Malakanyang na hindi makikialam si Pangulong Ferdinand Marcos Jr. sa anumang hakbang para magsampa o mag-endorso ng impeachment complaint laban kay Vice President Sara Duterte.

Ayon kay Palace Press Officer Undersecretary Claire Castro, walang napag-uusapan sa loob ng administrasyon tungkol sa impeachment, at hindi ito pinakikialaman ng Pangulo dahil nasa kapangyarihan ito ng Kongreso.

Gayunman, malinaw anya ang paninindigan ng Pangulo na dapat managot ang sinumang may pananagutan.

Aniya, hindi rin maaaring ituring na “failure” ang inihain na impeachment laban sa Bise Presidente noong 2025, dahil may nakabinbin pa itong kaso sa Korte Suprema.

Walang napag-uusapan ang Malakanyang na panibagong revamp sa gabinete ni Pangulong Ferdinand Marcos Jr.

Ayon kay Palace Press Officer Usec. Claire Castro, sa ngayon, walang naipaparating sa kanya tungkol sa anumang pagbabago sa cabinet members.

Pero, pagkukumpirma ng opisyal, nagpapatuloy pa rin ang performance review ni Pangulong Marcos sa mga opisyal ng gobyerno.

Aniya, naka-depende na sa Pangulo kung makukuntento ito sa trabaho ng kanyang gabinete.

Magugunitang kabilang sa mga muling umuugong na rigodon sa siyam na ahensya tulad ng Department of Health, Tourism, Transportation, Foreign Affairs, Bureau of Customs, Education, at Public Works and Highways.

Kinumpirma ni Consul Judy Razon ng Philippine Embassy sa Colombia na wala pang Pilipino sa Venezuela ang humihiling ng repatriation sa kabila ng tensyon sa nasabing bansa kasunod ng pag-aresto kay Venezuelan President Nicolas Maduro.

Ayon kay Razon, nananatiling maayos at ligtas ang kalagayan ng mga Pilipino roon, at wala ring humihingi ng tulong gaya ng relokasyon, paglikas, o pagdadala sa mga itinalagang safe zone at evacuation centers.

Gayunman, sinabi ng opisyal na patuloy na nakaantabay ang embahada at regular na naglalabas ng advisories para sa mga Pilipino sa Venezuela habang mino-monitor ang sitwasyon sa bansa.

Batay sa datos ng Philippine Embassy sa Colombia, mahigit pitumpung Pilipino sa Venezuela ang nagtatrabaho sa religious sector, habang ang iba ay seasonal workers.

Tinutukoy rin ng embahada kung may mga Pilipinong nasa oil industry na isa sa pangunahing sektor ng ekonomiya sa naturang bansa.

Bumilis pa sa 1.8% ang inflation rate sa bansa nitong Disyembre.

Batay ito sa pinaka-bagong datos na inilabas ng Philippine Statistics Authority (PSA).

Ang inflation rate noong Disyembre ay mas mabilis sa naitalang 1.5% noong Nobyembre pero nasa target forecast ng Bangko Sentral ng Pilipinas na 1.2 hanggang 2%.

Ayon kay PSA Undersecretary at National Statistician Dennis Mapa, bumilis ang food inflation sa 1.2% sa kasagsagan ng holiday season noong isang buwan mula sa 0.3% annual decline noong Nobyembre.

Bunsod anya ito ng mas mabilis na pagtaas ng presyo ng gulay at iba pang agriculture products.

Sa kabila nito, nakaranas ng mabagal annual decline ang bigas, na pangunahing pagkain ng mga Pilipino, sa 12.3% noong isang buwan kumpara sa 15.4% noong Nobyembre.

Pinag-aaralan na ng Land Transportation Office ang posibilidad na pakuhanin ng driver’s license ang mga nagmamaneho ng dalawa o tatlong gulong na electric vehicles.

Ayon kay LTO Chief, Assistant Secretary Markus Lacanilao, isyu ito sa kaligtasan, lalo na kung ang mga e-trike at e-bike ay ginagamit sa mga pangunahing kalsada.

Marami anya sa mga driver ng e-vehicles ay walang lisensya at hindi rehistrado sa L.T.O., kaya walang insurance ang sasakyan.

Mayroon na rin anyang mga pagkakataon na kapag may aksidente, hindi nakakukuha ng kompensasyon ang pasahero o ibang apektadong partido.

Plano rin ng ahensya na palawakin ang mga kalsadang ipagbabawal para sa e-trikes at e-bikes, kabilang ang Commonwealth Avenue sa Quezon City at Marcos Highway sa Eastern Metro Manila at Rizal.

Target ng Department of Health (DOH) na bakunahan kontra measles-rubella ang higit sampung milyong bata sa buong Pilipinas, kasunod ito ng pagtaas ng kaso ng tigdas sa bansa.

Nakapagtala ang DOH ng higit limang libong kaso ng measles-rubella noong Disyembre 2025, mas mataas nang twenty-nine percent kumpara noong 2024 at pito sa bawat sampung pasyenteng ito ay hindi bakunado.

Na-inspeksyon na rin ni Health Secretary Ted Herbosa ang 1.3 million doses na gagamitin sa Ligtas Tigdas Vaccination Campaign.

Layunin ng measles-rubella supplemental immunization activity na bakunahan ang mga bata edad anim na buwan hanggang limang taong gulang sa iba’t-ibang lugar sa Mindanao.

Nakatakdang simulan ang unang yugto ng vaccination sa Enero a – 19 sa Mindanao at magpapatuloy ito sa Visayas at Luzon.

Naniniwala ang Makabayan bloc sa Kamara na garantisado pa rin ang korapsyon sa ilalim ng nilagdaang 2026 national budget ni Pangulong Ferdinand Marcos Jr.

Ito’y kahit i-veto ng Pangulo ang 92.5 billion pesos na halaga ng unprogrammed appropriations sa pambansang pondo.

Ayon sa grupo, nagtataguyod pa rin sa pork barrel system, patronage politics, at systemic corruption sa pamahalaan ang pinirmahang budget.

Giit ng mga mambabatas sa Makabayan, pampalubag-loob lamang ng Pangulo ang pag-veto sa bilyong pisong U-A funds at paglihi sa bilyong pisong pork barrel funds dahil hindi na-veto ang allocables sa Department of Public Works and Highways.