NATIONAL NEWS

Inaasahang aabot sa apat hanggang labing-isang bagyo ang mabubuo o papasok sa Philippine Area of Responsibility sa pagitan ng Pebrero hanggang Hulyo ngayong taon.

Ito’y ayon sa climate outlook na ipinrisenta ni PAGASA Deputy Administrator for Research and Development Joseph Basconcillo sa nagdaang 192nd Climate Forum.

Batay sa outlook, inaasahang mahina lamang ang aktibidad ng mga bagyo ngayong buwan hanggang sa Abril, na posibleng magkaroon ng hanggang isang bagyo lamang sa kada buwan.

Samantala, posible naman itong tumaas pagdating ng Mayo at Hunyo kung kailan aasahan naman ang isa hanggang dalawang bagyo sa loob ng isang buwan.

Kinumpirma ng National Privacy Commission ang harassment at paninirang-puri bilang pangunahing kaso na may kinalaman sa online lending.

Ayon kay Atty. Jose Belarmino III, Deputy Commissioner ng NPC, ina-access ng mga online lending companies ang phonebook, photobook, at social media accounts ng mga nangungutang.

Tinatarget din anya ng mga kumpanya ang pamilya, ka-opisina, at kaibigan ng mga borrower sa pamamagitan ng text o post sa social media upang mapilitan itong magbayad.

Bukod sa patuloy na pagtawag at pag-text, may ilang pagkakataon din anya na ginagamit ng lenders ang mga kakilala ng borrower bilang guarantor nang walang pahintulot, na anya’y labag din sa batas.

Nanawagan si House Committee on Public Order and Safety Chairman at Manila Rep. Rolando Valeriano na patawan ng mas mabigat na parusa ang mga heinous crime laban sa mga kabataan.

Ayon kay Cong. Valeriano, nakababahala at karumal-dumal ang mga ulat ng matitinding karahasan tulad ng pagpatay at pang-aabuso sa mga menor de edad, kaya dapat nang ipataw anya ang parusang habambuhay na pagkakakulong nang walang parole o pardon.

Iginiit ng kongresista na bagama’t may parusang reclusion perpetua na ang mga ganitong uri ng krimen, dapat anyang repasuhin ang mga umiiral na batas upang masigurong mahigpit at tuluy-tuloy ang pagpapatupad ng mga parusa.

Binigyang-diin ni Cong. Valeriano na dapat din limitahan ang kapangyarihan ng pardon at clemency ng pangulo upang hindi ito maabuso at mabalewala ang makatarungang hatol ng korte.

Layon anya ng hakbang na mapalakas ang kakayahan ng estado na protektahan ang mga bata sa loob at labas ng tahanan at alisin ang lahat ng hadlang sa pagkamit ng hustisya.

Naniniwala si House Senior Deputy Minority Leader at Caloocan City Rep. Edgar Erice na advantage o pabor kay Pangulong Ferdinand Marcos Jr. ang maagang pagsasampa sa Kamara ng impeachment complaint.

Ayon kay Cong. Erice, kapag naaksiyunan na ng House Committee on Justice ang reklamo laban sa pangulo, hindi na muling makatatanggap ng anumang impeachment complaint sa buong taon si Pangulong Marcos, batay sa rules sa Kamara.

Sinabi ng kongresista na dapat nang magmadali ang iba pa na may planong mag-file ng impeachment complaint laban sa pangulo, kabilang ang Makabayan bloc na planong maghain din ng reklamo.

Iginiit ni Cong. Erice na hindi rin pwedeng pilitin si Pangulong Marcos na dumalo o humarap sa hearing ng House Committee on Justice bilang paggalang na rin sa posisyon nito bilang isa sa pinakamataas na opisyal sa bansa, pero maaari naman anyang ikunsidera na paharapin ang legal counsel ng pangulo.

Magpapatupad ang Department of Education ng “Build Now, Pay Later” sa ilalim ng public-private partnership (PPP), upang matugunan ang kakulangan ng 165,000 na silid-aralan.

Ayon kay Education Undersecretary for Strategic Management Ronald Mendoza, isasagawa ang proyekto sa ilalim ng phase three ng PPP for School Infrastructure Project (PSIP), at may pondo ito na umabot sa one hundred five point seven billion pesos.

Sa ilalim ng naturang proyekto, babayaran ng pamahalaan ang mga itatayong silid-aralan sa loob ng sampung taon matapos itong makumpleto at maipasa sa DepEd.

Layunin din ng PSIP na pabilisin ang pagtatayo ng mga silid-aralan habang pinatitibay ang pamamahala at pagbabantay sa mga proyekto sa imprastruktura ng edukasyon.

Target din ng DepEd na makapagtayo ng 105,000 na silid-aralan sa ilalim ng PPP.

Maliban sa unang 16,000 na silid-aralan, inaasahan ng ahensiya na may karagdagang higit 80,000 pa ang maitata­yo sa ilalim ng nasabing plano.

Ipatutupad ng Department of Agriculture ang contract farming upang masolusyunan ang mataas na presyo ng sili.

Ayon kay Agriculture Secretary Francisco Tiu Laurel Jr., bibigyan ng binhi ang mga magsasaka at may buy-back o kasiguruhan sa pagbili ng ani sa unang isa hanggang isa’t kalahating taon.

Target anya ng kagawaran na ilunsad ang naturang programa sa mga lalawigang malapit sa Metro Manila tulad ng Pampanga, Bataan, Rizal, Laguna, at Bulacan.

Nilinaw ni Sec. Laurel na inaasahang sisimulan ang pagtatanim ngayong tag-init, partikular sa Marso, kasabay ng pagbuo ng pondo at detalye ng programa.

Hindi tinanggap ng Office of the Secretary General ang ikalawang impeachment complaint na inihain ng iba’t ibang grupo at inendorso ng Makabayan bloc laban kay Pangulong Ferdinand Marcos Jr.

Ito’y dahil wala sa kaniyang opisina at nasa ibang bansa si House Secretary General Cheloy Garafil dahil sa nakatakdang award na kaniyang dadaluhan bilang pagkilala sa kaniyang naging serbisyo bilang dating MECO chairperson.

Ayon kay Atty. Jose Marmoi Salonga, ang executive director ng Office of the Secretary General, wala silang kapangyarihan o kakayahan na tumanggap at pumirma sa inihain na impeachment complaint na inihain ng 36 na complainant, kabilang na sina Bayan Muna President Renato Reyes; Bayan Muna Chairman Teddy Casiño; Liza Maza; at Atty. Neri Colmenares.

Ito ay inendorso ng Makabayan bloc, kabilang na sina ACT Teachers Party-list Rep. Antonio Tinio; Gabriela Women’s Party-list Rep. Sarah Elago; at Kabataan Party-list Rep. Renee Co, na sinuportahan ni dating Congresswoman France Castro.

Itinuturing ng grupo na kahit hindi natanggap o nalagdaan ang impeachment complaint ay naihain pa rin ito sa naturang tanggapan dahil nakasaad sa court rules na maaari pa ring maghain ng reklamo kahit wala ang Secretary General.

Bukod pa rito, nag-iwan rin sila ng kopya upang sakaling makauwi na ng bansa si SecGen. Garafil ay agad itong malalagdaan.

Nakapaloob sa impeachment complaint na inaakusahan si Pangulong Marcos ng pagtataksil sa tiwala ng bayan o ang betrayal of public trust.

Kasama rin dito ang sistematiko at malawakang plunder o pandarambong sa pondo ng bayan na tinawag na flood control projects corruption scandal mula taong 2022 hanggang 2025.

Bukod pa dito, nakapaloob din sa inihain na reklamo ang pag-abuso at paglobo sa unprogrammed appropriations at ang kickbacks ng Palasyo, kabilang na ang mahigit P545.6 billion na pondo na ginamit para sa flood control projects.

Naniniwala ang grupo na si Pangulong Marcos ang pinuno ng umano’y ng mga pet projects sa bansa.

Binanggit din sa inihain na reklamo ang P60 billion na pondong inilipat sa PhilHealth na idineklarang labag sa Konstitusyon ng Korte Suprema.

Iginiit ng grupo ang kanilang panawagan na mapanagot ang lahat ng sangkot sa pagnanakaw sa kaban ng bayan.

Nanatili ang Davao City bilang most congested city o pinaka-matraffic na lungsod sa Pilipinas.

Batay sa TomTom Traffic Index 2025, puwesto ang Davao City sa ika-labindalawa mula sa apatnapu’t-dalawang lungsod sa buong mundo.

Lumabas din sa index na ang Pilipinas ang pinaka-matraffic na bansa sa Asya, na may 45 percent na congestion level, na sinundan ng India at Singapore na parehong may 37 percent na congestion level.

Ayon sa 2025 TomTom Traffic Index, ang karaniwang antas ng traffic sa Davao City ay nasa 66.2 percent, na ika-apat mula sa pitumpu’t-limang lungsod sa Asya.

Nabatid na pumuwesto ring ikatlo mula sa limandaang lungsod ang Davao City sa 2024 TomTom Traffic Index.

Inaasahang aabot sa apat hanggang labing-isang bagyo ang mabubuo o papasok sa Philippine Area of Responsibility sa pagitan ng Pebrero hanggang Hulyo ngayong taon.

Ito’y ayon sa climate outlook na ipinrisenta ni PAGASA Deputy Administrator for Research and Development Joseph Basconcillo sa nagdaang 192nd Climate Forum.

Batay sa outlook, inaasahang mahina lamang ang aktibidad ng mga bagyo ngayong buwan hanggang sa Abril, na posibleng magkaroon ng hanggang isang bagyo lamang sa kada buwan.

Samantala, posible naman itong tumaas pagdating ng Mayo at Hunyo kung kailan aasahan naman ang isa hanggang dalawang bagyo sa loob ng isang buwan.