NATIONAL NEWS

Kinumpirma ng Cybercrime Investigation and Coordinating Center (CICC) ang malaking pagbaba ng text scams sa bansa noong nakaraang taon.

Batay sa datos ng CICC, mula sa mahigit 1.28-milyong kaso noong 2nd quarter ng 2024, bumagsak ito sa mahigit 65,000 na kaso sa parehong panahon ng taong 2025.

Katumbas ito ng halos 95% na pagbaba na itinuturing ng CICC na malaking tagumpay laban sa cybercrime.

Ayon sa CICC, nakatulong ang pagpapatupad ng SIM Registration Law sa pagbawas ng mga pekeng mensahe.

Gayunman, lumipat anila ang mga scammer sa social media at messaging apps na karaniwang modus ngayon ang pagpapadala ng phishing links na nagkukunwaring galing sa bangko o e-wallet.

Binigyang-diin ng CICC na dapat manatiling mapagmatyag ang publiko upang hindi mabiktima ng mga bagong uri ng online scam.

Tuloy-tuloy ang isinasagawang asphalt overlaying at concrete reblocking sa EDSA bilang bahagi ng rehabilitation program na iniutos ni Pangulong Ferdinand Marcos Jr.

Ayon sa Department of Public Works and Highways, nasa 31-percent na ang natatapos sa pagpapatuloy ng EDSA rehabilitation.

Target ng ahensya na mas pabilisin pa ang pagkukumpuni sa mga kalsada upang madaanan na agad ng mga motorista.

Inaabisuhan naman ng DPWH ang mga motorista na pansamantalang gumamit ng alternatibong ruta habang isinasagawa ang nasabing rehabilitasyon.

Posibleng gawing kulungan ng mga indibidwal na maaaring ma-convict sa flood control scandal ang Sablayan Penal Facility sa Mindoro.

Ito’y matapos tukuyin ni BuCor Chief Gregorio Catapang Jr. ang naturang pasilidad bilang paglalagyan ng mga serious-heinous crime offenders.

Aniya, nakatakdang matapos ang penal facility sa unang quarter ng taon at kung sakali’y maglalagay na rin ng pasilidad na para mismo sa mga sangkot sa flood control anomaly.

Isinusulong ni Senador Jinggoy Estrada ang pagpasa ng Senate Bill No. 1011 na nagtatakda ng mas mataas na pabuya para sa mga informant o tipster kontra sa mga hindi nagbabayad ng tamang buwis at customs duties.

Ayon kay Senador Estrada, mahalagang hakbang ang nasabing panukala upang mapalakas ang kampanya ng pamahalaan laban sa mga sangkot sa tax evasion at smuggling.

Layunin anya ng SBN 1011 na i-update ang umiiral na informer’s reward system na depektibo na dahil hindi nakatutulong sa mga whistleblower na magsumbong laban sa mga lumabag sa batas.

Iginiit ni Senador Estrada na hindi mae-engganyo ang mga tao na magsiwalat ng mga nalalaman nila kung hindi sila kayang bigyan ng kaukulang proteksyon ng batas at mataas na pabuya.

Sa kasalukuyang batas, aabot lamang hanggang isang milyong piso ang maaaring matanggap ng isang informer, gaano pa man kalaki ang kasong may kinalaman sa tax fraud o smuggling.

Binigyang-diin ni Senador Estrada na matagal nang humahadlang ang limitasyong ito sa paghihimok ng kooperasyon ng publiko.

Nakabinbin pa rin ang hiling ng National Bureau of Investigation o NBI sa International Criminal Police Organization o Interpol na ilagay sa Red Notice si dating Congressman Zaldy Co.

Ito’y sa harap ng arrest warrant na inilabas ng pamahalaan laban sa dating kongresista kaugnay sa maanomalyang flood control projects sa Oriental Mindoro.

Ayon kay NBI Spokesman Palmer Mallari, wala pa ring update kaugnay sa kanilang request pero na-follow-up na nila sa Interpol ang nasabing hirit na Red Notice laban kay Co.

Matatandaang ipinadala na ang Interpol Red Notice application nito noong November 23, 2025 sa pamamagitan ng Philippine Center for Transnational Crimes.

Sa ngayon, pinaniniwalaang nasa Portugal si Co.

Naniniwala si House Deputy Minority Leader Antonio Tinio na hindi lang magiging “numbers game” ang impeachment na inihain laban kay Pangulong Ferdinand Marcos Junior.

Sa kabila ito ng pagsuporta ng mayorya ng mga kongresista sa administrasyong Marcos.

Gayunman, umaasa pa rin si Tinio na daraan sa masusing proseso ang mga inihain na reklamo laban sa pangulo na isa sa naging batayan ang sinasabing korapsyon sa maanomalyang flood control projects, kung saan ito anya mismo ang nanguna.

Samantala, binuweltahan naman ng kinatawan ng ACT Teachers Partylist ang pahayag ni Senator Imee Marcos na isang “drama series” lamang ang impeachment laban sa pangulo.

Binigyang-diin ni Tinio na hindi “drama series” ang impeachment bagkus isang mahalagang usapin na tugon sa maraming katanungan ng mga Pilipino.

Kumpiyansa si House Assistant Majority Leader Zia Alonto Adiong na mas mananaig ang pagtupad ni House Majority Leader Sandro Marcos sa kanyang mandato at trabaho kumpara sa pagiging anak ng pangulo.

Kasunod ito ng mga pahayag na mainam na huwag nang lumahok ang nakababatang Marcos sa mga proseso sa sesyon ng plenaryo at pagdinig ng House Committee on Justice kaugnay sa nakahaing impeachment complaint laban sa kanyang ama na si Pangulong Ferdinand Marcos Jr.

Ayon kay Rep. Adiong, nasaksihan niya kung paano tutukan ni Rep. Marcos ang trabaho nito, gayundin ang puspusang pagsusulong sa mga mahahalagang panukala kaya’t tiwala siyang magagampanan ng presidential son ang kanyang mandato bilang mambabatas.

Ipinunto rin ni Rep. Adiong na isang boto lang naman si Rep. Marcos sakaling magpasya itong dumalo sa deliberasyon para sa impeachment complaint ng kanyang ama.

Tinukoy ng Department of Energy ang ilang lugar sa bansa na posibleng pagtayuan ng mga nuclear power plant.

Ayon kay Energy Director 4 Patrick Aquino, kabilang sa mga lugar na maaaring pagtayuan ang ilang bahagi ng Bataan, kasama ang kasalukuyang lokasyon ng Bataan Nuclear Power Plant.

Gayundin ang Labrador, Pangasinan; mga lugar sa Camarines Norte; Puerto Princesa, Palawan; at Masbate na napili matapos ang isinagawang physical inspection ng gobyerno.

Nabatid na target ng Pilipinas na magkaroon ng commercially operational nuclear power plants pagsapit ng 2032, na palalawakin pagsapit ng 2050.

Inihain na ang ikatlong impeachment complaint sa Office of the Secretary General.

Kabilang sa mga complainant ang dating Commissioner ng Presidential Anti-Corruption Commission Atty. Manuelito Luna; Atty. Ferdinand Topacio; dating Cong. Jing Paras; dating Cong. Mike Defensor; dating Ilocos Sur Gov. Chavit Singson; at dating AFP Chief of Staff Gen. Hermogenes Esperon Jr.

Hindi pa idinetalye kung sino ang endorser, pero binubuo ito ng tatlong kongresista.

Isa sa posibleng batayan ng reklamo ay ang betrayal of public trust at culpable violation of the Constitution.

Sa ngayon, wala pang kasiguruhan kung malalagdaan ang impeachment complaint dahil na rin sa wala sa kaniyang tanggapan si SecGen. Cheloy Garafil dahil sa nakatakdang paggawad sa kaniya ng award sa Taiwan.

Batay sa House Rules, bago makarating ang impeachment sa tanggapan ni House Speaker Faustino Dy III ay kailangan muna itong malagdaan ni SecGen. Garafil.