NATIONAL NEWS

Sinang-ayunan ng Metropolitan Manila Development Authority ang Department of Transportation sa pagtutol nito sa panukalang payagan ang carpooling sa EDSA Busway.

Kasunod ito ng isinusulong ni MMDA General Manager Nicolas Torre III bilang pagsugpo sa mabigat na daloy ng trapiko sa bansa.

Ayon sa DOTr, naaayon ang kanilang posisyon sa direktiba ni Pangulong Ferdinand Marcos Jr. na gawing commuter-centric ang mga proyektong pang-transportasyon at hindi car-centric.

Iginiit ni Transportation Undersecretary for Railways Timothy John Batan ang naunang pahayag ni Transportation Secretary Banoy Lopez na tutol ang ahensya sa carpooling sa EDSA Busway dahil ito ay idinisenyo upang makapaghahatid ng mas maraming pasahero sa pamamagitan ng isang mabilis at eksklusibong linya para sa mga bus.

Bilang suporta sa posisyon ng DOTr, sinabi ni MMDA Chairman Don Artes na inaral na ng ahensya noong 2018 ang posibilidad ng carpooling sa EDSA Busway ngunit lumitaw ang ilang isyu, kabilang ang high-occupancy requirements at ang posibleng pagdami ng mga kolorum na sasakyan.

Ayon pa kay Artes, tinatayang 300,000 pasahero kada araw ang nakikinabang sa mas mabilis na biyahe, na nagbibigay ng mas maraming oras para sa pamilya at mas produktibong paggamit ng oras.

—ulat mula kay Jenn Patrolla (Patrol 38)

Nagtayo ang Department of Social Welfare and Development (DSWD), sa pamamagitan ng Field Office 12–SOCCSKSARGEN, ng mga family tent bilang pansamantalang tirahan ng mga pamilyang lumikas matapos ang lindol na tumama sa Lebak at Kalamansig, Sultan Kudarat.

Ayon kay DSWD Assistant Secretary at Spokesperson Irene Dumlao, naglagay pa ng karagdagang mga tent sa Kalamansig upang matiyak ang kaligtasan at proteksyon ng mga internally displaced persons habang nasa evacuation centers.

Patuloy rin ang pamamahagi ng family food packs at ang pagbibigay ng technical assistance sa camp coordination at camp management upang mas maayos na mapatakbo ang mga evacuation center, lalo na para sa mga bata, senior citizens, kababaihan, at persons with disabilities.

Umabot na sa mahigit 12.5 milyong piso ang halaga ng tulong na naipamahagi ng DSWD sa mga pamilyang apektado ng lindol sa lalawigan.

Nanawagan din ang ahensya ng mga boluntaryo na tutulong sa disaster response, partikular sa repacking ng relief goods sa Visayas Disaster Resource Center sa Mandaue City, Cebu.

—ulat mula kay Jenn Patrolla (Patrol 38)

Hindi lang bilis kundi reliable at accessible internet sa Oplan Bantay Signal – Sen. Tulfo

Nagpahayag  si Senador Erwin Tulfo ng mariing suporta sa Oplan Bantay Signal ng Department of Information and Communications Technology (DICT), ngunit iginiit na ang layunin ng maayos na serbisyo ng internet ay dapat magtuon sa accessibility, lalo na sa mga kanayunan – at pagiging maaasahan, hindi lamang sa paghabol sa mataas na resulta ng mga speed test.

Ayon kay Tulfo, bagama’t mahalagang bahagi ang bilis ng internet, nararapat na bigyang pantay na diin ng DICT ang pangunahing pangangailangan ng publiko para sa tuloy-tuloy, maaasahan, at malawak na saklaw ng koneksyon.

Ipinaliwanag ng senador na madalas ituring ang bilis bilang pangunahing sukatan ng kalidad ng serbisyo, subalit kasinghalaga rin ang matatag na digital infrastructure at interoperable infostructure, dahil ang mga ito ang nagsisiguro ng matibay at mapagkakatiwalaang koneksyon sa oras ng pangangailangan.

Nilinaw ni Tulfo na ang infrastructure ay tumutukoy sa pisikal na digital assets tulad ng linya ng kuryente, cell towers, at fiber cables, habang ang infostructure naman ay ang information layer – kabilang ang datos, software, mga plataporma, at sistema – na nagbibigay-buhay at bisa sa mga pisikal na pasilidad na ito.

Binigyang-diin din ng senador na ang kalidad ng online services – na sinusukat sa accessibility, pagiging maaasahan, at pagpapanatili ng serbisyo ng mga broadband provider at operator – ay higit pa sa usapin ng bilis at susi sa efficient internet connectivity para sa mga Pilipino.

Dagdag pa ni Tulfo: “Bagama’t may pagsisikap ang industriya ng telco na pababain ang gastos sa internet services sa bansa, nararapat pa ring masusing suriin ang halaga ng internet, sapagkat sa panahong ito, ang internet ay maituturing nang isang batayang karapatang pantao na dapat abot-kaya ng bawat Pilipino.”

Ipinahayag din ng senador ang suporta sa pagsusuri kung paano maaaring pababain ang gastos sa internet sa pamamagitan ng subsidy sa kuryente, lalo’t kilala ang Pilipinas bilang isa sa may pinakamataas na singil sa kuryente sa Asya – isang sangkap na direktang nakaapekto sa data centers, internet services, at iba pang industriya.

Batay sa datos ng Philippine Institute for Development Studies (PIDS), umaabot sa humigit-kumulang 13 porsiyento ng buwanang kita ng mahihirap na pamilya ang ginagastos sa home internet connections, habang hanggang 7 porsiyento naman ng kita ng low-income households ang napupunta sa internet.

Itinampok din ni Tulfo ang a cessibility bilang mahalagang elemento sa pagsusuri ng kalidad ng internet service sa buong bansa.

Iniulat ng PIDS na ang kakulangan sa broadband infrastructure at serbisyo ay pinakamalala sa Bangsamoro Autonomous Region in Muslim Mindanao sa 41 porsiyento.

Sa Cordillera, nagiging hadlang ang mabundok na komunidad sa last-mile connectivity, dahilan upang maraming lugar ang walang Internet Service Provider (ISP). Sa Region IV-B, ang pagiging arkipelago ng rehiyon ay nagdudulot ng kawalan ng “complete presence” ng internet services. Limitado rin ang

Wi-Fi access sa mga liblib na rural areas sa iba’t ibang rehiyon.

Sa naunang pahayag, sumang-ayon si Stratbase Deputy Managing Director Orlando Oxales sa mga pananaw ni Tulfo, iginiit na ang kalidad ng serbisyo ay dapat nakatuon sa pagiging maaasahan at pagpapanatili, at hindi lamang sa mga speed-test figure.

“Maaaring ‘mabilis’ ang koneksyon ngunit nananatiling hindi maganda ang karanasan kung ito’y hindi matatag, madalas mag-buffer, o bumabagsak sa mga mataong lugar. Mas mahalaga sa mga gumagamit ang tuloy-tuloy na performance kaysa sa peak speed,” ayon kay Oxales.

Dagdag niya, kakaunti ang ebidensiyang nagpapakitang ang mahigpit na regulasyong nakatuon lamang sa speed targets ay tunay na nagpapabuti sa aktuwal na internet performance sa Pilipinas.

Binigyang-diin din ni Oxales na kasinghalaga ng bilis ang matitibay na network, backup power systems, mas maayos na capacity planning, at malinaw na komunikasyon tuwing may aberya.

Aniya, ang pangunahing layunin ng polisiya ay dapat protektahan ang mga konsyumer sa pamamagitan ng pagtiyak ng maaasahang internet service, sapagkat ang bilis ay isa lamang bahagi ng kabuuang karanasan sa serbisyo.

Nanawagan din siya ng makatotohanang pananaw sa digital infrastructure investments, at nagbabala na kapag pinatungan ng magastos na compliance ang sektor habang nananatili ang deployment hurdles, “dalawang beses nagbabayad ang publiko – sa mahinang serbisyo ngayon at sa mas mabagal na pag-unlad bukas.”

Para sa konteksto, ang South Korea ay may humigit-kumulang 1.5 milyong cell sites na binubuo ng macro at small cells, habang tinatayang 152,213 lamang ang pinagsamang macro at small cell sites ng Pilipinas noong 2021.

Sa kabila ng kakulangan sa imprastraktura, pangatlo sa buong mundo ang mga Pilipino sa pinakamabibigat gumamit ng internet, na may average na 8 oras at 52 minuto online kada araw.

Natanggap na ni House Speaker Faustino Dy the Third ang ikalawang impeachment complaint na inihan laban kay Pangulong Ferdinand Marcos Jr.

Ito ang kinumpirma ni House Deputy Minority Leader at ACT Teacher’s Partylist Rep. Antonio Tinio matapos itong mai-transmit ni House Secretary General Cheloy Garafil.

Matatandaang matapos maihain sa tanggapan ni SecGen. Garafil ay agad na nagtungo sa tanggapan ni Speaker Dy ang mga complainant at ang mga kinatawan ng Makabayan bloc para ipaalam sa lider ng Kamara ang kanilang inihain na reklamo.

Ayon kay Tinio, mismong si Speaker Dy ang nagsabi sa kanila na natanggap na nila ang ikalawang impeachment complaint ngayong araw.

Tiniyak anya sa kanila ni Speaker Dy na agad na maisasama sa order of business ang impeachment complaint para sa pagtalakay sa plenaryo ng Kamara.

Umaasa naman ang Makabayan bloc na gagampanan ng House Committee on Rules ang kanilang mandato na mai-refer sa House Committee on Justice ang naturang reklamo.

Una nang iginiit ng mga complainant at endorsers na layon ng kanilang hakbang na mapanagot ang lahat ng sangkot at mga kurakot na nagnakaw sa kaban ng bayan.

Naniniwala si Senate President Vicente “Tito” Sotto the Third na malapit nang matapos ng Senate Blue Ribbon Committee ang imbestigasyon nito sa mga maanomalyaang flood control projects.

Ayon kay SP Sotto, nasa isa hanggang dalawang pagdinig na lamang ay mabubuo na ng B-R-C ang kanilang committee report.

Muli ring iginiit ng lider ng Senado na ang isang committee report na hindi dumaan sa plenaryo ay isa lamang “basura o piece of paper” dahil kailangan mapag-usapan at ma-aprubahan muna ito sa Senate floor.

Sinagot naman ni SP Sotto ang komento ni Senador Rodante Marcoleta, patungkol sa inilabas nilang “minority report” kung saan nakapaloob ang kanilang mga puna at obserbasyon kaugnay sa imbestigasyon ng Blue Ribbon Committee sa flood control anomalies.

Mariing itinanggi ni Senador Rodante Marcoleta na nagsisilbi siya bilang abogado ng mag-asawang Curlee at Sara Discaya.

Ito ay matapos siyang mapuna na tinutulungan ang mag-asawa sa pagdinig ng Senate Blue Ribbon Committee kaugnay sa flood control scandal.

Iginiit ni Senador Marcoleta na kinukuwestyon lamang niya ang paggamit sa restitution bilang requirement ng D-O-J upang maisailalim sa Witness Protection Program o W-P-P ang isang indibidwal.

Nanindigan ang mambabatas na hindi kailangan ng restitution kapag nag-aapply pa lamang ang sa W-P-P, dahil magkakaroon lamang ng civil indemnity o bayad-pinsala kapag mayroon ng desisyon ang korte.

Binigyang diin ni Senador Marcoleta na maaaring pagmulan ng korapsyon ang pagpupumilit ng D-O-J na bayaranin ang mga personalidad na nais maging state witness dahil wala anya ito sa batas.

Nanindigan ang senador na ang WPP ay dapat para sa lahat ng mga kwalipikadong testigo na buong-loob na tutulong sa imbestigasyon ng gobyerno.

Nangunguna sa alalahanin ng mga Pilipino ang dagdag sahod para sa mga manggagawa.

Batay sa fourth quarter ng Tugon ng Masa survey ng OCTA Research,45% ng kabuuang bilang ng mga respondents ang nagsasabing dapat kumilos ang pamahalaan upang mapabuti o mapataas ang sahod ng mga manggagawa.

Pumangalawa naman ang pagkontrol sa pagtaas ng presyo ng mga pangunahing bilihin na may 41%, sumunod ang pagkakaroon ng abot-kayang pagkain tulad ng bigas, gulay, at karne na may 30%.

Kasama rin sa alalahanin ng mga adult Filipinos ang paglaban sa katiwalian at korapsyon ng pamahalaan na may 29%, at pagbibigay ng libre at dekalidad na edukasyon na may 28%.

Ayon sa OCTA, ang pagtaas ng nasabing bahagdan ay ang pinakamabilis na pag-angat nito mula noong March 2024.

Naniniwala si Senate Finance Committee Chairman Sherwin Gatchalian na malaki ang tyansa na maipasa ang anti-political dynasty bill sa ilalim ng administrasyon ni Pangulong Ferdinand Marcos Junior.

Ayon kay Senador Gatchalian, bagama’t inaasahan niyang magkakaroon ng malaking debate kaugnay sa magiging antas o anyo na sasaklawin ng political dynasty, malaki anya ang pagkakataon na maipasa ito.

Dagdag pa ni Senador Gatchalian, sa mahigit dalawampung taon niyang nasa politika, ngayon lamang niya nasaksihan na ang pangulo mismo ang nagsusulong na magkaroon na ng batas laban sa political dynasty.

Binatikos ng isang consumer group ang pahayag ng Department of Trade and Industry na hindi tumaas ang presyo ng siyam sa bawat sampung basic at prime commodities sa bansa.

Sa tala ng DTI, sa kabuuang 205 basic necessities at prime commodities, 186 o katumbas ng 91% ang walang pagbabago sa presyo.

Ngunit ayon kay Suki Network spokesperson Amihan Mabalay, taliwas sa sitwasyon sa merkado ang naturang pahayag dahil marami anyang produkto ang walang suggested retail price ngunit patuloy pa ring tumataas ang presyo.

Ipinunto ni Mabalay ang ilang brand ng sardinas, de-latang karne, instant noodles, kape, pati na rin ang mga sabon panglaba at toilet soap.

Lalo pa anyang pinapabigat ng value-added tax at excise tax sa produktong petrolyo ang gastusin ng mga mamimili.

Samantala, patuloy namang binabantayan ng consumer group ang galaw ng presyo ng mga pangunahing bilihin, lalo ngayong taon.

Itinutulak ni House Senior Deputy Minority Leader at Caloocan Rep. Edgar Erice sa Kamara ang House Bill No. 6625 o Healthy Food Environment Bill.

Ayon kay Congressman Erice, layon ng panukala na tugunan ang patuloy na pagdami ng lifestyle-related diseases sa bansa tulad ng obesity at diabetes.

Ipinunto ng kongresista ang kahalagahan ng food environment ng mga Pilipino mula sa komunidad at palengke hanggang sa mga paaralan at lugar ng trabaho upang mas maging madali ang pagpili ng masustansyang pagkain.

Sa ilalim anya ng panukala, magiging accessible at abot-kaya ang healthy food options kumpara sa mga unhealthy food, kasabay ng pagbibigay ng malinaw at tamang impormasyon sa nutrisyon, kabilang ang food labels at health warnings.

Binigyang-diin ni Congressman Erice na hindi lamang personal na pananagutan ang kalusugan kundi nangangailangan ito ng matibay na suporta sa sistema at sa pamahalaan.