NATIONAL NEWS

Suportado ni House Committee on Basic Education and Culture Chairman at Pasig City Rep. Roman Romulo ang panukalang pagpapatupad ng trimester system ng Department of Education sa mga pampublikong paaralan.

Ayon kay Congressman Romulo, maganda ang hangarin ng DepEd sa nasabing panukala lalo’t inaasahang mai-aangat nito ang kalidad ng edukasyon.

Gayunman, dapat ay may malinaw anyang pamantayan o guidelines ang kagawaran sa pagpapatupad ng trimester system.

Bukod dito, iginiit ng kongresista na dapat ding isabay sa pagpapatupad ng bagong sistema ang mga pagbabago sa education sector, tulad ng pagpapatayo ng mga karagdagang classroom at pag-hire ng mga guro at administrative assistants.

Umabot sa 138,697 ang bilang ng mga kabataang ina na may edad 10 hanggang 19 sa Pilipinas, ayon sa Commission on Population and Development (CPD), batay sa datos ng Philippine Statistics Authority (PSA).

Pinakamaraming kaso ang naitala sa Calabarzon na may 16,827, sinundan ng Central Luzon (14,729) at National Capital Region (10,656). Mataas din ang bilang sa Northern Mindanao (10,394) at Soccsksargen (9,588).

Ayon kay CPD Executive Director Lisa Bersales, bagama’t bumababa ang bilang ng mga inang edad 15 hanggang 19, tumataas naman ang bilang ng mga nagiging ina na wala pang 15 taong gulang.

Noong 2024, umabot sa 135,085 ang mga inang edad 15 hanggang 19, mas mababa kumpara sa 138,933 noong 2023. Ngunit sa mga wala pang 15, tumaas sa 3,612 ang bilang, mula 3,343 noong 2023 at 3,135 noong 2022.

Ayon sa CPD, kabilang sa mga dahilan ng maagang pagbubuntis ang kahirapan, kakulangan sa edukasyon, kawalan ng gabay ng magulang, at limitadong access sa tamang impormasyon ukol sa sekswalidad.

Dahil dito, pinaigting ng ahensya ang kampanya sa edukasyon at awareness laban sa teenage pregnancy, lalo na sa mga komunidad.

Nagpaabot ng taos-pusong pakikiramay ang Office of the Special Assistant to the President sa pamilya ng mga nasawi sa paglubog ng passenger-cargo vessel na M/V Trisha Kerstin 3 noong Enero 26, 2026 sa karagatan ng Basilan. Nabatid na ipinaabot ni SAP Anton Lagdameo ang mensahe ni Pangulong Ferdinand Marcos Jr. na sumasalamin sa personal na kalungkutan at malasakit ng Pangulo para sa mga biktima at kanilang mga pamilya. Ayon kay Lagdameo, inatasan na ng Pangulo ang lahat ng kaukulang ahensya upang tiyakin ang agarang tulong para sa mga nakaligtas at sa mga naulilang pamilya. Siniguro rin umano ni PBBM na mabilis na makapaghahatid ng kinakailangang suporta ang gobyerno para sa mga ito.

Idinagdag ng OSAP na nakikiisa sila sa mga naulilang pamilya, mga apektadong komunidad, at sa buong bansa sa pagluluksa sa isa sa mga pinakamapaminsalang trahedyang pandagat sa mga nagdaang taon. Ang nasabing sasakyang pandagat na bumiyahe mula Zamboanga City patungong Jolo, Sulu, ay lumubog noong madaling-araw ng Enero 26 dahilan upang mahulog sa dagat ang daan-daang pasahero.  Mula noon ay nagsagawa ng malawakang search, rescue, at retrieval operations ang gobyerno sa pamumuno ng Philippine Coast Guard katuwang ang mga local government unit at mga volunteer group. Batay sa pinakahuling ulat, tinatayang nasa 40 na bangkay na ang na-rekober habang mahigit isang daang pasahero naman ang nailigtas.

Sa isang pahayag, ipinaabot ni Lagdameo ang taos-pusong pakikiramay sa mga nagdadalamhating pamilya.  “We stand in solidarity with the grieving families,” sabi ni Lagdameo. “The government stands ready to extend all possible support and comfort during this difficult time.”  Muli niyang pinagtibay ang pangako ng pambansang pamahalaan na tutulungan ang mga naulilang mahal sa buhay ng mga biktima. Nagpahayag din si Lagdameo ng pasasalamat sa mga responder kabilang ang mga tauhan ng Philippine Coast Guard, Armed Forces of the Philippines, mga local disaster team, at mga sibilyang volunteer na patuloy na nagsasakripisyo sa kabila ng mapanganib na kondisyon ng dagat. Higit pa sa relief efforts, binigyang-diin ni Lagdameo ang agarang pangangailangan ng pananagutan o accountability, at iginiit na dapat ganap at malinaw na masuri ang mga pangyayari sa likod ng paglubog ng barko. Ipinahayag ng OSAP ang buong suporta nito sa mabilis, masinsin, walang kinikilingan, at transparent na imbestigasyon sa trahedya.

Binigyang-diin ni Lagdameo na kailangang matukoy ng mga awtoridad ang mga detalye kaugnay ng seaworthiness ng sasakyang-dagat, kapasidad ng mga pasahero, lagay ng panahon, at pagsunod sa mga regulasyon bago ang biyahe. “We owe it to the victims and their families to pursue the truth,” saad ni Lagdameo. Idinagdag niya na mahalaga ang accountability upang maibalik ang tiwala ng publiko sa mga transportasyong pandagat ng bansa.

Nanawagan pa si Lagdameo sa mga kaukulang ahensya na repasuhin at patibayin ang mga maritime safety protocol.  Tiniyak niya na makikipagtulungan ang pambansang pamahalaan sa mga regulator upang matiyak na ang mga aral mula sa trahedya ay mauuwi sa konkretong reporma, mas mahigpit na pagpapatupad ng mga patakaran, at mas matibay na mga hakbang para sa kaligtasan ng mga pasahero.

Nilinaw ng Malacañang na wala nang inaasahang balasahan sa Gabinete ni Pangulong Ferdinand Marcos Jr.

Ayon kay Palace Press Officer Undersecretary Claire Castro, isusumite na sa Commission on Appointments o C.A. ang mga pangalan ng mga kalihim ng iba’t ibang departamento sa lalong madaling panahon.

Ito ang naging tugon ng Palasyo sa pagpuna ni Senador Rodante Marcoleta na nananatili pa ring nasa acting capacity ang karamihan sa mga pinuno ng ahensya ng pamahalaan.

Kabilang sa mga binanggit ni Senador Marcoleta ang Departments of Finance, Justice, Transportation, Public Works and Highways, Budget and Management, Environment and Natural Resources, Office of the Executive Secretary, at Presidential Communications Office.

Samantala, tungkol naman kay D-E-N-R Secretary Raphael Lotilla, sinabi ng Palasyo na titingnan muna ang kanyang record matapos ang sinasabing na-bypass sa C.A. ang kanyang appointment sa ikatlong pagkakataon.

—ulat mula kay Gilbert Perdez (Patrol 13)

Nanindigan si House Deputy Minority Leader at Mamamayang Liberal Partylist Rep. Leila de Lima na hindi pa rin ligtas si Vice President Sara Duterte sa impeachment.

Iginiit ito ni Rep. De Lima makaraang ibasura ng Korte Suprema ang motion for reconsideration ng Kamara at pagtibayin ang nauna nitong desisyon na unconstitutional ang articles of impeachment laban sa bise presidente.

Ayon kay Rep. De Lima, nakabatay sa teknikalidad ang pasya ng Kataas-taasang Hukuman at maaaring magamit ito sa mga susunod na paghahain ng impeachment complaint.

Nilinaw ng kongresista na hindi maituturing na tagumpay sa panig ni V.P. Sara ang S.C. ruling dahil hindi nito nalinis ang kanyang pangalan mula sa mga alegasyong nakapaloob sa kinaharap niyang impeachment case.

Kabilang na anya ang culpable violation of the Constitution, betrayal of public trust, at iba pang related high crimes na naging basehan ng mga complainant.

—ulat mula kay Geli Mendez (Patrol 30)

Kinumpirma ni House Majority Leader Sandro Marcos na hindi siya dadalo sa pagdinig ng House Committee on Justice kaugnay ng impeachment complaints na inihain laban sa kanyang ama na si Pangulong Ferdinand Marcos Jr.

Ayon kay Rep. Marcos, nag-inhibit na siya sa lahat ng proseso na may kinalaman sa impeachment complaint ng kanyang ama, kasama na rito ang pagdinig ng Justice Committee, kung saan ang kanyang papel ay limitado lamang sa pagiging “ex officio” bilang House Majority Leader.

Iginiit ng presidential son na magta-trabaho ang justice panel “independently” o malaya at naaayon sa Constitution at rules ng Kamara.

Matatandaang nakatakda sa Lunes, Pebrero a-dos, ang pagsalang ng mga reklamo kay Pangulong Marcos matapos itong i-refer sa plenaryo ng House Committee on Rules sa justice panel.

—ulat mula kay Geli Mendez (Patrol 30)

Nananawagan ang Commission on Elections sa mga mambabatas na isabatas na ang panibagong petsa ng Bangsamoro parliamentary elections ngayong taon.

Ayon kay Comelec Spokesman John Rex Laudiangco, hindi maaaring isagawa ang nasabing halalan sa 2027 dahil paghahandaan ng komisyon ang 2028 presidential elections.

Hindi rin anya dapat isabay ito sa barangay at Sangguniang Kabataan elections sa darating na Nobyembre dahil malilito ang mga botante.

Dahil dito, naniniwala si Laudiangco na dapat gawin ang Bangsamoro parliamentary election sa Setyembre o Oktubre ngayong taon.

—sa panulat ni Anjo Riñon

Naniniwala ang ekonomistang si Professor Emmanuel Leyco na ang pagtitipid ng mga Pilipino noong Pasko ang maaaring isa sa dahilan ng mabagal na paglago ng ekonomiya noong huling quarter ng 2025.

Nagkaroon din anya ng malaking epekto sa ekonomiya ang katiwalian sa mga flood control at iba pang government infrastructure projects na itinurong dahilan ng pangamba ng mga negosyante, lalo ng mga foreign investor sa bansa.

Isa naman sa nakikitang solusyon ni Leyco ang pangangailangang maglatag ng kongkretong plano ng pamahalaan upang mapanumbalik ang mga tiwala ng mga dayuhang namumuhunan.

—sa panulat ni Anjo Riñon

Ikakasa na ang isang malawakang kilos-protesta sa EDSA sa darating na Pebrero a-bente-singko bilang paggunita sa ika-40 anibersaryo ng 1986 People Power Revolution o “EDSA Uno.”

Ayon kay Bagong Alyansang Makabayan President Renato “Ka Nato” Reyes, bahagi ito ng panawagan ng pagpapanagot sa mga sangkot sa katiwalian, kabilang na sina Pangulong Ferdinand Marcos Jr. at Vice President Sara Duterte.

Dagdag pa ni Reyes, bagama’t may mga gusot at hindi pagkakaunawaan sa pagitan ng mga organizer ng mga protestang “Baha sa Luneta” at “Trillion Peso March,” tuloy-tuloy naman ang pagsisikap ng mga naturang grupo upang magsanib-puwersa sa mga bagay na sinasang-ayunan ng mga ito.

Iginiit din ni “Ka Nato” na hindi “resign all,” o kaya’y ang pagtatatag ng isang civilian-military junta, transition council, o revolutionary government, ang pangunahing panawagan ng “Baha sa Luneta” rally.

—sa panulat ni Anjo Riñon

Naniniwala si Senador Erwin Tulfo, vice chairman ng Senate Blue Ribbon Committee, na dapat nang mag-wind down o dahan-dahan nang tapusin ang imbestigasyon ng nasabing komite hinggil sa maanomalyang flood control projects.

Ayon kay Senador Tulfo, naapektuhan na ang pagsagot ng mga witness at resource person sa flood control anomalies dahil sa takot na magamit ang mga ito laban sa kanila, sa gitna na rin ng sabay-sabay na imbestigasyon ng Senado, DOJ, at ICI.

Bagama’t importante anya ang pagpapatuloy ng nasabing imbestigasyon, binigyang-diin ni Senador Tulfo na mas marami pa anyang dapat pagtuunan ng pansin, kabilang ang mga isyu ng murang bilihin at murang pagpapagamot dahil ito anya ang mga pangunahing problema ng mga Pilipino.

—sa panulat ni Daniela De Guzman