NATIONAL NEWS

Handang tumalima ang Philippine Health Insurance Corporation sa anumang magiging desisyon ng korte suprema kaugnay sa kontrobersyal na paglilipat ng sobrang pondo nito sa National Treasury.

Ginawa ni PhilHealth President at CEO Dr. Edwin Mercado ang pahayag sa harap ng pagsisimula ng Supreme Court sa oral argument kaugnay sa pag-transfer ng unused PhilHealth funds, na ayon sa petitioner, ay unconstitutional.

Nanumpa si Dr. Mercado sa harap mismo ni Pangulong Ferdinand Marcos Jr. sa gitna ng mga kontrobersiyang kinakaharap ng PhilHealth, kabilang ang sinasabing kakulangan sa paghahatid ng mga benepisyong pangkalusugan.

Tiniyak ng PhilHealth Official na tutugunan nila ang bilyung-bilyong pisong unpaid claims na utang ng health state insurer sa mga ospital, sa pamamagitan ng pagpapahusay sa claim process at pagbibigay-prayoridad sa digitization. –  Sa panulat ni Laica Cuevas

Pinalagan ng poll watchdog ang panukala ng Commission on Elections na ipagbawal ang lahat ng uri ng ayuda o anumang tulong, sampung araw bago ang eleksyon.

Ayon kay Kontra Daya Convenor Danilo Arao, isa sa kanilang tinitignang problema ay dumaraming pamilya o pilipino ang nangangailangan ng tulong sa oras na may krisis.

Hindi dapat anya palawakin ang pagbabawal sa ayuda at sa halip ay dapat palakasin ng COMELEC ang kanilang monitoring mechanisms.

Una nang ipinagbawal ng COMELEC ang pamamahagi ng Assistance to Individuals in Crisis Situation (AICS), 10 araw bago ang botohan.

Kumpiyansa ang Department of Health na malaki ang maiaambag sa healthcare system sa bansa ang bagong talagang Pangulo at Chief Executive Officer ng PhilHealth na si Doctor Edwin Mercado.

Ayon kay Health Secretary Teodoro Herbosa, hindi matatawaran ang karanasan at kakayahan ni Doctor Mercado lalo na’t nagtapos ito ng medisina sa University of the Philippines, nagkaroon ng masters degree sa Harvard University, nagtrabaho sa North Carolina, at isang magaling na Orthopedic Surgeon.

Kasabay nito, pinasalamatan naman ng kalihim si dating PhilHealth President at ceo Emmanuel Ledesma Junior sa inilaan nitong panahon sa paglilingkod at pagpapalawak ng mga programa ng healthcare system sa bansa sa ilalim ng marcos administration.

Pumalo sa mahigit 10,000 cybercrime complaints ang naitala ng Cybercrime Investigation and Coordinating Center noong nakaraang taon.

Mas mataas ito ng tatlong beses kumpara noong 2023.

Batay sa complaints statistics ng CICC, umabot sa 3,000 kaso ang kabuuang complaints ang kanilang natanggap.

Dahil dito, umabot sa 198 million pesos ang kabuuang nawalang pera dahil sa scam noong nakalipas na taon.

Paliwanag ng ahensya, hindi alam ng publiko na sila ay naii-scam na at walang ding ideya kung saan isusumbong ang naturang insidente.

Sinimulan na sa uganda ang trial vaccination program para sa Ebola viral infection.

Ayon sa World Health Organization, ito ay matapos umakyat sa tatlo ang bilang ng Ebola cases.

Matatandaang namatay ang isang Nurse dahil sa sakit noong nakaraang linggo, habang naitala naman ang dalawang bagong kaso sa pamilya nito.

Kabilang sa sintomas ng Ebola infection ang pagdurugo, pananakit ng ulo at kalamnan.

Naililipat naman ang virus sa pamamagitan ng close contact sa infected bodily fluid at tissues. –  Sa panulat ni Laica Cuevas

Kinontra ng ilang petitioners ang paglipat ng hindi nagamit na pondo ng PhilHealth kung saan tinawag rin itong unconstitutional.

Kasunod ito ng pagsimula ng oral arguments ng Korte Suprema sa paglipat ng pondo ng nasabing ahensya.

Nagpahayag ng pagtutol ang mga petitioner sa circular ng Department of Finance at sa probisyon ng General Appropriations Act, na naging daan para maibalik ang halos 90 bilyong piso na pondo ng PhilHealth sa National Treasury.

Matatandaan, nuong nakaraang taon nag-remit ang PhilHealth ng 60 bilyong piso mula sa national treasury kung saan ay tinutulan din ng korte ang paglipat ng natitirang 29.9 billion pesos matapos maihain ang petisyon. –  Sa panulat ni Alyssa Quevedo

“No-show” Ang halos 40 online content creators at influencers sa pagdinig ng kamara kaugnay sa paglaganap ng fake news sa bansa.

Katwiran ng mga Content Creators, ang nasabing imbestigasyon ay paghadalang sa freedom of speech, kasabay ng pagkwestyon sa “legitimacy” at layunin ng nasabing pagdinig.

Dahil dito, dumulog sa Korte Suprema ang ilan sa mga vlogger upang pigilan ang Kamara sa pagpapatuloy ng imbestigasyon sa kanila hinggil sa fake news at disinformation.

Nakasaad sa petisyong inihain ng 17 vloggers ang kahilingang maglabas ang Korte Suprema ng temporary restraining order laban sa naturang  pagsisiyasat ng mababang kapulungan ng kongreso.

Sinabi ng mga Influencers sa kataas-taasang hukuman na ang imbestigasyon ng Kamara ay isang paglabag sa freedom of expression at freedom of the press. –  Sa panulat ni ni John Riz Calata

Balik-trabaho na bilang Chief of Staff ni Vice President Sara Duterte si Atty. Zuleika Lopez.

Sa Facebook post ng Office of the Vice President, makikitang kasama si Atty. Lopez sa flag-raising ceremony ng nasabing tanggapan.

Dumalo rin sa flag ceremony si VP Sara, kung saan  nanumpa rin ang bagong mga opisyal ng OVP Employees’ Association.

Matatandaang nakulong sa kamara si Lopez noong Nobyembre ng nakaraang taon matapos ipa-cite in contempt dahil sa pagtangging sumagot kaugnay sa sinasabing maling paggamit ng confidential fund ng OVP. –  Sa panulat ni John Riz Calata