NATIONAL NEWS

Gusto na lamang ng karamihan sa mga Pinay ang live-in arrangements sa halip na magpakasal.

Ito’y batay sa pag-aaral ng Commission on Population and Development kung saan may naitalang pagtaas sa bilang ng mga Filipino women edad 15 years old hanggang 49 years old na naninirahan sa iisang bahay kasama ang kanilang mga partner kahit hindi sila kasal.

Pumalo sa 19% nuong 2022 ang bilang ng mga babaeng nakikipag-live in, mas mataas ito kumpara nuong 1994 na may 5% lamang.

Samantalang ayon naman sa 2021 young adult fertility and sexuality survey, 20% mula sa dalawampung milyong kabataang edad 15 hanggang 24 years old ay nakikipag-live in sa kanilang mga partner. –  Sa panualt ni Alyssa Quevedo

Kinumpirma ng Department of Agriculture na bigong makasunod ang karamihan sa mga retailers sa ipinatupad ng departamento na 55 pesos maximum suggested retail price sa kada kilo ng imported premium rice.

Sa kabila nito, ayon kay Agriculture Spokesman at Assistant Secretary Arnel De Mesa, magiging maluwag ang ahensya at papayagan ang mga retailers na ibenta ang mga luma nitong stocks.

Gayunman, inaasahan anya ng ahensya na agarang susunod ang mga nasabing retailers sa MSRP sa oras na matanggap na ng mga ito ang bagong suplay ng bigas.

Matatandaang naglabas ng isyu si Agriculture Secretary Francisco Tiu Laurel Jr. hinggil sa pagtapyas sa MSRP kung saan mula 58 pesos ay magiging 55 pesos na lamang ito sa kada kilo. - Sa panulat ni Alyssa Quevedo

Muling nakapagtala ng dalawang panibagong kaso ng Mpox ang Baguio City Health Services Office.

Ayon sa Baguio CHSO, ang mga nasabing kaso ay kinabibilangan ng isang babae at isang lalaki, na kapwa 21-anyos.

Dahil dito, ipinag-utos ng tanggapan na mag-self isolate ang mga ito sa kanilang tahanan hanggang Pebrero 16 habang inabisuhan naman ang mga close contact ng dalawang pasyente na i-monitor ang kanilang pakiramdam sa loob ng tatlong linggo.

Sinabi ng Baguio CHSO na walang kinalaman ang mga bagong kaso sa dalawang kaso ng mpox na naitala noong Enero. - Sa panulat ni John Riz Calata

Inalmahan ng ilang mga business group ang panukalang 200-peso across-the-board daily wage increase.

Ayon sa pinagsamang pahayag ng walong business organizations, makaaapekto sa ekonomiya ng bansa sakali mang maisabatas ang nasabing panukala.

Bagama’t, nirerespeto at naiintindihan nila na layunin nitong mapabuti ang kalagayan ng mga manggagawa, ay naniniwala rin silang magkakaroon ito ng malaking epekto sa mga business owners, partikular na sa small and micro enterprises, at sa ekonomiya ng bansa.

Dagdag pa ng mga grupo ng negosyante na ang panukalang taas-sahod ay posibleng magpahirap sa mga business owners lalo na ang iba sa mga ito ay maliit lamang din ang kita at kulang sa financial flexibility upang tumalima sa naturang panukala.

Maaari din anilang tumaas ang “cost of living” kapag ipinatupad ang 200-peso across-the-board daily wage increase dahil mapipilitan ang mga business na taasan ang presyo ng mga serbisyo at bilihin upang mabigyan ng sapat na sahod ang mga empleyado nito.

Bukod dito, maaari ring magsara ang maliliit na negosyo sakali mang maisabatas ang naturang panukala.

Kabilang sa mga samahang tutol sa 200-peso across-the-board daily wage increase ay ang  Employers Confederation of the Philippines, Philippine Chamber of Commerce and Industry, Philippine Exporters Confederation Inc., Philippine Hotel Owners Association, at iba pa.  - Sa panulat ni John Riz Calata

Hinimok ng mga Obispo sa Pilipinas ang pamahalaan na panatilihin ang katotohanan at tiyaking mananaig ang hustisya, kasunod ng pag-impeach ng kamara kay Vice President Sara Duterte.

Ayon kay Caritas Philippines President Bishop Jose Colin Bagaforo, ang proseso ng impeachment ay isang mahalagang mekanismo sa demokrasya ng bansa upang mapanagot ang sinumang opisyal ng pamahalaan na gagawa ng katiwalian.

Hinikayat din ng Caritas Philippines ang publiko na timbangin ang impeachment laban kay VP Sara nang patas, may integridad, at respeto sa rule of law.

Inanyayahan din ng mga obispo sa bansa ang lahat ng sektor ng lipunan na ipagdasal at makiisa sa pagprotekta sa demokrasya.

Huwag din sana anilang hayaang matakpan ng political divisions ang kapakanan ng bawat Pilipino.  - Sa panulat ni John Riz Calata

Iginiit ni dating Presidential Legal Counsel Salvador Panelo na palalakasin lamang ng impeachment kay Vice President Sara Duterte ang suporta ng mga Pilipino sa Pangalawang Pangulo.

Bukod dito, sinabi ni Atty. Panelo na palalalain lamang nito ang inis at galit ng mga taga-suporta ni VP Sara.

Binigyang-diin ng dating Presidential Legal Counsel na hindi pinakinggan ng mga mambabatas ang boses ng mga taong tutol sa impeachment ng Bise Presidente at hindi nirespeto ang hiling ni Pangulong Ferdinand Marcos Jr. na iwasan ang mga aksyon na magdudulot ng pagkakawatak-watak ng bansa.

Nabatid na umani ng higit sa kinakailangang boto ang petisyon na layong i-impeach si VP Sara matapos itong lagdaan ng mahigit dalawandaang mambabatas. - Sa panulat ni John Riz Calata

Hinamon ni dating senador Leila De Lima ang mga mambabatas na patunayang kaya ng mga itong isantabi ang personal at politikal na interes sa pagsisimula ng proseso sa impeachment laban kay Vice President Sara Duterte.

Ayon kay De Lima, sa paraang ito ay maipaglalaban ng mga mambabatas ang tama.

Binigyang-diin din ng dating senador na dapat maging patas at transparent ang proseso ng impeachment, at tunay na nagsusulong ng hustisya.

Hindi rin aniya dapat maging palabas lamang ang impeachment ng pangalawang pangulo upang pagtakpan ang katotohanan.

Si De Lima ang nagsisilbing tagapagsalita ng unang grupong naghain ng impeachment complaint laban kay VP Sara na kinabibilangan ng mga kinatawan ng civil society organizations, religious leaders, at pamilya ng mga biktima ng drug war campaign at extrajudicial killings ng nakaraang administrasyon. –  Sa panulat ni John Riz Calata

Handang harapin ni Vice President Sara Duterte at ng legal team nito ang impeachment trial.

Ito ang kinumpirma ni former Presidential Legal Counsel Atty. Salvador Panelo, at binigyang diin na buong tapang na haharapin ni VP Sara ang impeachment.

Matatandaang natanggap na ng senado ang articles of impeachment laban sa Bise Presidente mula sa Kamara. –  SA panulat ni Alyssa Quevedo 

Tumangging magkomento si Vice President Sara Duterte kaugnay sa pag-impeach sa kanya ng Kamara.

Ayon kay VP Sara, nais muna niyang mabasa ang kopya ng impeachment complaint bago magbigay ng komento hinggil dito.

Giit ng Pangalawang Pangulo, mahirap mag-react sa desisyon ng kamara nang hindi pa nababasa ang official statement kaugnay sa impeachment.

Dagdag pa ng Pangalawang Pangulo, maaaring masobrahan o magkulang ang kaniyang reaksyon hinggil dito, kaya’t mainam na hintayin muna ang opisyal na pahayag ng Kamara.

Si VP Sara ang kauna-unahang Bise Presidente ng bansa na in-impeach ng kamara at haharap sa paglilitis sa Senado. –  Sa panulat ni John Riz Calata 

Iminungkahi ng Metropolitan Manila Development Authority na tanggalin na ang Edsa Busway para mapaluwag ang trapiko sa Edsa.

Sa press briefing sa Malacañang, inihayag ni MMDA Chairman Romando Artes na pinapalaki na ang carrying capacity ng MRT-3 para ma-accomodate ang mga pasahero ng Edsa Carousel.

Mas convenient aniya ang pagsakay dito, dahil hindi lahat ng MRT station ay mayroon ding istasyon ang Edsa Carousel.

Sa oras na alisin ang Edsa Busway, wala nang padadaaning pampasaherong bus sa Edsa.

Sa halip, ipagagamit na lamang ang Edsa bus lane bilang special lane para sa mga sasakyang may sakay na tatlo o higit pa.

Nilinaw naman ni Chairman Artes na ito ay nananatiling rekomendasyon pa lamang. –  Sa panualt ni Laica Cuevas mula sa ulat ni Gilbert Perdez (Patrol 13)