NATIONAL NEWS

Binigyang diin ng House Tri-Committee na wala silang intensyong apakan ang karapatan ng malayang pamamahayag.

Ito ang iginiit ni Surigao Del Norte Representative Robert Ace Barbers, Ang Nagsulong Sa Imbestigayson Laban Sa Pagpapakalat ng mga pekeng balita at maling impormasyon sa social media.

Ayon sa Kongresista, layunin lamang nila na bumuo ng polisiya sa paggamit ng social media platforms at magkaroon ng disiplina gaya ng ipinatutupad na regulasyon ng traditional media.

Inihayag naman ni House Committee on Public Order and Safety Chairman Dan Fernandez, na napapanahon ang diskurso ng Tri-Comm dahil “na-weaponize” na ang social media sa pagpapakalat ng fake news at disinformation.

Inihalimbawa ng mambabatas ang mga pekeng job offers ng mga taong nasa likod ng pagpapatakbo ng pogo o philippine offshore gaming operators na nauuwi sa trafficking.

Kaugnay nito, hinihikayat ng Komite ang mga resource person na aktibong makibahagi sa pagdinig at tumulong sa pagbuo ng mga hakbang para labanan ang fake news at disinformation. –  Sa panulat ni Laica Cuevas mula sa ulat ni Geli Mendez (Patrol 30)

Iimbitahan ng House Tri-Committee sa susunod na pagdinig ang Social Weather Stations (SWS) hinggil sa hindi nito pagkakasama sa pangalan ng isang mambabatas sa Senatorial preferences survey.

Ayon kay Sagip Partylist Representative Rodante Marcoleta, hindi napabilang ang kanyang pangalan sa nasabing survey para sa ikatlong bahagi ng 2024, ngunit nakalista ang pangalan ng mga hindi naman tatakbo sa eleksyon at ilan pang hindi kilalang personalidad.

Kabilang aniya rito sina dating Pangulong Rodrigo Duterte; dating Vice President Leni Robredo; dating Defense Secretary Gilbert Teodoro; at dating Senador Franklin Drilon.

Kasama rin sa listahan ang mga hindi kilalang personalidad tulad nina jerome adonis ng Kilusang Mayo Uno; Jocelyn Andamo ng Filipino Nurses United; at Ronel Arambulo ng Pamalakaya.

Kinwestiyon pa ng Kongresista ang resulta ng SWS survey kung paano siya nauwi sa 36th spot gayong hindi naman siya kasali sa listahan nang pagpipilian.

Sinang-ayunan naman ni House Committee on Public Order and Safety Chairman Dan Fernandez ang mungkahi ni Congressman Marcoleta at tiniyak na iimbitahan ang sws sa ikalawang pagdinig ng Tri-Committee sa susunod na linggo. –  Sa panulat ni Laica Cuevas mula sa ulat ni Geli Mendez (Patrol 30)

Inflation at kurapsyon ang dahilan ng pagbulusok ng trust ratings nina Pangulong Ferdinand Marcos Jr. at Vice President Sara Duterte.

Batay sa resulta ng Social Weather Stations survey nitong enero, kapwa bumaba ang trust ratings ng pangulo sa 50 percent mula sa dating 54% at kay VP Sara sa 49% mula sa 52% noong December 2024.

Ayon kay Stratbase Institute President Professor Dindo Manhit, kailangang mapababa ni Pangulong Marcos ang presyo ng mga bilihin at serbisyo dahil malaki ang papel nito sa tiwala ng taumbayan.

Pagdating naman kay VP Sara, may kaugnayan aniya ito sa kwestyunableng paggamit ng milyung-milyong confidential funds ng kanyang mga tanggapan.

Samantala, kumbinsido rin si Professor Manhit na posibleng may kampanya laban sa presidente sa mindanao, dahil doon naitala ang pinakamababang trust ratings. –  Sa panulat ni Laica Cuevas

Tututukan pa ng Department of Science and Technology ngayong taon ang mga programa para sa biology at pharmaceuticals.

Ito ang sinabi ni DOST Secretary Renato Solidum, alinsunod sa hangarin ng pamahalaan na makapagtatag ng sariling virology at vaccines institute sa bansa.

Ipinaliwanag ng Kalihim, na sa pamamagitan nito, darami na ang mga indibidwal na magta-trabaho o tututok sa pag-aaral sa mga sakit ng tao, halaman, at hayop.

Dadami rin ang mga maghahanap ng solusyon kontra sa mga sakit na ito.

Idinagdag pa ng Kalihim, na bukod sa pagtitiyak ng food security sa Pilipinas, kailangan na ring paghandaan ng bansa ang posibilidad ng pag-usbong ng susunod na pandemya. – mula sa ulat ni Gilbert Perdez (Patrol 13)

Lusot na sa ikatlo at huling pagbasa sa Kamara ang house Bill 11317 o panukalang patawan ng P500,000 pesos o kalahating milyong piso ang mga mahahatulang “Guilty” Sa pagiging “Nuisance candidate” o mga kandidatong panggulo sa eleksiyon.

Sa botong 193 na pabor, apat ang kumontra, habang wala naman ang nag-abstain, mapepreserba ng panukala ang integridad ng halalan sa pamamagitan ng pagdaragdag ng “Grounds” Para sa kanselasyon ng certificates of candidacy o coc ng isang kandidato.

Sa oras naman na maging ganap itong batas, aamyendahan ang Omnibus Election Code of the Philippines o batas pambansa 881, maging ang depinisyon ng nuisance candidates at isasama ang mga indibidwal na naghain ng COC para kumita o tumanggap ng iba pang konsiderasyon.

Ang nuisance candidates ay ang indibidwal na naghain ng coc upang sirain ang proseso ng halalan, magdulot ng kalituhan sa mga botante bunsod ng pagkaka-pareho ng pangalan o apelyido nito sa ibang kandidato, at ang pagpapakita ng kawalang interes o intensyong tumakbo. – mula sa ulat ni Geli Mendez (Patrol 30)

Aprubado na sa ikalawang pagbasa sa Kamara ang House Bill 11376 o Wage Hike for Minimum Wage Earners Act.

Sa pamamagitan ng viva voce voting ay agad na umusad ang naturang panukala na layong dagdagan ng 200 pesos ang arawang sahod ng mga manggagawa sa pribadong sektor, anuman ang kanilang employment status, agricultural o non-agricultural sector.

Bilang tulong sa mga maliliit na negosyo, maaari sila kumuha ng insentibo na ibibigay ng Department of Labor and Employment batay sa gagawing implementing rules and regulations.

Exempted naman sa pagpapatupad ng umento sa sahod ang mga barangay micro business enterprises.

Ang sinumang lalabag sa panukala ay pagmumultahin ng 100,000 pesos hanggang 500,000 pesos o maaaring makulong ng dalawa hanggang apat na taon. – Mula sa ulat ni Geli Mendez (Patrol 30)

Isinapormal na ng Commission on Elections ang pagbabawal sa distribusyon ng financial at iba pang uri ng assistance, sampung araw bago ang may 12 midterm elections.

Saklaw ng resolusyon ang Tulong Panghanapbuhay sa ating Disadvantaged o Displaced Workers o ang TUPAD program ng  Department of Labor and Employment, at mga programa ng Department of Social Welfare and Development kabilang na ang Ayuda sa Kapos ang Kita Program (AKAP), Assistance to Individuals in Crisis Situations (AICS) at Pantawid Pamilyang Pilipino Program o 4Ps.

Ayon sa COMELEC, sa nasabing panahon ay maituturing na vote-buying ang anumang pagbibigay ng tulong ng mga kasalukuyang opisyal at kanilang asawa o miyembro ng pamilya.

Tanging medical at burial assistance lamang ang hindi sakop ng ayuda ban.

Sa kaparehong resolusyon, ipinagbawal din ng poll body ang pagdadala ng cash na lalagpas sa kalahating milyong piso o katumbas nito sa foreign currency, dalawang araw bago ang eleksyon.

Una nang sinabi ni COMELEC Commissioner Ernesto Maceda na palalawigin ng ahensya ang ayuda ban sa gitna ng mga ulat na ginagamit ito sa pangangampanya o pamumulitika. –  Sa panulat ni Laica Cuevas