NATIONAL NEWS

Aprubado na sa ikalawang pag-basa sa Kamara ang House Bill 10987 o ang Anti-Offshore Gaming Operations Act.

Tugon ang naturang panukala sa direktiba ni Pangulong Ferdinand Marcos Jr. na tuluyan nang ipagbawal ang operasyon ng POGO sa bansa.

Sa ilalim ng panukala, mahigpit na ipagbabawal ang anumang uri ng offshore gaming; pagtanggap ng anumang uri ng taya para sa offshore gaming, pagpapatakbo ng service provider para sa offshore gaming ; at pagpapatayo at pamamahala ng gaming hubs.

Oras naman na maisabatas ang panukala, lahat ng lisensya at prangkisa na ibinigay ng PAGCOR, cagayan Economic Zone Authority, Aurora Pacific Economic Zone and Freeport Authority, at Authority of the Freeport of bataan para sa POGO ay babawiin o kakanselahin.

Kaugnay nito, kakanselahin na rin ang mga visa na ipinagkaloob ng Bureau of Immigration at Alien Employment Permit na inilabas ng DOLE para sa mga foreign workers na nagtatarabaho sa POGO. –  Sa panulat ni Kat Gonzales

Pinabulaanan ng China ang sinasabing tapping nito sa telepono ni Philippine Ambassador to the U.S. Jose Manuel Romualdez.

Ayon kay Chinese Ambassador to the philippines Huang Xilian, hindi sila nagkausap ni Ambassador Romualdez hinggil sa nasabing isyu.

Una nang ibinunyag ni Ambassador Romualdez sa isang forum sa isang unibersidad sa amerika na maraming beses na siyang nakunan ng mga impormasyon ng China.

Bukod dito, ilang beses din aniyang tinangka ng China na i-hack ang kanyang telepono kaya’t ilang beses niya itong pinalitan.

Mainit ang usapin ng seguridad sa Pilipinas dahil kamakailan lamang nang maaresto ang ilang Chinese National dahil sa sinasabing pang-eespiya. –  Sa panulat ni Laica Cuevas

Muling iginiit ng Malacañang na hindi makikialam si Pangulong Ferdinand Marcos Jr., kaugnay sa impeachment process laban kay Vice President Sara Duterte.

Kasunod ito ng naging pahayag ni Gabriela Partylist Rep. Arlene Brosas na kung hindi nagbigay ng pahayag si pangulong marcos na wala siyang panahon para sa impeachment ay maaaring umusad na aniya ito sa kamara

Ayon kay Executive Secretary Lucas Bersamin, tanging ang mababang kapulungan ng kongreso ang may kapangyarihang magpasimula at kumilos kaugnay sa impecahment complaint.

Paliwanag pa ng Kalihim, bilang paggalang sa mga institusyon, hindi na makikialam ang Pangulo sa isang bagay na saklaw ng isang co-equal branch of government. – Sa panulat ni Jeraline Doinog mula sa ulat ni Gilbert Perdez (Patrol 13)

Tiniyak ni House Secretary General Reginald Velasco, na maaaksyuhan na ng Kamara ang mga nakabinbing impeachment complaints laban kay Vice President Sara Duterte ngayong linggo o bago magtapos ang sesyon.

Ayon kay Sec. Gen. Velasco, tatapusin na ngayong linggo ang deadline para sa mga reklamo mula sa iba’t ibang grupo.

Ginawa ang pahayag kasunod ng puna ng mga kritiko na walang pag-usad ang mga reklamong inihain sa kamara na inendorso ng ilang Kongresista.

Agad na dinepensahan ng House Official ang mga alegasyon sa kamara at iginiit na hinihintay pa rin nila ang ika-apat na impeachment complaint, na magpapabilis sa proseso o yung target na diretso na sa Senado.

Binibigyan pa aniya nila ng sapat na panahon ang mga magsasampa ng reklamo, ngunit kung hindi na aabot sa itatakdang araw, ita-transmit na nila ang unang tatlong reklamo sa tanggapan ni House Speaker Martin Romualdez. –  Sa panulat ni Laica Cuevas

Iginiit ni Chairman George Barcelon ng Philippine Chamber of Commerce and Industry, na hindi pa napapanahon ang panukalang dalawandaang pisong taas-sahod para sa mga manggagawa ng pribadong sektor.

Suportado ni Chairman Barcelon ang pahayag ng Employers Confederation of the Philippines na mayroong negatibong epekto ang panukalang wage increase hindi lamang sa maliliit na negosyante, kundi sa mga negosyong nag-aangkat para sa kanilang produksyon. – Sa panulat ni Laica Cuevas

Magsasagawa ng imbestigasyon bukas ang Tri-Committee ng Kamara kaugnay ng sinasabing pagkalat ng fake news o maling impormasyon sa social media.

Kaugnay nito, inimbitahan ang nasa 40 social media personalities sa pagdinig, na pangungunahan ng committees on public order and safety; public information; at information and communications technology.

Ilan sa mga inimbitahan sina Malou Tiquia; Jose Yumang Sonza; Mark Anthony Lopez; Allan Troy “Sass” Rogando Saso; Lorraine Marie Tablang Badoy-Partosa; Jeffrey Almendras Celiz; Lord Byron Cristobal o Banat By; Claire Eden Contreras o Maharlika Boldyakera; Atty. Trixie cruz Angeles at Ahmed Paglinawan ng Luminous by Trixie & Ahmed.

Dadalo rin sa pagdinig ang mga kinatawan mula Google, Meta, at Bytedance, gayundin ang mga opisyal ng National Bureau of Investigation, Philippine National Police, at Department of Justice.

Kabilang sa mga aalamin ng Komite kung paano kumakalat ang disinformation online, gayundin ang epekto nito sa publiko at pambansang seguridad.

Ikinabahala ng Catholic Bishops’ Conference of the Philippines ang sinasabing paglalaan ng bilyung-bilyong piso para sa ayuda sa ilalim ng 6.3 billion pesos na 2025 national budget.

Ayon kay Caritas Philippines Executive Director, Fr. Tito Caluag, panahon na para kumilos at mag-protesta laban sa kurapsyon, at higit dito, kailangan ng pagkakaisa at maging liwanag laban sa katiwalian.

Bagama’t kailangan aniya ang ayuda para matulungan ang mga mahihirap, mahalaga ring bigyan ang mga ito ng programa na talagang magbibigay ng oportunidad sa kanila para mapabuti ang kanilang mga buhay at hindi lamang umaasa sa natatanggap na ayuda.

Ipinunto ni Fr. Caluag na panahon na para gamitin ang national budget hindi para sa mga ayuda, kundi sa mga proyektong magsusulong sa kanilang mga buhay. – Sa panulat ni Laica Cuevas

Muling iginiit ng Philippine National Police na walang pamumulitika at iba pang agenda ang pagsasagawa ng oplan katok.

Ginawa ni PNP Chief General Rommel Francisco Marbil ang pahayag matapos ipanawagan ng Commission on Elections na suspindihin ang operasyon dahil maari itong magamit sa pananakot at pangha-harass ngayong eleksyon.

Ayon kay General Marbil, buong taon nilang ginagawa ang oplan katok at alinsunod ito sa Republic Act no. 10591, o ang Comprehensive Firearms and Ammunition Regulation Act.

Wala aniyang basehan ang mga sinasabi ni COMELEC Chairman George Erwin Garcia, dahil legal, dumaan sa tamang proseso, at target lamang nitong ipaalala sa mga gunowner na mag-renew ng kanilang pasong lisensya ng baril. – Sa panulat ni Laica Cuevas

Nanindigan si Vice President Sara Duterte na seryoso niyang ikinukunsidera ang pagtakbo para sa 2028 Presidential elections.

Ito’y sa kabila ng patuloy na pagbaba ng trust at satisfaction ratings nito at sa nagbabantang impeachment laban sa kanya.

Giit pa ni VP Duterte, ang posisyon ng Pilipinas sa Southeast Asian Nations at sa buong mundo ang nagtutulak sa kanyang tumakbo.

Matatandaan nuong nakaraang taon sinabi ng Bise Presidente na kanyang ikinukunsidera ang pagtakbo sa 2028 presidential elections. –  Sa panualt ni Alyssa Quevedo