NATIONAL NEWS

Pinag-iisipan pa ni Vice President Sara Durtere kung ano ang kanyang magiging partisipasyon sa papalapit na eleksyon.

Kabilang dito ang pag-eendorso niya sa mga kandidato.

Ayon sa Bise Presidente, hindi niya alam kung makakatulong o makakasama ba sa isang kandidato ang pag-eendorso niya sa kanila.

Kaya’t kung makakatulong anya sa isang kandidato ang hindi niya pag-eendorso dito ay gagawin niya ito.

Matatandaang, mayroon nang nakabibin na mga impeachment complain sa kamara laban sa Bise Presidente. – Sa panulat ni Kat Gonzales

Nananatiling kumpiyansa si dating Pangulong Rodrigo Duterte na mayroong laban ang kanyang mga kandidato sa ilalim ng PDP-Laban.

Ito ay sa kabila ng mababang marka sa resulta ng mga survey.

Ayon kay dating Pangulong Duterte, tiwala siyang mananalo ang kanyang mga manok, hindi man lahat, pero karamihan sa mga ito.

Kabilang sa senatorial slate ng pdp-laban sina senators Bong Go at Ronald Dela Rosa, Aktor na si Philip Salvador, Singer na si Jimmy Bondoc, dating Cagayan Economic Zone Authority Administrator Raul Lambino, at abogadong si Jesus Hinlo.

Batay sa Social Weather Stations survey, si Senador Go at Dela Rosa lamang ang nakalusot sa Magic 12 kung saan nasa third to fourth spot si Senador Go, habang na sa 10th spoth naman si Senador Dela Rosa. –  Sa panulat ni Laica Cuevas

Kumpiyansa si Pangulong Ferdinand Marcos Jr. na mananalo ang l12 kandidato ng administrasyon para sa 2025 senatorial elections.

Ayon kay Pangulong Marcos, tiwala siyang nasa ilalim ng Partido Federal ng Pilipinas at buong alyansa ang pinakamagagaling at epektibong public servant sa Pilipinas.

Gagawin rin aniya ng partido ang lahat para manalo ang kanyang mga pambato sa eleksyon.

Sinabi pa ng Pangulo na target nilang magdagdag pa ng tao sa pfp para tulungan ang administrasyon na magpatupad ng mga plano para sa bansa. –  Sa panulat ni Laica Cuevas

Nilinaw ni dating Colonel Mariano Santiago, miyembro ng Alyansa ng Nagkaka-isang Mamamayan, na walang pinapanigan ang ikinasa nilang kilos-protesta noong isang linggo kaugnay sa kontrobersya ng 2025 national budget.

Ito ay matapos ang pahayag ni dating Senador Antonio Trillanes IV, na ilan sa mga sumama sa rally ay taga-suporta ng pamilya Duterte.

Ayon kay dating Colonel Santiago, ang pangangalampag sa administrasyong Marcos ay hindi nangangahulugan ng pagkampi sa mga Duterte.

Ipinunto pa ng dating opisyal na makakaliwa man o nagmula sa ibang grupo ang nakiisa sa kilos-protesta, karapatan nilang mangialam sa budgetary process ng bansa dahil pera ito ng taong-bayan. –  Sa panulat ni Laica Cuevas

 Iginiit ng Philippine Egg Board Association na wala silang nakikitang kakilangan sa supply ng itlog sa bansa sa darating na Abril.

Ito ay sa kabila ng abiso ng Department of Agriculture na posibleng magkulang ang supply ng nasabing produkto dahil sa banta ng bird flu.

Sinabi ni PEBA President Francis Uyehara na sa kanilang taya posibleng umabot hanggang sa Abril o Mayo ang supply ng itlog dahil sa maayos na produksyon kung kaya ikinagulat niya ang detalyeng inilabas ng D.A.

Bukod dito, sinabi ng PEBA Official na wala rin silang nakikitang pagtaas sa presyo ng itlog sa mga darating na buwan.

Nabatid na inanunsiyo ni Department of Agriculture Secretary Francisco Tiu Laurel Junior na posibleng makaranas ng kakulangan sa supply ng itlog ang pilipinas bagama’t posible pa aniyang mapigilan ang nasabing shortage. –  Sa panulat ni John Riz Calata

Nilinaw ng Department of Agriculture na epektibo lamang ang deklarasyon ng food security on rice sa mga lugar na may mataas na presyo ng bigas.

Ayon kay Agriculture Assistant Secretary at Spokesman Arnel De Mesa, ang emergency declaration ay base sa republic act 12078, na nag-aamyenda sa Rice Tariffication Law.

Batay rito, binibigyan ng otoridad ang Agriculture Secretary na mag-deklara ng food security emergencies sa mga lugar na may kakulangan sa food supply at hindi pangkaraniwang pagtaas ng presyo.

Una nang sinabi ng D.A. na posible nang i-deklara ang rice emergency bukas, Pebrero a-4 at kanila nang pinag-aaralan ang mga lugar na maaapektuhan ng naturang deklarasyon. –  Sa panulat ni Laica Cuevas

Welcome kay Senate Committee on Ways and Means Chairman Sherwin Gatchalian ang pagpapatupad ng rice emergency sa bansa.

Sa panayam ng DWIZ, sinabi ni Senador Gatchalian na suportado niya ang paggawa ng aksyon ng pamahalaan upang mapababa ang presyo ng bigas.

Binigyang-diin ng Mambabatas na kailangang gawin ng pamahalaan ang lahat nang makakaya upang matugunan ang patuloy na pagsirit ng presyo ng bigas.

Samantala, naniniwala si Senador Gatchalian na may mga sindikato sa likod ng patuloy na pagtaas ng presyo ng bigas sa bansa. – Sa panulat ni John Riz Calata

Aminado si Senate Committee on Local Government Chairman Joseph Victor “JV” Ejercito na mabagal ang pagpasa ng senado sa mga panukala.

Sa panayam ng DWIZ, sinabi ni Senador Ejercito na ito ay dahil kanilang sinusuri ang mga inihahaing panukala, kabilang na ang 200-pesos wage hike bill.

Dagdag pa ng mambabatas na kanila ring tinitignan kung mapopondohan ba ang mga panukala.

Ayon kay Senador Ejercito, kailangan ding i-konsidera ang iba’t ibang factors bago maipasa ang itinitulak na taas-sahod para sa mga private employees. -  Sa panulat ni John Riz Calata

94% o siyam sa bawat sampung Pilipino ang nagsabing susuportahan nila ang mga kandidatong nagsusulong ng paglikha ng trabaho, pagpapahusay sa sektor ng agrikultura at pagtiyak sa food security.

Sa resulta ng Social Weather Stations survey, 93% din ng respondents ang nagsabing susuportahan nila ang mga kandidatong adbokasiya ang pagpapabuti sa health care system; at 92% para sa nagtutulak ng pantay na access sa edukasyon at kapakanan ng Overseas Filipino Workers.

Nakakuha rin ng malaking suporta ang mga isyu tulad ng pagtugon sa kahirapan at kagutuman at climate change na may 87%; pagkontrol sa presyo ng mga pangunahing bilihin na may 85%; pag-depensa sa seguridad at soberanya ng bansa na may 83% at paggamit ng renewable energy na nakakuha ng 82%.

Samantala, lumabas din sa SWS survey na iboboto ng 59% ng mga Pilipino ang kandidatong sumusuporta sa batas laban sa political dynasty; 25% ang nagsabing tutol sila rito habang 12% ang nagsabing walang epekto sa kanilang boto ang naturang usapin. –  Sa panulat ni Laica Cuevas

Ikinabahala ni Senate Committee on Ways and Means Chairman Sherwin Gatchalian ang presensya ng mga suspected Chinese spies sa bansa.

Dahil dito, sinabi ni Senador Gatchalian sa panayam ng DWIZ na kailangang mas maging handa ang pilipinas sa banta ng espionage.

Dagdag pa ng mambabatas na kailangang mas mapabuti pa ang intelligence network ng Pilipinas.

Samantala, iginiit ni Senador Gatchalian na posibleng may kaugnayan din sa operasyon ng POGO ang pang-eespiyang nagaganap sa Pilipinas. – Sa panulat ni John Riz Calata