NATIONAL NEWS

Iginiit ni Chief Presidential Legal Counsel Juan Ponce Enrile na hindi tunay na pagpapatupad ng batas ang kampanya kontra droga ng nakaraang administrasyon.

Ayon kay dating Senate President Enrile, walang batas na nagpapahintulot sa pagpatay sa mga pinaghihinalaang sangkot sa paggamit ng iligal na droga nang hindi sumasailalim sa tamang proseso.

Binigyang-diin ni Enrile na hindi kailanman nagpasa ng batas ang kongreso na nagpapahintulot sa mga tinatawag na summary ticket.

Dagdag pa ng Chief Presidential Legal Counsel na hindi daan ang pagiging pulis upang pumatay ng sinuman nang walang batayan. –  Sa panulat ni John Riz Calata

Nagbabala ang Bureau of Immigration laban sa  sinumang nagtatago o nagpoprotekta sa mga dayuhang espiya.

Sa panayam ng DWIZ, sinabi ni B.I. Spokesperson Dana Sandoval, na kanilang sasampahan ng kaukulan na kaso ang sinumang mapag-aalamang nagkakanlong sa mga dayuhang espiya.

Binigyang-diin din ni Spokesperson Sandoval, na nakababahala na ang mga nasabing paniniktik sa bansa.

Kaugnay nito, sinabi ni Spokesperson Sandoval na hindi na niya ikagugulat sakali mang may matunton pa silang mga dayuhang espiya. –  Sa panulat ni John Riz Calata

Pinangangambahan ng Department of Agriculture ang malaking  posibilidad na magkaroon ng shortage sa itlog sa abril.

Ayon sa D.A., bunsod ito ng kakaunting supplier matapos malugi nuong nakaraang taon dulot ng bumabang presyo sa farm gate.

Dahil dito, anila posibleng tumaas ang presyo ng itlog sa nasabing buwan.

Gayunman, tiniyak ng departamento na ginagawa na nila upang agawang masolusyonan ang posibleng shortage.

Binigyan-diin ni Agriculture Secretary Francisco Tiu Laurel Junior na patatatagin na nila ang supply ng bago pa mag-abril at posible ring mag-angkat kung sakaling magkaubusan ng itlog.

Bukod pa rito, isinusulong din ng D.A. ang agarang pag-apruba sa bakuna laban sa Avian Influenza o bird flu. –  Sa panulat ni Kat Gonzales

Matapang na sinagot ni Pangulong Ferdinand Marcos Jr. ang panghahamon sa kaniya ni Atty. Vic Rodriguez na sumailalim sa follicle test.

Sa isang ambush interview, natanong natanong si Pangulong Marcos ukol sa isyu na pinalutang ng dating opisyal na minsang nagsilbi bilang kanyang Chief of Staff at Executive Secretary.

Ayon sa Pangulo, walang koneksyon ang hamon na ito sa tiwala ng publiko at pagsisilbi sa gobyerno.

Giit ng Presidente, tila wala sa lugar ang hamon at ipinaalala ang kahinaang ipinapakita ni Rodriguez tuwing nagkakaroon sila ng hindi pagkakaintindihan.

Matatandaang naging kontrobersyal ang pagbibitiw ni Rodriguez mula sa administrasyon, ngunit nananatiling palaisipan ang tunay na layunin ng hamon nitong follicle test na itinuturing ng marami bilang walang kaugnayan sa mga seryosong usapin ng bayan. – Sa panulat ni Kat Gonzales

Naghain ng not guilty plea sa Makati Regional Trial Court ang sinasabing Chinese National Spy na si Deng Yuanqing at ang dalawang Pilipinong kasama nito.

Kaugnay nito, iniharap din sa korte ang mini-SUV na sinasabing ginagamit ni Deng sa paniniktik sa mga pasilidad ng militar.

Dumating din sa dalawang oras na pagdinig ang mga Prosecutor ng Department of Justice.

Matatandaang naaresto ang tatlo kamakailan dahil sa sinasabing pang-eespiya ng mga ito sa bansa. –  Sa panulat ni Kat Gonzales

Nangangailangan pa ng masusing pag-aaral ang isinusulong na 200 pesos legislated wage hike bill.

Ito ang tugon ni Pangulong Ferdinand Marcos Jr. sa harap ng panawagang sertipikahang urgent ang panukalang batas na magtataas sa arawang sahod ng mga manggagawa.

Ayon kay Pangulong Marcos, kailangang umisip ng paraan kung papaano matutulungan ang mga pangkaraniwang pilipino sa harap ng tumataas pa ring presyo ng mga bilihin, at hindi pa rin nasusugpong problema sa inflation.

Gayunman, binigyan-diin ng Presidente na bagama’t wala magiging problema sa corporate companies ang posibleng taas-sweldo; nag-aalala naman ito sa mga maliliit na employers, partikular ang micro, small, and medium enterprises, dahil hindi naman madadagdagan ang kanilang kita kaya’t maaaring magresulta ito sa pagkabawas sa kanilang mga empleyado.

Kaugnay dito, iginiit ni PBBM na kailangan munang resolbahin ang legal at economic issues ng panukalang umento sa sahod.

Dapat din anyang magkaroon ng pakikipagtulungan sa regional tripartite wages and productivity boards na binuo upang alamin ang naaayong minimum wage sa bawat rehiyon. –  Sa panulat ni Kat Gonzales

Nanawagan si Senate Committee on Labor Chairman Senator Joel Villanueva kay Pangulong Ferdinand Marcos Junior na sertipikahang urgent ang panukalang legislated minimum wage  hike para sa mga manggagawa.

Ayon kay Senador Villanueva, may pangangailangan na maiayos ang antas ng pamumuhay ng mga manggagawang Pilipino at maramdaman naman ang epekto ng paglago ng ekonomiya.

Hiling ng Senador, masertipikahan agad ng pangulo ang panukalang batas at matiyak ang pagpapatupad nito lalo’t malapit ng matapos ang nineteenth congress.

Kailangang anyang masigurong may kakayahang mamuhay ng maayos ang mga kababayan at mahalagang maitapat ang sahod ng mga manggagawa sa umiiral na living wage sa bansa.

Naunang naaprubahan sa senado ang senate bill 2534 o ang 100 pesos munimum wage increase bill na ini-akda rin ni Villanueva at bukas naman ang Senador sa ongoing na talakayan ng Kamara sa bersyon ng kanilang panukala. –  Sa panulat ni Kat Gonzales

Tinatayang maitatala ang 2.5 hanggang 3.3 percent na headline inflation ngayong Enero.

Ayon sa Bangko Sentral ng Pilipinas, pagtaas ng presyo ng produktong petrolyo at mga pangunahing pagkain, paggalaw ng bayad sa tubig at buwis ang dahilan ng upward price pressures.

Gayunman, ang upward price pressures na ito ay bahagyang mapapagaan ng mas mababang presyo ng bigas at singil sa kuryente.

Matatandaang pumalo sa 2.9% ang inflation rate noong Disyembre, dahilan para maitala ang 3.2% na 2024 average inflation rate.

Ilalabas ng Philippine Statistics Authority ang January 2025 inflation data sa Miyerkules, Pebrero 25. – sa panulat ni Laica Cuevas

94% o siyam sa bawat sampung Pilipino ang nagsabing susuportahan nila ang mga kandidatong nagsusulong ng paglikha ng trabaho, pagpapahusay sa sektor ng agrikultura at pagtiyak sa food security.

Sa resulta ng Social Weather Stations survey, 93% din ng respondents ang nagsabing susuportahan nila ang mga kandidatong adbokasiya ang pagpapabuti sa health care system; at 92% para sa nagtutulak ng pantay na access sa edukasyon at kapakanan ng overseas Filipino workers.

Nakakuha rin ng malaking suporta ang mga isyu tulad ng pagtugon sa kahirapan at kagutuman at climate change na may 87%; pagkontrol sa presyo ng mga pangunahing bilihin na may 85%; pag-depensa sa seguridad at soberanya ng bansa na may 83% at paggamit ng renewable energy na nakakuha ng 82%.

Samantala, lumabas din sa SWS survey na iboboto ng 59% ng mga Pilipino ang kandidatong sumusuporta sa batas laban sa political dynasty; 25% ang nagsabing tutol sila rito habang 12% ang nagsabing walang epekto sa kanilang boto ang naturang usapin. - sa panulat ni Laica Cuevas

Wala pang desisyon ang Department of Foreign Affairs kaugnay sa pagpapatupad ng deployment ban sa mga overseas Filipino worker sa Kuwait.

Ayon kay Foreign Affairs Secretary Enrique Manalo, kailangan nilang pag-aralang mabuti ang usapin kasama ang Department of Migrant Workers at ikunsidera ang mga aspetong maaring maapektuhan ng moratorium.

Una nang ipinanawagan ni Senate Committee on Migrant Workers Chairman Raffy Tulfo ang deployment ban ng mga OFW sa Kuwait matapos ang pagkamatay nina Dafnie Nacalaban at Jenny Alvarado.

Si Nacalaban ang OFW na natagpuang naaagnas na ang bangkay dalawang buwan matapos iulat ng kanyang employer na nawawala habang si Alvarado naman ay nasawi dahil sa coal suffocation. - sa panulat ni Laica Cuevas