NATIONAL NEWS

Kapwa bumaba ang index crimes at cybercrimes nuong nakaraang taon.

Sa datos ng Philippine National Police, bumaba ang index crime sa 34,000 mula sa 38,000 nuong 2023 na kinabibilangan ng  murder, homicide, rape, theft, at robbery.

Bukod pa rito, bumagsak din ng 31.8% ang bilang ng cybercrimes na naitala nuong 2024.

Mula sa mahigit 20,000 kaso, bumaba ito sa 14,000 kaso.

Kasunod nito, tiniyak ni PNP Chief Gen. Rommel Francisco Marbil na magpapatuloy ang pambansang pulisya sa pagtitiyak at pagpapanatili ng kapayapaan at kaayusan sa bansa.

Binigyang diin ni Pangulong Ferdinand Marcos Jr. na dapat pagsilbihan ng batas ang lahat ng Pilipino at hindi lamang ng iilan.

Ayon kay Pangulong Marcos, dapat makamit ng mga pilipino ang hustisya lalo na ng mga higit na nangangailangan.

Kaugnay nito, hinimok ng Presidente ang mga abogado sa bansa na maging kinatawan ng hustiya.

Giit ni PBBM dapat isulong ng mga abugado ang katotohanan; maging makatarungan; pairalin ang pinakamataas na professional standards at taglayin ang integridad.

Bilang mga miyembro anya ng legal community, nasa posisyon ang mga ito para protektahan ang konstitusyon.

Tiniyak naman ni Pangulong Marcos ang suporta ng administrasyon sa pagtiyak ng  patas na legal system. – Sa panulat ni Kat Gonzales

Arestado ang limang Chinese National dahil sa pag-eespiya.

Iprinisinta ng National Bureau of Investigation sa publiko ang mga naaresto na sina Cai Shaghuang; Wang Yong Yo; Wu Jun Ren; Wu Chengting at Haitao Chen.

Ayon sa mga awtoridad, ang mga naaresto ay sangkot sa paniniktik o pagmamanman sa mga naval detachment; coast guard station at mga dockyard ng Philippine Navy.

Nakuha sa nasabing mga dayuhan ang mga high tech na kagamitan gaya ng long range CCTV na high powered kung saan nakita ang mga litrato ng mga barko ng Pilipinas at ang mga Coast Guard station at mga daungan.

Naniniwala ang mga awtoridad na may kaugnayan ang mga ito sa una nang naaresto na si Yuanqing Deng na nahuling nag-iikot sa mga base militar at maging mga LGU at malls kung saan nakuha ang mga gamit pang-espiya.

Nabatid ma miyembro ang mga naarestong dyuhan ng ilang samahan gaya ng Qiaoxing Volunteer Group of the Philippines at Philippine China Association of Promotion of Peace and Friendship. – Sa panulat ni Kat Gonzales

Nagpasalamat ang Malacañang sa patuloy na suportang ibinibigay ng mga Pilipino sa mga inisyatiba ng Marcos administration.

Ito’y ayon kay Executive Secretary Lucas Bersamin ay kasunod ng pinakahuling resulta ng sws survey na nagsasabing 59% ng adult Filipino ay kuntento sa performance ng pamahalaan, partikular na sa disaster response nito.

Tiniyak ni Executive Secretary Bersamin na magpapatuloy ang trabaho ng pamahalaan, lalo na’t ang tunay na sukatan aniya ng public service ay makikita sa improvement sa kalidad ng pamumuhay ng mga Pilipino.

Dagdag pa ng Kalihim na ang ganitong survey ay tinitignan ng gobyerno bilang feedback tool upang mas paigtingin ang serbisyong ibinibigay sa mga Pilipino. –  Sa panulat ni John Riz Calata

Kumpiyansa ang Department of Health na walang magiging malaking epekto sa Pilipinas ang pagsuspinde ng Estados Unidos sa kanilang foreign assistance.

Gayunman, matatamaan anila nito ang suporta ng US sa mga programa ng bansa kontra HIV at tubercolosis.

Ayon kay Health Secretary Ted Herbosa, nang simulan ni US President Donald Trump ang pagpapatigil sa international aid, nakikipag-ugnayan na siya para sa multilateral arrangements sa iba pang middle-income countries.

Lubos aniyang maaapektuhan ng aid freeze ang African countries at iba pang bansang may mababang income.

Idinagdag pa ng Kalihim na sakaling mag-desisyon ang us government na opisyal na ipatigil ang foreign assistance, maari namang hugutin ang pondo ng ahensya para sa iba pang programa o mangutang mula sa international financial institutions. –  Sa panulat ni Laica Cuevas

 Kinumpirma ni Pangulong Ferdinand Marcos Jr. na makikipagpulong siya kay United States President Donald Trump.

Ito’y sa kabila ng pansamantalang pag-freeze ng tulong mula sa Amerika.

Ayon kay Pangulong Marcos, mahalagang talakayin ang mga usapin ng kalakalan, depensa, seguridad, at bagong mga polisiya sa imigrasyon, lalo na’t nasa isandaang pilipino na ang napa-deport.

Mahalaga anya ang kontribusyon ng mga Pilipino sa workforce ng amerika kaya’t kailangang maayos ang mga isyung may kaugnayan dito.

Samantala, umaasa naman ang Presidente na ang mga aniya’y “growing pains” ng bagong administrasyon ay pansamantala lamang at kalaunan ay magiging malinaw ang mga polisiya.

Giit ng Pangulo, sa tamang pagkakataon ay makikipagpulong siya kay trump upang masusing mapag-usapan ang mga mahahalagang usapin.

Inaasahan naman na magiging mahalaga ang pulong na ito para mapalakas ang relasyon ng dalawang bansa sa aspeto ng ekonomiya, depensa, at karapatan ng mga pilipino sa nasabing bansa. –  Sa panulat ni Kat Gonzales

Bumaba ang bilang ng mga Pilipinong nakararanas ng food insecurity sa bansa.

Ito ay batay sa pinakahuling National Nutrition survey na isinagawa ng Department of Science and Technology – Food and Nutrition Research Institute noong 2023.

Ayon sa ahensiya, bahagyang bumuti ang resulta ng survey mula sa 33.4%, bumaba ito sa 31.4%.

Gayunman, bahagyang tumaas ang bilang ng mga pilipinong nakararanas ng severe food hunger na umabot sa 2.7% kumpara sa 2% noong 2021.

Sinabi ng FNRI na madalas maranasan ang food insecurity sa mga tahanan na may mahigit limang miyembro, pamilyang nasa rural areas, at sa mga pamilyang may mababang income o kita. –  Sa panulat ni John Riz Calata

Tinawag na counterproductive ng Employers Confederation of the Philippines ang panukalang 200 peso across-the-board wage hike para sa arawang sahod ng manggagawa sa pribadong sektor.

Ayon kay ECOP President Sergio Ortiz Luis-Jr., maganda lamang itong pakinggan, ngunit sa katotohanan ay ilan lamang ang makikinabang dito.

Paliwanag ng Employers’ group, posibleng magkaroon ng negatibong epekto ang taas-sahod sa ekonomiya, dahil maraming maliliit na negosyo sa bansa na mahihirapang ipatupad ang 200 pesos na wage increase.

Iginiit pa ng Business Leader na kung ikukunsidera na ang Pilipinas na ang may pinakamataas na minimum wage sa Southeast Asia, posible ring magtaboy sa mga investor ang nasabing panukala.

Mas mabuti aniyang ipaubaya na lamang sa Regional Wage Boards ang desisyon na siyang kumakatawan kapwa sa pamahalaan, employers at mga manggagawa. –  Sa panulat ni Laica Cuevas