NATIONAL NEWS

Hinimok ng mga mambabatas ang National Bureau of Investigation na i-review ang pahayag ni dating Pangulong Rodrigo Duterte na patayin ang ilang mga senador upang magkaroon pa ng mas maraming pwesto sa Senado.

Ayon kay Lanao Del Sur 1st District Rep. Zia Alonto Adiong, marapat lamang na imbestigahan din ng NBI ang sinabi ng dating pangulo kagaya ng pag-iimbestiga nito sa bantang pagpatay ni Vice President Sara Duterte kay Pangulong Ferdinand Marcos Jr.

Binigyang-diin naman ni Zambales 1st District Rep. Jay Khonghun na pareho ang ugali ng mag-amang Duterte at dapat aniyang makasuhan si dating Pangulong Duterte dahil sa pananakot.

Nauna nang nagsampa ng kasong “inciting to sedition” At “grave threat” ang NBI laban kay Vice President Duterte dahil sa sinasabing assassination plot laban kina Pangulong Marcos, First Lady Liza Araneta-Marcos, at House Speaker Martin Romualdez. –  Sa panulat ni John Riz Calata

Pinag-iisipan na ng halos 2/3 ng Filipino employees na magpalit ng trabaho ngayong taon.

Batay sa 2025 Human Capital Employee Sentiment Study ng Global Risk Management and Insurance Brokerage firm na Aon, 64% ng survey respondents sa Pilipinas ang nagsabing nasa proseso na sila ng paghahanap ng ibang employer o bagong trabaho sa susunod na taon.

Sa tindi ng talent competition, binigyang-diin ng Aon ang pangangailangan ng focus sa total rewards para ma-retain at hindi mag-resign ang mga empleyado.

Ayon kay Aon Growth Lead for Talent Solutions Josef Ayson, mahigpit ang skill competition sa buong bansa, hindi lamang sa Maynila kung saan readily available na ang skills, kundi maging sa mga lungsod ng Cebu at Davao.

Base sa pag-aaral, top five valued benefits ng mga empleyado sa Pilipinas ang medical coverage, paid time off, work-life balance programs, career development at retirement savings. –  Sa panulat ni Laica Cuevas

Ipinagdarasal na lamang ni Senador Sherwin Gatchalian na magkaroon ng kapayapaan para sa 2025 midterm elections.

Ito ay matapos matanong sa DWIZ, sa kanyang reaksyon sa pabirong banat ni dating Pangulong Rodrigo Duterte na patayin na lamang ang 15 senador para makapasok ang buong senatorial slate ng PDP-Laban.

Ayon kay Senador Gatchalian, hindi maganda ang mga ganitong pahayag, gayunpaman, hindi na dapat gatungan pa ang mainit na halalan. –  Sa panulat ni Laica Cuevas

Ikinabahala ni Senador Sherwin Gatchalian ang pagkatuto ng mga Pilipino sa scam operations.

Ito ay matapos ang ulat ng Australian Ferederal Police na umabot sa halos 5,000 Australian Nationals ang nabiktima ng love scam na nag-o-operate sa Pilipinas.

Sinasabing natangay ng scammers ang tinatayang nasa 24 million Australian dollars o katumbas ng mahigit 870 million pesos.

Dahil dito, nanawagan si senador gatchalian sa mga local government unit na higpitan ang pagbabantay sa kanilang mga nasasakupan kasabay ng babala sa mga pilipino na tigilan na ang iligal na gawain. –  Sa panulat ni Laica Cuevas

Binigyang-diin ni Professor Astro Del Castillo na hindi maganda para sa ekonomiya ng Pilipinas ang kasalukuyang ingay sa pulitika.

Bukod aniya sa distraction ito para pagtuunan ng pansin ang mas mahahalagang bagay tulad ng pagkain at kuryente, apektado rin nito ang paglalagak ng mga investment sa bansa.

Ibinunyag ng Ekonomista na may mga investor na nagpakita ng interes na maglagak ng puhunan sa pilipinas ngunit binawi dahil sa ingay-pulitika.

Bukod sa kontrobersya sa 2025 national budget, pinatindi ba aniya nito ang impeachment case ni Vice President Sara Duterte na hindi naman isinulong ng mga Pilipino, kundi ng mga pulitiko. –  Sa panulat ni Laica Cuevas

Naniniwala ang isang Political Analyst na bahagi lamang ng kampanya para sa 2025 midterm elections ang word war sa pagitan nina Pangulong Ferdinand Marcos Jr. At dating Pangulong Rodrigo Duterte.

Matatandaang sa campaign rally ng alyansa para sa Bagong Pilipinas, ibinida ni Pangulong Marcos na walang bahid ng dugo mula sa tokhang ang kanyang mga pambato, malinis ang track record at mga mambabatas, opisyal at gabineteng mayroon nang mayamang karanasan sa serbisyo-publiko.

Bilang tugon, dinepensahan naman ng mga kandidato ng PDP-Laban ang kani-kanilang track records kasabay ng muling pagbanat ni dating Pangulong Duterte na drug user si Pangulong Marcos.

Ayon kay Atty. Edward Chico, ito ang unang pagkakataon na aktibo sa pangangampanya ang kasalukuyang Presidente para i-promote ang kanyang mga kandidato sa midterm elections, at hindi ito ginawa noon nina dating Pangulong Duterte at Benigno Aquino III.

Bagama’t inaasahan na aniya ang word war sa pagitan ng dalawa, hindi niya nakikitang higit pa ito sa usapin ng pangangampanya. – Sa panulat ni Laica Cuevas

Sang-ayon ang karamihan ng mga Pilipino na harapin ni Vice President Sara Duterte ang mga reklamo laban sa kanya sa impeachment trial ng Senado.

Ito ay bata sa resulta ng isinagawang survey ng Tangere kung saan 73% ng mga Pilipino ang pumabor na dapat sumalang sa impeachment proceedings si VP Duterte.

Habang ang 22% naman ay tutol at 27% ang undecided.

Ginawa ang survey mula noong February 10 hanggang February 12 sa 2,400 respondents sa buong bansa. – Sa panulat ni John Riz Calata

 Hinimok ng House Prosecution Panel, ang Senado na simulan na ang trabaho kaugnay sa impeachment trial laban kay Vice President Sara Duterte.

Ayon kay Iloilo Rep. Lorenz Defensor, isa sa mga miyembro ng prosecution team, ang pagkaantala at mabagal na pagproseso ng paglilitis ay magtutulak lamang para ipagkait ang nararapat na hustisya.

Aniya, naipadala na nila ang Articles of Impeachment sa senado at wala nang dapat na dahilan para hindi isagawa ang impeachment trial.

Mas mabuti aniya na maagang masimulan ang paglilitis kung saan, patuloy sa preparasyon ang prosecution panel partikular ang paglalatag ng legal strategies at pangangalap ng mga ebidensya upang matiyak ang matibay na kaso laban sa Bise Presidente.

Kaugnay nito, inilatag din ng mambabatas ang inaasahang hakbang ng senado kabilang na ang pagpupulong; pag-apruba sa rules of impeachment; ipatawag ang bise presidente at ipaliwanag ang inihaing reklamo laban sakaniya.

Iginiit ni Cong. Defensor, ang pagkakapantay-pantay sa impeachment trial; kasama ang lahat ng mga ebidensya at testimonya na ihaharap sa open court. –  Sa panulat ni John Riz Calata

 Nanawagan sa mga senador ang mga kongresista na pakinggan ang lumalakas na sigaw ng publiko at mga organisasyon para sa maagang paglilitis ni impeached Vice President Sara Duterte.

Ginawa nina Deputy Majority Leader Paolo Ortega ng La Union at Assistant Majority Leader Ernesto Dionisio Jr. ng Maynila ang apela sa isang pulong balitaan kasunod ng plano ng mga progresibong grupo na magsagawa ng mga rally para himukin ang senado na agarang aksiyonan ang impeachment case ni VP Sara.

Ayon sa dalawang kongresista, nirerespeto nila ang hurisdiksiyon ng Senado pero malinaw anila ang nakasaad sa saligang batas na “proceed with the trial forthwith” o agad na simulan ang paglilitis kung ang isang impeachment complaint ay nilagdaan ng 80% o halos lahat ng miyembro ng Kamara.

Matatandaang nilagdaan ng 215 na miyembro ng Kamara ang impeachment petition laban kay VP Duterte.

Muling iginiit ng mga mambabatas na nasa kamay na ng mga senador kung paano bibigyang kahulugan ang nakapaloob sa konstitusyon.

Sinuportahan ni Cong. Ortega, ang hiling ng publiko na agarang paglilitis dahil masyado nang matagal ang mahigit apat na buwan bunsod ng campaign season.

Gayunman, kumpiyansa ang mambabatas na gagawin ng mga senador ang tama at tuparin ang panawagang umaksyon sa mga inihaing reklamo laban sa bise presidente upang hindi maantala ang paglilitis. –  Sa panulat ni John Riz Calata

Tikom ang bibig ng Malakanyang sa mga banat ni dating Pang. Rodrigo Duterte kay Pang. Ferdinand Marcos Jr. sa proclamation rally ng mga kandidato sa pagka-senador ng PDP-Laban.

Ito’y matapos humingi ng reaksyon ang Malacañang Press Corps sa mga naging pahayag ng dating pangulo sa event subalit ‘no comment’ lang ang naging tugon ng Presidential Communications Office.

Sa kanyang talumpati, muling inakusahan ni Duterte si Pang. Marcos na gumagamit ng iligal na droga.

Sinabi pa nitong baka pagdating ni PBBM sa edad na otsenta ay hindi na ito gumagalaw epekto ng droga.

Humirit din ito na patayin na lang ang kasalukuyang mga senador para mabakante ang pwesto nila para daw makapasok ang kanilang mga kandidato. –  Sa panulat ni John Riz Calata