NATIONAL NEWS

Mariing pinabulaanan ni Nicholas Kaufman, Lead Counsel ni dating Pangulong Rodrigo Duterte sa International Criminal Court ang mga alegasyong sinubukan ng kanilang kampo na limitahan ang mga dokumento ng mga tatayong saksi sa paglilitis ni Duterte.

Tinawag na sinungaling ni Attorney Kaufman sina ICC Assistant to Counsel Kristina Conti at ICC-accredited Lawyer Joel Butuyan dahil sa mga ipinakalat nilang fake news na naghain ang kampo ni duterte sa ICC na higpitan ang mga dokumento ng mga saksi.

Paliwanag ni Kaufman, hindi sila naghain ng pormal na kahilingan, kundi nagbigay lamang sila ng “Observations” Sa victims participation and reparations section ng ICC.

Matatandaang ikinatuwa nina Butuyan at Conti ang sinasabing desisyon ng ICC na ibasura ang mungkahi ng kampo ni duterte na limitahan ang tatanggaping ID ng mga biktima kabilang ang national ID at pasaporte.

Nangangamba ang isang grupo ng mga rice retailer sa plano ng Department of Agricluture na magbenta ng bente pesos kada kilo ng bigas sa mga pamilihan sa bansa.

Ayon kay Grains Retailers Confederation of the Philippines Spokesman Orly Manuntag, dapat maglabas muna ang D.A. ng malinaw na panuntunan kaugnay sa implementasyon ng nasabing programa upang maiwasan ang posibleng pananamantala.

Sa ngayon, nasa 35 pesos hanggang 45 pesos ang kada kilo ng imported rice habang nasa 48 pesos hanggang 50 pesos ang kada kilo ng imported rice.

Ibinabala ng grupo sa D.A. na kailangang maging maingat ang D.A. sa pagpapatupad ng “20 pesos kilo rice program” upang hindi ito mauwi sa hoarding, reselling, o iba pang uri ng pagsasamantala mula sa ilang indibidwal.

Anim sa sampung Pilipino ang nagsabing suportado nila ang pag-aresto ng International Criminal Court sa mga kapwa-akusado ni dating Pangulong Rodrigo Duterte sa war on drugs.

Batay sa survey ng WR Numero, 61% ng mga Pilipino ang pabor na ikulong din sa ICC Detention Center ang mga kapwa-akusado ng dating pangulo.

21% naman ang hindi pabor habang labinwalong porsyento ang hindi sigurado.

75% ng mga sumagot sa survey ay mula sa South Luzon, 73% sa Metro Manila at 42%t sa Mindanao.

Isinagawa ang survey mula noong March 31 hanggang nitong April 7.

Pagkakalooban ng free ride ang mga solo parent sa Metro Rail Transit – 3 at Light Rail Transit – 2 sa darating na Sabado, Abril 26.

Ayon sa Department of Social Welfare and Development, layon nitong gunitain ang pagdiriwang ng National Solo Parents Week.

Sinabi DSWD Assistant Secretary Ada Colico na maaaring i-avail ng mga rehistradong solo parent ang libreng sakay sa Sabado mula alas-siyete hanggang alas-nueve ng umaga at alas-singko ng hapon hanggang  alas-siyete ng gabi.

Kailangan lamang iprisinta ang kanilang solo parent identification card upang magkaroon ng free ride.

Bukod pa rito ay magkakaroon naman ng one-stop-shop caravan, kung saan makakapagrehistro ang mga solo parent at makakapag-renew ng kanilang solo parent IDs.—sa panulat ni Jasper Barleta

Pinaghahandaan na ng Department of Social Welfare and Development ang pagsasagawa ng Nationwide Supplementary Feeding Program para sa mga bata sa Child Development Centers at Supervised Neighborhood Play na pasisimulan sa Hunyo 2025.

Pagkakalooban ang nasa 1.5 milyong bata sa loob ng isang daan at dalawapung araw ng mainit na pagkain at gatas, gamit ang pondo na aabot sa 5.18 bilyong piso.

Layon ng programa na paigtingin ang nutrisyon ng mga bata at itaguyod ang paghahain ng mga lokal at katutubong pagkain.

Ang pagsasagawa sa naturang programa ay bilang pagsuporta sa zero hunger objective ni Pangulong Ferdinand Marcos Jr.—sa panulat ni Jasper Barleta

Umabot sa mahigit 200 Overseas Filipino Workers mula Kuwait ang nahatiran ng tulong ng Overseas Workers Welfare Administration (OWWA) sa unang apat na buwan ng 2025.

Ang naturang OFWs ay nabigyan ng libreng skills training tulad ng basic perfume making, basic bread and pastry production, pedicure, manicure, chocolate making at scented candle making.

Kaugnay nito, siniguro naman ng OWWA na magpapatuloy ang ganitong mga libreng trainings upang mas marami pang OFWs ang mapahusay ang kanilang trabaho. —sa panulat ni Jasper Barleta

Pinangangambahan ng Samahang Industriya ng Agrikultura (SINAG) na malugi ang mga magsasaka ngayong sisimulan na ng Department of Agriculture ang pagbebenta ng bente pesos na kada kilo ng bigas sa Visayas.

Ayon kay SINAG Executive Director Jayson Cainglet, posibleng baratin ng malalaking trader o dealer ang mga rice farmers sa oras na tuluyang ibagsak ang retail price ng bigas sa 20 pesos per kilo.

Nilinaw ni Cainglet na bagaman maganda ang layunin ng gobyerno na tulungan ang mga consumer, hindi  dapat isaalang-alang ang kapakanan ng mga magsasaka.

Samantala, nanawagan naman ang sinag official sa DA na kung ibabagsak pa ang presyo ng bigas, dapat namang taasan ang subsidiya sa mga rice farmers at ibalik sa dating 35% ang taripa sa imported rice upang magamit ang pondo nito bilang tulong sa mga magsasaka.—sa panulat ni Jasper Barleta

Maaaring makaapekto sa usad ng impeachment trial ni Vice President Sara Duterte ang pag-endorso niya sa administration senatorial candidates na sina Deputy House Speaker Camille Villar at Senator Imee Marcos.

Ito ang inihayag ng Political Analyst na si Professor Froilan Calilung bilang tugon sa batikos ng ilang kongresista na desperadong hakbang ang ginawa ni Vice President Duterte.

Ipinaliwanag ni Calilung na nakabatay pa rin sa magiging desisyon ng Senado ang kahihinatnan ng impeachment kaya’t pinili ng pangalawang pangulo na mag-endorso ng senatorial candidate na kanyang masasandalan, lalo sa panahon ng paglilitis.—sa panulat ni Jasper Barleta