NATIONAL NEWS

Iginiit ng Malacañang na hindi dapat nakabalandra ang mukha ng kahit sinong kandidato sa bentahan ng P20 per kilo na bigas sa visayas.

Ito ang binigyang diin ni Palace Press Officer Undersecretary kasunod ng anunsyo ng Department of Agriculture na sisimulan na ang pagbibenta ng murang bigas sa nasabing rehiyon.

Binigyang diin pa ng opisyal na ang pagbibenta ng murang bigas ay para sa taumbayan, at hindi para samantalahin ng mga kandidato.

Dagdag pa ni Usec. Castro, dapat na walang tarpaulin ang sinumang pulitiko sa bentahan ng murang bigas.—ulat mula kay Gilbert Perdez (Patrol 13)

Ibinunyag ni Senate Majority Leader Francis Tolentino ang sinasabing troll farm operations na pinopondohan ng china upang siraan hindi lamang ang mga personalidad na itinuturing na anti-China, kundi maging ang pamahalaan at ang buong bansa.

Sa pagdinig ng Senate Special Committee on Admiralty and Maritime Zones, iprinisinta ni Sen. Tolentino ang kontrata ng Chinese Embassy sa Infinitus Marketing Solutions Incorporated para sa operasyon ng ”keyboard warriors” na nilagdaan noong august 2023.

Ipinakita rin ng Senador ang isang tseke na nagkakahalaga ng P930,000 pesos na kabayaran ng chinese embassy sa korporasyon.

Ilan aniya sa mga naging trabaho ng “Keyboard warriors” ay mag-komento sa mga post at magpakalat ng mga impormasyon na pabor sa China.

Kabilang na rito ang mga isyu o banat laban sa mga batas kaugnay sa West Philippine Sea, gayundin ang mga pahayag laban kay Pangulong Ferdinand Marcos Jr., at Cong. Ace Barbers matapos nitong maglabas ng mga pahayag laban sa China kamakailan.

Kaugnay nito, sinabi ni Sen. Tolentino na labis na nakakabahala ang operasyon ng keyboard warriors at iginiit pa nito na hindi dapat magbulag-bulagan ang lahat laban sa pangungutya ng nasabing bansa.

Nadismaya at nasaktan ang buong Department of Agriculture sa naging pahayag ni Vice President Sara Duterte kaugnay sa kalidad ng bigas mula sa National Food Authority na ibebenta sa halagang bente pesos kada kilo.

Ayon sa Bise Presidente, hindi pantao kundi panghayop ang bigas na P20 per kilo na ibebenta sa Visayas.

Kaugnay nito, iginiit mismo ni Agriculture Secretary Francisco Tiu Laurel Jr., na  ligtas at dekalidad ang bigas ng NFA na galing sa mga lokal na magsasaka.

Dagdag pa nito, araw-araw nila itong niluluto at kinakain sa D.A.

Umapela naman ang kalihim kay VP Sara na isantabi ang pulitika at magkaisa para sa kapakanan ng mga Pilipino.

Bumaba ang naitalang kaso ng dengue sa bansa, mula Marso 16 hanggang 29.

Ayon sa Department of Health, naitala ang 9,289 cases sa nabanggit na panahon, na mas mababa ng 23% kumpara sa mahigit 12,000 kaso noong Marso 2 hanggang 15.

Maliban dito, bumulusok din sa 0.36% ang case fatality rate o bilang ng mga namamatay sa nasabing sakit.

Patuloy naman ang paalala ng kagawaran na agad na magpakonsulta sakaling makaranas ng sintomas ng dengue.

Itinalaga ni Pangulong Ferdinand Marcos Jr., sina Executive Secretary Lucas Bersamin, Justice Secretary Jesus Crispin Remulla, at Agrarian Reform Chief Conrado Estrella bilang caretakers ng bansa.

Ito’y habang nasa Vatican ang presidente upang dumalo sa libing ni Pope Francis, bukas.

Ang pagdalo ni Pangulong Marcos sa Vatican, kasama si First Lady Liza Araneta-Marcos, ay bilang pagpapakita ng pakikiisa at paggalang sa yumaong santo papa, na kinikilala bilang simbolo ng habag, pagkakaisa, at malasakit sa kapwa.

Kaugnay nito, tiniyak ni Executive Secretary Bersamin na mananatiling maayos ang operasyon ng mga pangunahing ahensya ng pamahalaan at ang tuloy-tuloy na serbisyo publiko habang nasa ibang bansa ang pangulo.—ulat mula kay Gilbert Perdez (Patrol 13)

Binalaan ng Commission on Elections ang mga kandidato na huwag maging epal o samantalahin ang pagbebenta ng bente pesos na bigas sa Visayas.

Ayon kay COMELEC Chairman George Erwin Garcia, magkakaroon lamang ng problema kung may mga “epalitikong” makikita sa bentahan ng murang bigas.

Maaari rin anyang ituring itong vote buying.

Sa ngayon, nakikipagtulungan na ang D.A. sa lokal na pamahalaan ng Cebu para maibenta ang mas abot-kayang halaga ng bigas.

Ibinulgar ni Senate Majority Leader Francis Tolentino ang troll farm operations na pinopondohan ng China upang siraan hindi lamang ang mga personalildad na itinuturing na anti-China kundi maging ang gobyerno at ang buong bansa.

Sa pagdinig ng Senate Special Committee on Admiralty and Maritime Zones, iprinisinta ni Tolentino ang kontrata ng Chinese Embassy sa Infinitus Marketing Solutions Incorporated para sa operasyon ng mga keyboard warriors na nilagdaan noong August 2023.

Ipinakita rin ni Tolentino ang isang tseke na nagkakahalaga ng P930,000 na kabayaran ng Chinese embassy sa korporasyon.

Sinabi ng Senador na ilan sa mga naging trabaho ng keyboard warriors na magkomento sa mga post at magpakalat ng mga impormasyon pabor sa China.

Ilan sa mga tinukoy ni Tolentino na aktibidad ng warriors o troll farms ang mga isyu o banat laban sa mga batas kaugnay sa West Philippine Sea gayundin ang mga banat kay Pangulong Ferdinand Marcos Jr.

May mga operasyon din ang keyboard warriors laban kay Cong. Ace Barbers matapos umano itong maglabas ng mga pahayag labnan sa China.—ulat mula kay Cely Ortega-Bueno (Patrol 19)

Posibleng malugi ang pamahalaan dahil sa planong magbenta ng bente pesos kada kilo ng bigas hanggang sa 2028 o pang-matagalan.

Sinabi ni Grains Retailers Confederation of the Philippines Spokesman Orly Manuntag sa DWIZ, na dapat paigtingin din ng Department of Agriculture ang cluster farming upang mapataas ang produksyon ng bigas sa bansa.

Nangangamba rin ang grupo na maaaring malugi o bumagsak ang kita ng mga magsasaka at rice retailers dahil sa murang pagbebenta ng produkto.

Dahil dito, isinusulong ng grupong GRECON na dapat magkaroon ng minimum selling price sa palay upang hindi mabarat o malugi ang mga magsasaka.

Handa na ang Pilipinas na makipagsabayan sa ibang bansa at sa buong mundo pagdating sa artificial Intelliegence (AI).

Ito ang binigyang diin ni Pangulong Ferdinand Marcos, Junior matapos pangunahan ang pormal na pagbubukas ng tinaguriang kauna-unahang A.I. ready na Hyperscale Data Center, na Vitro Santa Rosa.

Sinabi ng Pangulo, na ang pagbubukas ng bagong pasilidad ay indikasyon din na kayang makipagsabayan ng pilipinas sa ibang bansa pagdating sa data processing.

Gayundin ang pagpapahalaga ng bansa sa “people-centered” Na hinaharap, kung saan inaasahan ang kapit-bisig na koneksyon ng teknolohiya at mga tao.

Ayon kay PBBM, kasing-halaga ng tubig at kuryente ang mga datos kaya kailangan ng isang pasilidad tulad ng vitro para matiyak na protektado ang mahahalaga at sensitibong datos ng pribado, maging ng pampublikong sektor.—ulat mula kay Gilbert Perdez (Patrol 13)

Target ng pamahalaan ang pagbebenta ng bente pesos kada kilo ng bigas hanggang 2028.

Kasunod ito ng utos ni Pangulong Ferdinand Marcos Jr. sa Department of Agriculture na gawing pangmatagalan ang bentahan ng murang bigas.

Sinabi ni D.A. Secretary Francisco Tiu Laurel Jr. na sa inisyal na plano ay hanggang Disyembre ng taong ito ang gagawin nilang bentahan ng murang bigas, o puwede pang palawigin hanggang Pebrero ng susunod na taon.

Gayunman, mahigpit aniya ang bilin ni Pangulong Marcos na gawin itong pangmatagalan na.—ulat mula kay Gilbert Perdez (Patrol 13)