NATIONAL NEWS

55% o katumbas ng 15.5 milyong mga pamilyang Pilipino ang itinuturing ang kanilang sarili na mahirap.

Batay sa survey ng Social Weather Stations, ang nasabing bilang ay mas mataas kumpara sa 52% self-rated poverty o mahigit 14 na milyong pamilya noong Marso.

Samantala, bumaba naman sa 32% ang bilang ng mga pamilyang ikinukunsidera ang kanilang sarili na hindi mahirap, kumpara sa 36% sa unang tatlong buwan ng taon.

Nananatili naman sa 12% ang nagsabing sila ay nasa “borderline” o nasa pagitan ng mahirap at hindi mahirap.

Naitala ang pinaka-mataas na self-rated poverty sa mindanao, na umabot sa 70%; na sinundan ng visayas, 67%; 45% sa metro manila, at 44% sa luzon.

Isinagawa ang nasabing survey mula April 11 hanggang 15, sa 1,800 respondents mula Abril 11 hanggang 15.

Labis na ikinatuwa ng Philippine National Police ang pagbibigay ng libreng legal aid sa kanilang mga opisyal.

Ayon sa PNP, ang hakbang na ito ay makatutulong sa mga miyembro ng kapulisan na nahaharap sa mga kasong administratibo at kriminal na may kaugnayan sa kanilang tungkulin.

Ang libreng legal aid ay inaasahang magbibigay ng suporta at proteksyon sa mga pulis habang ginagampanan nila ang kanilang mga responsibilidad.—sa panulat ni Jasper Barleta

Aabot sa halos 400 mga pasilidad ng kulungan sa buong bansa ang itatalaga bilang mga special precincts para sa 2025 midterm elections.

Ayon sa COMELEC, layon ng hakbang na tiyakin ang karapatang makaboto ng mga Persons Deprived with Liberty habang pinapanatili ang seguridad at kaayusan ng mga pasilidad.

Ang mga special precincts ay itatatag sa pakikipagtulungan ng Bureau of Jail Management and Penology (BJMP) at ng mga lokal na pamahalaan upang matiyak ang maayos na proseso ng pagboto para sa mga PDLs.—sa panulat ni Jasper Barleta

Binigyang diin ng Teachers’ Dignity Coalition ang karapatan ng mga education professionals, kasunod ng naging kontrobersya sa graduation ceremony sa Antique.

Ito’y matapos kumpirmahin ni Communications Undersecretary Claire Castro na natanggal na sa pwesto si Principal Venus Divinia Nietes ng Colonel Ruperto Abellon National High School.

Ayon kay TDC National Chairperson Benjo Basas, habang nananawagan sila ng hustisya para sa mga apektadong estudyante, umaasa rin sila na mapahalagahan ang karapatan ng mga school official na sumailalim sa patas na due process.

Bilang kilalang tagapagtaguyod ng karapatan ng mga guro, malugod na tinanggap ng samahan ang mabilis na pagkilos ng Department of Education sa kaso ngunit hinihimok nila na sana’y maging pantay ang pagresolba sa nasabing isyu.

Pinalagan ng Alyansa para sa Bagong Pilipinas Senatorial candidates ang paninira sa ilulunsad na bente pesos kada kilo ng bigas ng pamahalaan.

Sinabi ni dating Senate President Tito Sotto na tama lamang na gamitin ang pera ng taumbayan para mas mapamura ang bentahan.

Para sa mga nagsasabing huli na para ipatupad ito, tugon ni dating Senador Ping Lacson na hindi huli ang lahat kapag gutom at kahirapan ng Pilipino ang tinutugunan.

Ipinaliwanag naman ni dating DILG Secretary Benhur Abalos na matagal na itong mithiin ni Pangulong Bongbong Marcos at hindi aniya makatwiran na ngayong ginagawa na ay pinupuna pa rin ito.

Samantala, bumwelta naman si Makati Mayor Abby Binay na hindi eleksyon ang dahilan ng programa dahil maganda naman ang rating nila ni former Senate President Sotto sa Visayas kung saan ilulunsad ito.

Magugunitang sinabi ni Vice President Sara Duterte na ginagamit lamang ng administrasyon ang pagpapamura ng bigas sa Visayas dahil posibleng mahina ang boto ng Alyansa slate sa rehiyon.

Sinibak na sa puwesto ang Principal ng colonel Ruperto Abellon National High School sa munisipalidad ng Laua-An sa Antique.

Matatandaang nag-viral si Venus Divina Nietes sa social media matapos ipahubad sa mismong seremonya ang toga na suot ng mga magtatapos na senior high school students.

Sa press briefing sa Malakanyang, sinabi ni Palace Press Officer Claire Castro na ang pagsibak sa prinsipal ang agarang naging aksyon ni Department of Education Secretary Sonny Angara matapos ang insidente alinsunod sa utos ni Pangulong Ferdinand Marcos Jr.

Ayon kay Castro, bagama’t maaari pa ring magturo ang nasabing guro sa ibang paaralan, sasailalim ito sa behavior evaluation.

Sa nag-viral na video, mapapanood ang pag-anunsyo ng principal sa stage na hindi dapat magsuot ng toga ang mga magsisipagtapos batay sa DEPED guidelines na gawing simple ang seremonya.

Iniutos nito sa graduating students na huwag mag-toga pag-akyat sa entablado, na inalmahan ng ilang estudyante at kanilang mga magulang.

Sumunod naman ang ilang mag-aaral, pero narinig ang pagsigaw ng mga tutol sa utos ng principal.—sa panulat ni Jasper Barleta

Natapyasan ang bilang ng mga batang Pilipinong hindi pa bakunado sa bansa ayon sa Department of Health.

Mula sa dating mahigit na isang milyon noong taong 2020 hanggang 2021, higit itong bumaba at pumalo na lamang sa 163,000 nitong 2023.

Sa pinakahuling datos ng DOH noong Pebrero 2025, nasa mahigit 1.5 milyong mga bata naman ang mayroong kumpletong bakuna na.

Sa kabila ng nasabing datos, nagbabala naman ang doh sa posibilidad na matigil o ma-reverse ito kung walang patuloy na sapat na pondo, supply chain support at political will sa lahat ng lebel ng pamahalaan.—sa panulat ni Jasper Barleta

Tiniyak ni National Food Authority Administrator Larry Lacson na ang kalidad ng bente pesos kada kilo ng bigas ng pamahalaan ay akma para sa pagkain ng tao at “hindi para sa hayop.”

Ito ay bunsod ng pambabatikos na natanggap ng gobyerno hinggil sa inisyal na implementasyon ng nasabing bigas sa Visayas.

Ayon kay Administrator Lacson, nasasaktan sila sa patutsada ni Vice President Sara Duterte na sinabing “pagkaing hayop” ang ibinebentang bigas.

Aniya, mayroon silang sinusunod na sistema upang mapanatiling maganda ang kalidad ng mga rice stocks at pinatotoong buwan-buwan itong tine-test sa laboratoryo upang matiyak na delikadad ang mga ito.

Inamin din ng opisyal na masakit ito para sa mga magsasaka dahil sila ang mismong nagsusuplay ng bigas sa NFA.—sa panulat ni Jasper Barleta