NATIONAL NEWS

Naglabas ng abiso ang Meralco para sa mararanasang power interruptions ng apat na barangay sa Parañaque City mula Abril 30 hanggang Mayo 1.

Ito ay dahil sa isasagawang line reconstruction, reconductoring works, at replacement of facilities sa San Antonio Valley 1 subdivision at NAIA Road, Pasay City.

Magsisimula ang interruption sa Abril 30 mula alas dose a-uno ng hatinggabi hanggang ala singko ng madaling araw sa Barangay San Antonio at San Isidro.

Habang mararanasan naman ito sa Barangay Tambo at Vitalez sa Mayo 1 pagdating ng alas otso ng umaga hanggang ala una ng hapon.—sa panulat ni Mark Terrence Molave

Aabot sa 170,000 local at overseas jobs ang ilalaan para sa mga aplikanteng Pilipino.

Ito ang kinumpirma ng Department of Labor and Employment kung saan magpapakalat sila ng job fairs sa 70 local sites sa bansa bilang paggunita Labor Day sa Mayo 1.

Ayon kay Labor Secretary Bienvenido Laguesma, ang mga naturang job fairs ay inaasahang lalahukan ng aabot sa 2,000 employers.

Pagtitiyak naman ng kalihim na maaari pa itong madagdagan, ilang araw bago sumapit ang selebrasyon ng Labor Day.

Hinihikayat naman ng opisyal ang mga jobseekers na samantalahin ang pagkakataon.—sa panulat ni Jasper Barleta

Ilang linggo bago ang 2025 midterm elections, pinaalalahanan ni Vice President Sara Duterte ang mga botante na mas maging mapanuri sa pagboto.

Kasabay nito, tinukoy rin ng Pangalawang Pangulo ang kaniyang itinuturing na mga “maling pag-uugali” ng mga Pilipino sa pagpili ng lider ng bansa.

Kaugnay nito, tila pinatutsadahan ni VP Sara si Pangulong Ferdinand Marcos Jr. at inihalimbawa ang ipinangako nitong 20 pesos kada kilong halaga ng bigas, na anya ay nakalipas na ang tatlong taon bago pa naipatupad.—sa panulat ni Jasper Barleta

Inilunsad na ng Department of Transportation sa pamamagitan ng Land Transportation Office ang inisyatibang digital upgrade upang mapabilis ang pagkuha ng plaka at lisensya ng mga motorista.

Sa pamamagitan ng programa, maihahatid na sa bahay mismo ng mga motorista ang kanilang plaka o lisensya sa pamamagitan ng isang accredited courier service provider.

Ayon kay Transportation Secretary Vince Dizon, ang hakbang na ito ay bahagi ng kanilang pagsusumikap na gawing mas magaan at maginhawa ang mga serbisyo ng pamahalaan para sa mga mamamayan.

Ang nasabing programa ay isang hakbang tungo sa mas modernisadong sistema ng pamamahagi ng mga dokumento at kagamitan para sa mga motorista, na umaayon sa mga inisyatiba ng pamahalaan na gawing digital at accessible ang mga serbisyo publiko.—sa panulat ni Jasper Barleta

Hinimok ni Senate President Pro Tempore Jinggoy Estrada ang mga kinauukulang ahensya ng pamahalaan na magsagawa ng masusing imbestigasyon hinggil sa mga ulat ng sinasabing panghihimasok ng tsina sa darating na 2025 midterm elections sa Pilipinas.

Ayon sa Senador, mahalaga itong hakbang upang mapanatili ang integridad ng demokratikong proseso ng bansa at maprotektahan ang pambansang soberanya.

Sa kabila ng pagtanggi ng China sa mga akusasyon, sinabi ni Estrada na dapat panagutin ang sinumang nagnanais na impluwensyahan ang ating mga halalan, maging sila man ay banyaga o lokal.

Ang pahayag ng Senador ay kasunod ng mga ulat mula sa National Security Council na nagsasabing may mga indikasyon ng panghihimasok mula sa mga dayuhang bansa, partikular na ang china, sa nalalapit na halalan sa Mayo 12.—sa panulat ni Jasper Barleta

Matapos mailibing ang Santo Papa, naghahanda na ang mga Cardinal para sa inaabangang conclave o ang pagtatalaga ng bagong pinuno ng Simbahang Katoliko.

Nakatakda ngayong araw ang ikalimang pangkalahatang pulong ng mga Cardinal mula nang mamatay si Pope Francis.

Kaugnay nito, inaasahan na rin na pumili ng petsa para sa conclave ang mga ito.

Habang nakakandado sa Sistine Chapel, boboto ang mga cardinal-electors ng apat an boto bawat araw hanggang mayroong makakuha ng 2/3 majority na siyang, kikilalaning bagon santo papa.

Tinaguriang People’s Pope dahil sa pagiging bukas sa mga nangangailangan, ilang katoliko ang nangangamba kung ang papalit kay Pope Francis ay katulad nitong bukas sa pagbabago at puso sa mahihirap.—sa panulat ni Kat Gonzales

Itinanghal ng US News & World Report ang Palawan bilang World’s Top Island Destination for 2025.

Ibinida ng nasabing US-based online news outlet ang Kayangan Lake sa Coron; mga lagoons sa Bacuit Bay sa el Nido; at kayak activities sa Puerto Princesa Subterranean River.

Bukod sa Pilipinas, kasama rin sa naturang listahan ang Sardinia sa Italy; Mauritius; Santorini sa Greece; The Faroe Islands; Cyprus; Tahiti; at marami pang iba.

Winelcome naman ni Tourism Secretary Christina Garcia-Frasco ang pagkilala at sinabing patunay ito na kilala ang Pilipinas sa angkin nitong likas na yaman.—sa panulat ni John Riz Calata

Itinuturing na bilang isang terrorista ang mga hacker sa bansa.

Ito ang ibinabala ni Department of Information and Communications Technology Secretary Henry Aguda laban sa mga hacker na umaatake sa mga bangko; ospital; paaralan at iba pang mga ahensya ng pamahalaan.

Alinsunod din anya ito sa ipinag-utos mismo ni Pangulong Ferdinand Marcos Jr. na pangalagaan ang digital infrastructure ng Pilipinas.

Giit pa ni Secretary Aguda, hindi maaaring isailalim lamang sa cybercrime ang paghack kundi sa terorismo na at kailangang paigtingin pa ang parusa rito.

Dahil dito, posibleng ma-freeze ang mga ari-arian at account ng mga ituturing na terorista ng anti money laundering council at i-wire tap sa basbas ng Court of Appeals.—sa panulat ni Alyssa Quevedo