NATIONAL NEWS

Kinumpirma ng Commission on Elections na tuloy pa rin ang halalan sa mga apektadong lugar ng pagputok ng Bulkang Bulusan.

Ayon kay COMELEC Chairman George Erwin Garcia, nagpaplano na silang magtayo ng mga satellite voting center sa nasabing lugar.

Kung may mga residente anya na kinakailangan lumikas ay magkakaroon ng satellite voting centers o offsite voting centers katulad ng sa Bulkang Kanlaon.

Binigyan-diin din ng Poll Body Chief na wala silang nakikitang dahilan para hindi ituloy ang eleksyon sa mga lugar na apektado ng pagsabog.

Nabatid na pumutok kahapon ng madaling araw ang nasabing bulkan.—sa panulat ni Kat Gonzales

Tatlo sa bawat apat na Pilipinong botante ang susuporta sa mga kandidatong pinaniniwalaan nilang igigiit ang soberanya ng Pilipinas sa Exclusive Economic Zone ng bansa.

Sa survey ng Social Weather Stations, 75% ng mga respondent ang boboto para sa mga kandidatong naniniwala na dapat igiit ng Pilipinas ang ating mga karapatan sa EEZ habang 25% lamang ang nagsabing susuportahan nila ang mga kandidatong hindi naniniwala na dapat ipaglaban ng bansa ang mga karapatan nito sa rehiyon.

Lumabas din sa survey na sa iba’t ibang uri ng socioeconomic classes, class E ang may pinakamababang bilang ng suporta para sa mga kandidatong suportado ang soberanya ng bansa.

Binigyan-diin ni Stratbase President Dindo Manhit na maaaring epekto ito ng sinasabing sistematikong disinformation campaign ng China sa Pilipinas.

Gayunman, iginiit ni manhit na hindi ito dapat isisi sa mga nasabing social class dahil anya biktima lamang din ang mga ito.

Iniimbestigahan na ng National Bureau of Investigation ang sinasabing panghihimasok ng China sa papalapit na eleksyon sa Pilipinas.

Ayon kay NBI Director Jaime Santiago, ang Intelligence Division ng ahensya, na pinamumunuan ni Assistant Director Noel Bocaling, ang naatasang manguna sa imbestigasyon.

Nag-ugat ang imbestigasyon ng ahensya matapos humingi ng paliwanag ang National Security Council sa Chinese Embassy kaugnay sa sinasabing pagbabayad nito sa isang makati-based firm na mamahala sa mga tinatatawag na ‘dedicated keyboard warriors’.

 Bukod pa rito nababahala rin si NSC Assistant Director General Jonathan Malaya kaugnay sa sinasabing information operations na pinopondohan ng nasabing bansa kung saan sinasabing layon nitong maimpluwensyahan ang  political discourse sa Pilipinas.—sa panulat ni Kat Gonzales

Nagbabala ang Department of Transportation sa mga airline kaugnay sa mga insidente ng `punit passport.’

Kasunod ito ng mga report, kung saan hindi nakasakay ang isang pasahero patungong Bali matapos siyang harangin sa airport dahil sa punit sa kaniyang passport.

Kaugnay nito, sinabi ni Transportation Secretary Vince Dizon na papatawan ng parusa ang mga airline at tauhan nito na sangkot sa anumang insidente ng pagsira sa pasaporte ng mga pasahero.

Pinaalalahanan naman ng DOTR ang mga pasahero na tiyakin ang validity at kondisyon ng kanilang pasaporte bago bumyahe.

Nakatakdang magtipon-tipon ang mga Catholic Cardinal upang pumili ng bagong Santo Papa, kasunod ng pagpanaw ni Pope Francis.

Ayon sa Vatican, sisimulan sa darating na Mayo a-siyete ang conclave o pagpili ng mga kardinal sa susunod na Santo Papa.

Napagdesisyunan ang nasabing petsa sa closed-door meeting ng mga Kardinal sa Vatican.

Kaugnay nito, isinara na sa publiko ang sistine chapel bilang para paghahanda sa Papal Conclave.

Tiniyak ng Malakanyang na sapat ang suplay ng bigas hanggang sa mga susunod na araw matapos dagdagan ng national food authority ang kanilang buffer stock o imbak ng bigas.

Sa press briefing sinabi ni Palace Press Officer Claire Castro na hanggang nitong Abril 24, mayroong mahigit sampung milyong sako ng palay at 1.2-milyong sako ng bigas ang NFA, na sapat sa loob ng sampung araw, na pinakamataas na imbentaryo mula noong 2020.

Tugon aniya ito ng NFA sa direktiba ni Pangulong Ferdinand Marcos Jr., na aktibong bumili ng palay sa mga magsasaka.

Sinabi rin aniya ni NFA Administrator Larry Lacson na may natitira pang labindalawang bilyong pisong pondo ang ahensya na ilalaan sa pagbili ng palay ngayong panahon ng anihan.

Dagdag pa ni Usec. Castro, hindi lang mga magsasaka ang makikinabang sa pagbili ng pamahalaan ng palay, kundi maging ang publiko dahil inaasahang magreresulta ito ng mababang presyo ng bigas sa mga pamilihan.—ulat mula kay Gilbert Perdez (Patrol 13)

Itinanggi ng Malacañang ang lumabas na ulat na nakuha na ng China ang Sandy Cay, isang maliit na isla na matatagpuan sa pagitan ng Pag-asa Island.

Sa Palace briefing, sinabi ni Palace Press Officer at PCO Undersecretary Claire Castro na noong linggo ay nagsagawa pa ng inter-agency maritime operation ang Pilipinas sa Pag-asa Cays 1, 2, at 3.

Pinasinungalingan din aniya ni National Security Council Assistant Director General Jonathan Malaya na kontrolado ng nasabing bansa ang Sandy Cay.

Muli namang binigyang diin ng palasyo na nagpapatuloy ang pagdepensa sa karapatan ng Pilipinas sa West Philippine Sea.—ulat mula kay Gilbert Perdez (Patrol 13)

Naniniwala si Vice President Sara Duterte na kabilang siya sa mga personalidad na posibleng ipaaresto ng International Criminal Court.

Ayon sa Bise Presidente, may nakalap silang impormasyon at kabilang siya sa listahan ng mga nais ipaaresto ng ICC.

Sumagi aniya sa kanyang isip ang posibilidad na ipaaresto rin siya nang unti-unting higpitan ang kanyang pagdalaw sa amang si dating Pangulong Rodrigo Duterte na nakakulong sa ICC sa The Hague, Netherlands.

Maliban sa kanya, nasa listahan din aniya sina Senador Bong Go, Senador Ronald Dela Rosa at ilang mga dating opisyal ng Philippine National Police.

Nagsampa na ng kasong qualified human trafficking ang Department of Justice laban kina dating presidential Spokesman Harry Roque, Cassandra Li Ong, at mahigit 40 iba pa.

Kaugnay ito ng ni-raid na Lucky South 99 POGO firm sa Porac, Pampanga.

Ayon kay Justice Usec. Nicholas Felix Ty, isinampa ang kaso sa Angeles City Regional Trial Court.

Inutos na rin aniya ni Justice Sec. Jesus Crispin Remulla na ipaalam sa Netherlands na may nakitang basehan ang doj para kasuhan si Roque.

Inaasahan namang ililipat ang kaso sa Pasig Regional Trial Court, kung saan dinidinig ang kaso ni Alice Guo kaugnay ng operasyon ng POGO sa Bamban, Tarlac.

Umakyat na sa mahigit 7,000 indibidwal o katumbas ng 14,000 pamilya ang naapektuhan ng pagputok ng Bulkang Bulusan.

Batay sa pinakahuling tala ng Department of Social Welfare and Development Field Office, may pinakamaraming apektado ay mula sa bayan ng Irosin na nakapagtala ng 8,158 pamilya o 40,776 katao mula sa 22 barangay.

Sinundan naman ng Juban, na may 2,934 pamilya o 14,671 katao mula sa 10 barangay habang 1,925 pamilya o 9,625 katao sa Casiguran.

Samantala, dalawang bayan ang nakapagtala ng mga residenteng nailikas sa mga evacuation centers, kabilang ang Irosin, na may 6 na pamilya at labing tatlong pamilya sa Juban.

Patuloy namang nagsasagawa ng koordinasyon ang mga lokal na pamahalaan, DSWD, at iba pang ahensya ng gobyerno upang matiyak ang kaligtasan at mga pangangailangan ng mga naapektuhang residente.