NATIONAL NEWS

Pumalo na sa sampung libong hinihinalang trolls ang na-monitor ng Philippine Coast Guard.

Ayon sa PCG, sangkot ang mga troll na ito sa pagpapahayag ng oposisyon sa pag-angkin ng Pilipinas sa West Philippine Sea.

Sinabi ni PCG Spokesman for WPS Commodore Jay Tarriela, nasa isanlibo lamang ang kanilang naitala nang simulan nila ang pag-monitor sa mga troll na ngayon ay tumaas na aniya ng sampung beses.

Paliwanag ni Commodore Tarriela, nahahati sa tatlong lebel ang mga troll, kabilang dito ang influencers o initiators, disseminators, at reposters.

Kabilang aniya sa mga ipinakakalat ng mga nasabing keyboard warrior na pinangungunahan ng Amerika ang laban ng Pilipinas para sa WPS. – sa panulat ni John Riz Calata

Tiniyak ng Department of Labor and Employment-Manila Field Office na magsasagawa na sila ng buwanang job fair.

Ayon kay DOLE Manila Field Office Director Atty. Joel Petaca, ito ay bilang tugon sa direktiba ni Pangulong Ferdinand R. Marcos Jr.

Sa nasabing programa, makatutuwang ng DOLE ang Public Employment Service Office ng Maynila at iba pang mga lungsod sa pagbibigay ng oportunidad, at disente at maayos na trabaho.

Nilinaw ni Atty. Petaca na bukod pa ang buwanang job fair sa regular na job fair na alok ng peso kung saan hangad ng pamahalaan na magkaroon ng mas maraming pagkakataon ang mga Pilipino na magkatrabaho sa pamamagitan ng mga nasabing programa.

Batay sa datos ng ahensya, sa pagsisimula ng administrasyong Marcos hanggang nitong nakaraang Pebrero ay nasa 170,000 na ang hired-on-the-spot sa higit 4,000 na job fair na ikinasa sa buong Pilipinas. – sa panulat ni John Riz Calata

Ipinasuspinde na ni Transportation Secretary Vince Dizon ang operasyon ng lahat ng bus ng Solid North na sangkot sa karambola ng mga sasakyan sa Tarlac City Toll Plaza sa SCTEX.

Ayon kay Secretary Dizon, epektibo ang suspensyon ng nasabing kumpanya sa loob ng tatlumpung araw.

Bukod dito, sinabi ng kalihim na sasampahan nila ng mga kaukulang kaso ang kumpanya at driver ng nakasagasang bus.

Nabatid na ang naturang karambola ay nagresulta sa pagkamatay ng sampung indibidwal at mahigit tatlumpung sugatan. – sa panulat ni John Riz Calata

Naaalarama si House Committee on Basic Education and Culture Chairman at Pasig City Representative Roman Romulo sa ulat na mataas na bilang ng mga ‘functional illiterate’ o hirap umunawa sa pagbabasa ang mga senior at junior high school graduate noong nakaraang taon.

Kasunod ito ng inilabas ng Philippine Statistics Authority sa pagdinig ng Senado na aabot sa halos labing siyam na milyong Pilipino na nagtapos ng nasabing baitang ang hirap umunawa.

Inamin sa DWIZ ni Congressman Romulo na mali ang education system ng bansa dahil sa labis na aralin ng mga mag-aaral.

Kaya naman umapela ang mambabatas sa deped na dapat paganahin na ang National Educators Academy of the Philippines upang sanayin ang mga guro sa pagtuturo ng mga basic sa pagbabasa at pagsusulat.

‘Traumatic brain injury’ ang sinasabing ikinasawi ng ilang biktima ng karambola ng limang sasakyan sa Subic-Clark-Tarlac-Expressway Toll Plaza.

Ito ang sinabi ni Doctor Jasper Carpio, Resident Surgeon ng Tarlac Provincial Hospital.

Ayon naman kay Tarlac Provincial Disaster Risk Reduction and Management Office Head Marvin Guiang, inabot ng dalawang oras ang retrieval and rescue operations sa mga biktima.

Samantala tatlo sa tatlumpu’t pitong sugatan ang patuloy pa ring mino-monitor ng ospital habang nakauwi naman na ang ibang biktima. —sa panulat ni Mark Terrence Molave

Kinwestyon ng defense team ni dating Pangulong Rodrigo Duterte ang hurisdiksyon ng International Criminal Court sa dating pangulo na nahaharap sa kasong crimes against humanity dahil sa sinasabing madugong war on drug ng kanyang administrasyon.

Ayon  kina Atty. Nicholas Kaufman at Dr. Dov Jacobs, mga Legal Counsel ng dating pangulo, wala sa posisyon ang ICC na ipatupad ang hurisdiksyon sa dating opisyal dahil kumalas ang bansa sa Rome Statute.

Sa jurisdiction anila ng Rome Statute, malinaw na nakasaad dito na ang isang estado ay dapat state party oras na ipatupad ang hurisdiksyon.

Gayunman,  una nang binigyan-diin ng International Court na pinananatili nito ang hurisdiksyon sa mga krimen na sinasabing ginawa sa Pilipinas habang ang bansa ay isang state party sa statute.—sa panulat ni Kat Gonzales

Inatasan ni Pangulong Ferdinand Marcos Jr. ang Department of Labor and Employment na magkasa ng buwanang job fair, upang madagdagan ang bilang ng mga Pilipinong mayroong trabaho.

Ayon sa Pangulo, mula July 2022 hanggang February 2025, nasa higit 4,000 job fairs na ang isinigawa ng gobyerno, na nilahukan ng higit isang milyong Pilipino.

Dagdag pa ng Pangulo, hindi na lamang basta job fair ang ipinatutupad ng kanyang administrasyon dahil  nilalagyan na rin aniya nila ito ng one stop shop, kung saan ang serbisyo ng gobyerno na kakailanganin ng job seekers ay inilapit na rin sa publiko.

Sa pakikipagtulungan na rin ito ng iba pang government offices, tulad ng BIR, NBI, PSA, PRC, SSS, Pag-IBIG, at PhilHealth.

Sinabi ng pangulo na batid ng gobyerno ang pangangailangan na maging matatag ang pundasyon ng mga manggagawa.—sa panulat ni John Riz Calata

Mas mababang interes na ang maaaring asahan ng mga miyembro ng Social Security System (SSS) na mag-a-apply ng loan simula sa Hulyo.

Ito ay inanunsyo mismo ni Pangulong Ferdinand Marcos, Jr., kung saan mula sa dating 10% ay bababa na sa 8% ang interest para sa salary loan, at 7% naman sa calamity loan ng mga miyembrong may malinis na record.

Simula Setyembre naman, palalawigin na ang pension loan program kung saan pwede na ring umutang ng hanggang 150,000 pesos ang mga surviving spouse o naiwang asawa ng mga yumaong pensioner.

Ayon sa Pangulo, nakikipag-ugnayan na rin ang sss sa ilang financial institutions para pag-aralan ang pagkakaroon ng micro-credit loan facility para matugunan ang agarang pinansyal na pangangailangan ng kanilang mga miyembro.—sa panulat ni John Riz Calata

Tiniyak ni Pangulong Ferdinand Marcos Jr. na hindi isinasantabi ng pamahalaan ang hirit na taas-sahod ng mga manggagawa.

Ayon kay Pangulong Marcos, ang nasabing panawagan ay tinutugunan ng Regional Tripartite Wages and Productivity Board na aniya’y patuloy na nag-aaral sa antas ng pasahod sa bawat rehiyon.

Sinabi ng Pangulo na bagamat masarap pakinggan ang matatamis na pangako hinggil sa wage increase, ay kailangan pa ring timbangin ang epekto nito.

Kabilang aniya rito ang epekto nito sa paglago ng negosyo, trabaho, at ekonomiya, kaya’t hindi talaga maiiwasang pag-aralan muna ang pagpapatupad ng dagdag-sahod.

Kaugnay ng usaping wage hike, ibinida ng pangulo na mula noong Hunyo ng nakaraang taon, nasa 16 na rehiyon na sa bansa ang nakapagpatupad ng wage hike.—sa panulat ni John Riz Calata

Itinanggi ng Philippine National Police na may nagaganap na operasyon ang pulisya sa bahay ni dating Pangulong Rodrigo Duterte sa Davao City.

Ayon kay PNP Spokesperson Brig. General Jean Fajardo, ito ay matapos kumalat sa social media na mayroong mahigit 100 tauhan ng Criminal Investigation and Detection Group at Special Action Force ang nagmo-monitor sa tahanan ng dating pangulo.

Sinabi Brig. General Fajardo na maging sila ay nagtataka kung saan nakuha ni Davao City 1st District Rep. Paolo Duterte ang kumakalat na ulat. —sa panulat ni John Riz Calata