NATIONAL NEWS

Target ng pamahalaan na mas paigtingin pa ang earthquake preparedness efforts nito sa pamamagitan ng pagpapalawak sa maliit na grupo ng trained emergency responders upang umalalay sa posibleng pagtama ng “The Big One” sa kalakhang Mega Manila.

Binigyang diin ni Office of Civil Defense Chief Undersecretary Ariel Nepomuceno na dapat nang ikasa ang agarang paghahanda dahil sa maaaring idulot ng matinding pagyanig sa metro manila at mga karatig lugar.

Aniya, mahigpit dapat na ipatupad ang pagtutok sa national building code para i-upgrade ang construction standards ng mga gusali; at upang maiwasan ang pagtatayo ng imprastraktura sa mga high risk areas.

Target din ng ahensya na paigtingin ang ugnayan sa AFP, MMDA, Coast Guard, at red Cross para madagdagan ang bilang ng mga trained personnels.  —sa panulat ni Jasper Barleta

Iginiit ng National Center for Commuters’ Safety and Protection Incorporated ang kahalagahan ng mental preparedness para sa mga driver.

Kasunod ito ng mga vehicular accidents kamakailan na ikinasawi ng ilang indibidwal.

Sa panayam ng DWIZ, ibinahagi ni Commuter’s Safety and Protection Chairperson Elvira Medina ang ilang mungkahi at paalala para sa mga motorista upang makaiwas sa mga aksidente.—sa panulat ni Jasper Barleta

Naniniwala si Senate Committee on Basic Education Chairman Sherwin Gatchalian na isa sa mga sanhi ng kahirapan ng bansa ay ang pagkakaroon ng “Functional illiterate” na mga estudyante.

Ito ayon kay Senador Gatchalian, sa panayam ng DWIZ, ay matapos lumutang sa pagdinig ng senado ang datos ng Philippine Statistics Authority kung saan aabot sa halos labing siyam na milyong Pilipino na nagtapos ng senior at junior high school ang hirap umunawa, magsulat at magbilang.

Dahil dito, binigyang-diin ni Senador Gatchalian na kailangan nang aksyunan ng Department of Education ang nasabing isyu.—sa panulat ni John Riz Calata

Pinasinungalingan  ng Commission on Elections ang mga kumakalat na ulat na nagsasabing nakakonekta sa internet ang mga vote-counting machine habang isinasagawa ang 2025 midterm elections.

Ayon kay COMELEC Spokesman John Rex Laudiangco, hindi nakokonekta sa internet ang mga VCM sa kasagsagan ng halalan.

Paliwanag ni Spokesman Laudiangco, kinokonekta lamang ang mga nasabing makina matapos ang pagboto at pag-imprenta ng mga election return, upang maipadala ang mga resulta.

Agad din aniyang ipo-post sa official website ng COMELEC ang mga resulta mula sa bawat presinto para makita agad ng publiko.

Dahil dito, pinayuhan ni Spokesman Laudiangco ang mga botante na maging mapanuri sa mga lumalabas na impormasyon at magtiwala sa mga otoridad.—sa panulat ni John Riz Calata

Posibleng umabot ng hanggang tatlong araw ang conclave o ang pagpili sa susunod na Santo Papa.

Ito ayon kay Salvadoran Cardinal Gregorio Rosa Chavez kung saan inaasahang magiging mabilis ang proseso ng pagpili sa bagong lider ng Simbahang Katolika.

Samantala, mahigit sa 100 cardinal electors naman ang inaasahang lalahok sa closed-door voting na karaniwang ginagawa sa Sistine Chapel sa Vatican.

Ang nasabing mga Cardinal Electors ay pawang may edad na mas mababa sa 80-anyos at may karapatang makaboto para ma-appoint ang bagong santo papa.—sa panulat ni Jasper Barleta

Ilang araw bago ang halalan, lumabas sa resulta ng isang survey na nangungunang alalahanin ng mga botanteng Pilipino ang pagkakaroon ng abot-kayang presyo ng mga bilihin at serbisyo.

Batay sa survey ng OCTA Research, 53% ng mga respondent ang nagsabi na nais nilang bumaba ang presyo ng mga bilihin; habang 50% naman ang pabor sa mas maayos na healthcare system sa bansa.

47% naman ng mga botante ang prayoridad ang pagpapalakas sa sektor ng agrikultura; 41% naman ang nais na dumami ang oportunidad para sa mga manggagawa; at 38% ang gustong matugunan ang kahirapan sa bansa.

Isinagawa ang survey sa 1,200 respondents noong Abril 10 hanggang Abril 16.—sa panulat ni John Riz Calata

Iginiit ng Department of Education na kailangan nang malinang ang literacy skills ng mga batang Pilipino mula kindergarten hanggang ika-tatlong baitang.

Ayon sa DEPED, layon nitong bigyang-pansin sa maagang panahon ang foundational skills ng mga mag-aaral tulad ng literacy, numeracy, at socio-emotional skills.

Nabatid na lumutang sa pagdinig ng Senado ang datos ng Philippine Statistics Authority kung saan aabot sa halos 19 na milyong Pilipino ang nagtapos ng junior at senior highschool ang hirap umunawa.—sa panulat ni Mark Terrence Molave

11 Persons Deprived of Liberty at 25 ex-inmates mula sa Quezon City Jail Male Dormitory ang nakapagtapos na ng senior high school.

Ito ay sa ilalim ng programang education behind bars ng Bureau of Jail Management and Penology.

Ayon sa QCJMD, ang tagumpay ng mga PDL ay isang mahalagang patunay na mahihigitan ng edukasyon ang anumang balakid.

Anila’y, isang magandang pagkakataon para sa mga indibidwal ang makapagtapos ng high school at magsimula ng maayos na buhay.

Kaugnay nito, hinimok ni Alternative Learning System Supervisor Roger tamondong ang mga bagong graduate na ipagpatuloy ang bagong buhay para sa kanilang sarili at upang maging mabuting bahagi ng lipunan anupaman ang kanyang nakaraan. —sa panulat ni Mark Terrence Molave

Tinabla ni International Criminal Court Assistant to Counsel Atty. Kristina Conti ang paghamon ng defense team ni dating Pangulong Rodrigo Duterte sa ICC at ang pagkwestyon sa hurisdiksyon ng naturang korte sa Pilipinas.

Ayon kay Atty. Conti, na tumatayo rin bilang legal counsel ng mga biktima ng drug war campaign ni Duterte sa halip na diretsahang sagutin ng kampo ng dating pangulo ang mga reklamo kaugnay sa kampanyang ipinatupad nito ay inililihis ng mga ito ang usapin.

Iginiit ng abugado na alinsunod sa Rome Statute, hindi sapat na basehan ang withdrawal ng isang bansa upang maibasura ang mga kasong naihain na bago pa ito kumalas sa ICC.

Dagdag pa ng Abugado, sa puntong ito, ang prosecutor at ang defense team ni Duterte ang magkalaban ngunit sinabi ni Atty. Conti na maaari pa ring makialam ang mga biktima.

Gayunman, naninindigan pa rin ang abugado na ang ICC ay may hurisdiksyon sa Pilipinas.

Nabatid na ang dating pangulo ay nasa kustodiya ng ICC dahil sa kasong crimes against humanity bunsod ng ipinatupad na giyera kontra droga sa ilalim ng kanyang administrasyon.—sa panulat ni John Riz Calata