NATIONAL NEWS

Mahigit labing anim na libong miyembro ng philippine Army ang idineploy sa buong bansa para tiyakin ang seguridad sa 2025 midterm elections.

Ayon sa Philippine Army, itinalaga ang mga ito sa mahigit anim na raang checkpoints at mahigit animnapung libong polling precincts.

Ito’y bilang bahagi ng pinaigting na inter-agency coordination sa pagitan ng AFP, COMELEC, at PNP upang maiwasan ang anumang banta ng karahasan, kaguluhan, o electoral sabotage.

Tiniyak naman ni Philippine Army Commanding General Lieutenant General Roy Galido na sumailalim sa briefing ang mga idineploy na sundalo kaugnay sa kanilang tungkulin at Philippine Army guidelines, alinsunod sa Omnibus Election Code.

Hiniling ng Commission on Elections kay Pangulong Ferdinand Marcos Jr., na ideklarang holiday ang 2025 midterm elections.

Ito’y ayon kay COMELEC Chairman George Garcia, para mabigyan ng pagkakataon ang mga botante na makaboto sa halalan sa darating na Lunes.

Bagama’t idineklarang special non-working holiday ang mga nakaraang eleksyon, mangangailangan pa rin aniya ito ng deklarasyon mula sa Office of the President.

Sa ngayon, wala pang tugon ang palasyo kaugnay sa naturang hiling ng COMELEC.

Sinimulan na ng Kamara ang paghahanda para sa ika-apat na State of the Nation Address (SONA) ni Pangulong Ferdinand Marcos Jr.

Ayon kay House Secretary General Reginald Velasco, nakiisa sa pagpupulong ang senate counterparts, maging ang mga opisyal mula sa Philippine National Police; Armed Forces of the Philippines; Metropolitan Manila Development Authority; at Department of Foreign Affairs upang talakayin ang preparasyon sa seguridad at listahan ng mga dadalong bisita.

Inaasahang aabot sa dalawang libong indibidwal ang iimbitahan sa SONA, gaya noong nakalipas na taon.

Dagdag pa ni Sec. Gen. Velasco, may nakalaan pa ring upuan para kay Vice President Sara Duterte, dumalo man ito o hindi sa sona ng pangulo.

Samantala, nakatakda namang pag-usapan sa susunod na pagpupulong ang seating plan kung saan, inaasahang makapagsusumite na ng initial list ang senado para sa kanilang mga iimbitahan sa ika-apat na ulat sa bayan ni Pangulong Marcos.—ulat mula kay Geli Mendez (Patrol 30)

Tiniyak mismo ni Pangulong Ferdinand Marcos Jr., na tuloy-tuloy ang mga ginagawang hakbang ng pamahalaan para sa sektor ng agrikultura, na nadatnan na nilang mahina at nababalutan ng maraming isyu.

Kabilang na aniya rito ang kakulangan ng suporta sa mga magsasaka at hindi matatag na presyo ng pagkain.

Sa kabila nito, sinabi ng Presidente na sa nakalipas na dalawang taon, nakapagtayo na ang pamahalaan ng 150 rice processing plant at target na matapos ang dalawampung iba pa ngayong taon.

Bukod pa rito, sisimulan na rin ang limampu pang rice processing plant bilang bahagi ng ginagawang pagsasaayos sa sektor ng agrikultura ng bansa.—ulat mula kay Gilbert Perdez (Patrol 13)

Kinumpirma mismo ng Malakanyang na nagpatawag si Pangulong Ferdinand Marcos Jr. ng spiritual session noong weekend sa mga miyembro ng kanyang gabinete.

Sa press briefing sa Malakanyang, sinabi ni Palace Press Officer Usec. Claire Castro na nabigyan ng spiritual guidance ang mga miyembro ng gabinete at iba pang opisyal ng pamahalaan, hindi lamang para sa kanilang pagsisilbi sa pamahalaan o bilang public servants, kundi bilang isang indibidwal.

Pinangunahan aniya ni Father Tito Caluag ang spiritual session para sa mga cabinet member.

Dagdag pa ni Usec. Castro, isang pagkakataon din ito na nagkasama-sama ang pangulo at lahat ng kanyang mga gabinete.—ulat mula kay Gilbert Perdez (Patrol 13)

Maaaring imbestigahan at i-disqualify ng Commission on Elections ang mga kandidato na  mapatutunayang tumatanggap ng pondo at tulong  mula sa mga dayuhan.

Sinabi ito ni COMELEC Chairman George Garcia, sa pagdinig ng Senado kaugnay sa mga sinasabing spying activities, at pag-impluwensya sa darating na halalan sa bansa.

Maaari aniyang maging grounds ng disqualification kapag napatunayang tumatanggap ang isang kandidato ng financial assistance mula sa foreign entity o national.

Motu propio o kusa at sariling desisyon aniya ng poll body ang pag-iimbestiga sa foreign funding sa kandidato.

Kapag nanalo naman ang kandidato, maaari itong hindi iproklama ng COMELEC ngunit kapag napatunayan ang pagtanggap ng pondo matapos ang proklamasyon, dadaan na ito sa korte.—ulat mula kay Cely Ortega-Bueno (Patrol 19)

Kinumpirma ni Palace Press Officer Undersecretary Claire Castro na dadalo si Pangulong Ferdinand Marcos Jr., sa Association of Southeast Asian Nations o ASEAN Summit sa Kuala Lumpur, Malaysia.

Gaganapin ang nasabing summit mula Mayo 26 hanggang 27.

Ayon kay Usec. Castro, ang pagdalo ng presidente sa ASEAN Summit ay bahagi ng patuloy na pakikilahok ng Pilipinas sa mga usaping may kinalaman sa ekonomiya, seguridad, at kooperasyong pang-rehiyon.

Matatandaang noong Biyernes, nagkausap sa telepono sina Pangulong Marcos at Malaysian Prime Minister Anwar Ibrahim, kung saan tinalakay ng dalawa ang mga pangunahing isyu sa rehiyon, kabilang na ang pagbangon ng Myanmar matapos ang malakas na lindol, at ang patakaran ng estados unidos sa taripa na may epekto sa kalakalan sa Timog-Silangang Asya.

Ipatutupad na ang mandatory drug testing sa lahat ng puv drivers.

Kasunod ito ng mga naitalang aksidente at road rage sa bansa.

Sa panayam ng DWIZ, sinabi ni Transportation Assistant Secretary at Spokesman Mon Ilagan, na pipirmahan na lamang ni Transportation Secretary Vince Dizon ang isang department order para sa pagkakaroon ng regular na mandatory drug test sa lahat ng PUV drivers.

Maliban dito, hiniling din ng Kalihim sa Land Transportation Franchising and Regulatory Board at Land Transportation Office na rebisahin ang maximum consecutive driving hours mula sa kasalukuyang anim na oras at gawin itong apat na oras.

Kung mahaba naman ang biyahe, mandated ang mga bus company na maglagay ng karelyebong driver na hiwalay pa sa konduktor.

Target limitahan ng Department of Transportation sa anim na oras ang pagmamaneho ng mga drivers.

Ito ayon kay Department of Transportation Spokesman, Asst. Secretary Mon Ilagan ay upang matiyak ang driving worthiness ng mga motorista matapos ang karambola sa SCTEX-Tarlac at insidente sa  NAIA terminal 1.

Sa gitna ng sunod-sunod na trahedya ng bangaan na ikinamatay ng ilan, binigyang diin ng tagapagsalita na  planong repasuhin ng ahensya ang kanilang road safety action plan upang mapaigting ang kaligtasan ng publiko.—sa panulat ni Jasper Barleta