NATIONAL NEWS

Bumaba ang bilang ng mga Pilipinong itinuturing ang kanilang sarili bilang mahirap.

Ito ayon sa april 2025 OCTA Research survey kung saan 42 percent ng mga mamamayan o tinatayang 11.1 milyong pamilyang Pilipino ang nagsasabing sila ay mahirap mula sa 50% noong November 2024 o mahigit sa 13.2 milyong pamilya.

Ang naturang survey ay isinagawa mula noong ika-sampu hanggang ika-labing anim ng Abril, na nagpapakita ng 8% pagbaba sa kabila ng mga pamilyang nag-uulat ng kahirapan.

Kasabay nito, bumaba rin ang self-rated food poverty sa 35% o 9.2 milyong pamilya kumpara sa 49% o 12.9 milyong pamilyang pilipinong nakararanas ng kakapusan sa pagkain noong november 2024.

Samantala, nakaranas din ng pagbaba sa self-rated hunger ng mga Pilipino kung saan 13 percent o 3.4 milyong pamilya mula sa 16% o 4.2 milyong pamilya noong Nobyembre ng nakaraang taon.

Ang mga datos na nakalap ay indikasyon ng unti-unting pagbuti ng kalagayan ng mga pamilyang Pilipino, habang patuloy pa rin ang hamon na matugunan ang isyu ng kahirapan at kagutuman sa bansa.—sa panulat ni Jasper Barleta

Posibleng hindi na kakailanganin ang mga magsasaka sa Pilipinas.

Ito ang ikinababahala ni Raul Montemayor, National Manager ng Federation of Free Farmers Cooperatives Incorporated dahil sa patuloy na pag-angkat ng pamahalaan ng bigas.

Sa panayam ng DWIZ, sinabi ni Montemayor, na umabot sa tatlo hanggang  kwatro pesos ang ibinaba ng presyo ng palay, na nagiging dahilan ng pagkalugi ng mga magsasaka.

Samakatuwid, bumagsak sa trese hanggang 15 pesos ang presyo ng palay ngayong taon, na mas mababa kumpara sa 18 pesos noong 2024.

Isa sa tinitignang dahilan ng pagbagsak ng presyo ng palay ay ang sobrang supply ng bigas dahil sa importasyon, paglakas ng piso kontra dolyar at bagsak-presyo ng imported rice.

Nasa 30 Public School Teachers sa Bangsamoro Autonomous Region In Muslim Mindanao ang nag-withdraw bilang mga election registration board members para sa 2025 midterm elections.

Ito ay kinumpirma mismo ni BARMM Election Director Ray Sumalipao, kung saan napag-alamang boluntaryong umatras ang mga nasabing Guro dahil sa sinasabing personal na relasyon ng mga ito sa ilang kandidato.

Sa kabila nito, aalalay naman ang ilang opisyal ng Philippine National Police upang punan ang puwesto ng mga guro na umatras sa serbisyo.

Samantala, ibinahagi rin ni Election Director Sumalipao na nasa 18 Guro naman ang nag-withdraw bilang Electoral Board Members sa Lanao Del Sur.

Bahagyang bumilis ang ekonomiya ng bansa sa unang quarter ng 2025.

Ito ayon sa Philippine Statistics Office, kung saan umabot sa 5.4% ang gross domestic product growth ng pilipinas sa unang quarter ng taon, mas mabilis kumpara sa 5.3% noong huling quarter ng 2024.

Sinabi ni PSA Chief at National Statistician Claire Dennis Mapa, ito ang pinakamabilis na GDP growth ng bansa mula noong ikatlong quarter ng 2024.

Mas mababa naman ito kumpara sa unang quarter ng nakaraang taon na 5.9%.

Iginiit ng Provincial Bus Operators Association na hindi praktikal ang regular drug testing sa mga driver ng pampublikong transportasyon.

Ayon kay Provincial Bus Operators Association Executive Director Alex Yague, mas mainam na magpatupad na lamang ng surprise random drug tests sa mga tsuper upang malaman kung sino ang gumagamit ng ilegal na droga.

Una na ring kwinestyon ng grupong PISTON at ilang mambabatas ang nasabing direktiba ng Department of Transportation.

Matatandaang kabilang ang mandatory drug testing sa mga hakbang ng DOTR bilang tugon sa ilang trahedya sa kalsada na nangyari kamakailan.

Tiniyak ng Malacañang na hindi tatakbuhan ng mga opisyal ng pamahalaan ang utos ng Office of the Ombudsman na magpaliwanag kaugnay ng pag-aresto kay dating Pangulong Rodrigo Duterte.

Sa press briefing, siniguro ni  Palace Press Officer Undersecretary Claire Castro na tutugon ang mga nasabing opisyal sa pamamagitan ng counter affidavit na kanilang ihahain sa Ombudsman.

Malinaw aniya ang direktiba ni Pangulong Ferdinand Marcos Jr. sa mga opisyal na sundin ang tamang proseso sa pagsagot sa utos ng anti-graft body, basta’t valid o legal.

Muli namang iginiit ni Usec. Castro na naaayon sa batas ang mga ginawa at partisipasyon ng mga opisyal sa pag-aresto sa dating pangulo.

Matataang kabilang sa mga pinagpapaliwanag ng ombudsman sina Justice Sec. Jesus Crispin Remulla, Interior Sec. Jonvic Remulla, PNP Chief General Rommel Marbil, PNP-CIDG Chief Major General Nicolas Torre III, at Special Envoy for Transnational Crimes Markus Lacanilao.

Handa na rin ang Department of Education para sa halalan sa Lunes.

Sa press briefing sa Malacañang, sinabi ni Palace Press Officer at PCO Usec. Claire Castro na batay sa report sa palasyo ni Education Secretary Sonny Angara, magkakaroon sila ng nationwide deployment ng election task force simula sa Linggo, Mayo 11.

Kabilang aniya sa magiging tungkulin ng task force ang pagsasagawa ng real-time monitoring sa sitwasyon ng mga guro sa buong bansa.

Maliban dito, handa na rin ang pondo para sa honoraria ng mga gurong magsisilbing board of election inspectors at mayroon na ring pondo na gagamitin para sa paglilinis ng mga paaralan bago at pagkatapos ng eleksyon.