NATIONAL NEWS

Target ng pamahalaan na sa pagsapit ng 2028 ay wala nang mahihirap na Pilipino ang nagugutom.

Sinabi ni Social Welfare Secretary Rex Gatchalian na ito ang pangunahing utos ni Pangulong Ferdinand Marcos Jr. kaya inilunsad ang Walang Gutom Program o Food Stamp Program.

Sinabi ni Sec. Gatchalian na buo ang suporta ng pangulo sa programa.

Sa katunayan aniya ay sadyang pinaglaanan na ito ng pondo hanggang 2028 sa ilalim ng pambansang budget.

Dagdag pa ng Kalihim, inaprubahan ng neda ang programa kaya mayroon na itong sariling line item sa budget.

Kaya naman araw-araw aniya ay sinisikap nilang gawin at magkaroon pa ng improvements sa programa.

—sa panulat ni John Riz Calata

 Walang quota system at walang papatayin.

Ito ang binigyang-diin ni Philippine National Police Chief Gen. Nicolas Torre III sa publiko matapos ulanin ng kwestyon ang kanyang direktiba sa mga pulis na magparamihan ng pag-aresto ng mga drug suspects.

Sa press briefing sa Malacañang, nilinaw ni Gen. Torre na hindi lang limitado sa mga drug suspect ang kanyang direktiba, kundi sa lahat ng mga kriminal, para malinis ang komunidad at mga lansangan mula sa banta ng kriminalidad

—sa panulat ni John Riz Calata

Maliban sa Kadiwa Centers, mabibili na rin ang 20 pesos na kada kilong bigas sa accredited retailers ng Walang Gutom Program.

Ayon kay Social Welfare Secretary Rex Gatchalian, naibigay na nila sa Department of Agriculture ang listahan ng accredited retailers.

Dahil dito, makakabili rin ng murang bigas ang mga benepisyaryo ng walang gutom program.

Binigyan-diin ng Kalihim na dahil makakamura ang mga benepisyaryo sa bigas, madaragdagan ang kanilang mabibili sa 3 thousand pesos na food vouchers.

Nabatid na ang nasabing programa ay parte ng kampanya ng pamahalaan laban sa gutom at malnutrisyon.

Sa ilalim nito, may ipinamamahagi ang DSWD na electronic food vouchers sa household beneficiaries.

 Tiniyak ni Pangulong Ferdinand Marcos Jr. na hindi hihinto ang kanyang administrasyon sa pag-iimplementa ng mga programang makabubuti para sa mga magsasaka sa bansa.

Sinabi ng Pangulo na sa bawat programang kanilang ginagawa para sa mga pinoy farmers ay naroon ang pag-asang maramdaman ng mga ito ang pagpapahalaga sa kanila ng pamahalaan.

Inilarawan ng presidente ang mga magsasaka bilang haligi ng bansa at bumubuhay sa sambayanang Pilipino.

Dagdag pa ni Pangulong Marcos, batid at dama ng pamahalaan ang hirap at sakripisyo ng mga ito, habang positibo din ang pangulo na sa pamamagitan ng pagkakaisa ay matutupad ang pangarap na pagkain sa bawat mesa, hanapbuhay na sapat sa araw-araw, at kinabukasang puno ng pag-asa.

Nangako ang Philippine National Police na kanilang pagsusumikapan ang pagpapanatili ng kaayusan at kapayapaan sa bansa.

Kaugnay nito, binigyan-diin ni PNP Chief General Nicolas Torre III, na magpapatupad sila ng three minute emergency response time.

Layon nitong maipadama ang presensiya ng mga pulis sa komunidad, alinsunod na rin sa direktiba ni Pangulong Ferdinand Marcos Junior na  dapat maramdaman ng publiko ang mga pulis.

Aminado naman ang bagong hepe ng pambansang pulisya na na mahirap makumbinsi ang publiko na bumababa ang antas ng krimen sa bansa batay sa mga hawak nilang datos.

Gayunman, iginiit ni General Torre na hindi titigil ang kanilang hanay sa pagtitiyak ng kaligtasan ng publiko.

Malaki ang inaasahan ni Pangulong Ferdinand Marcos Jr. sa magiging performance ng mga miyembro ng gabinete na pinanatili nito sa pwesto.

Sinabi ni Executive Secretary Lucas Bersamin na dahil hindi tinanggap ng pangulo ang courtesy resignation ng maraming cabinet members sa mga pangunahing kagawaran, inaasahan ng pangulo na maibibigay ng mga ito ang pinakamataas na ‘degree of performance’ dagdag pa ni Executive Sec. Bersamin na kailangang ianunsyo ang mga pangalan ng mga pinanatili sa pwesto upang matigil na ang harassment na nararanasan ng ilan sa mga ito mula sa iba’t ibang grupo o quarters.

Ayon sa Kalihim, ang hakbang na ito ay para mabigyan ng simpleng hustisya ang mga miyembro ng gabineteng nanatili sa pwesto.

Idinepensa ni Executive Secretary Lucas Bersamin ang pasya ni Pangulong Ferdinand Marcos Jr. na panatilihin sa pwesto ang karamihan sa mga cabinet secretaries o mga pinuno ng mga pangunahing kagawaran ng gobyerno.

Sa gitna ito ng ilang komento mula sa iba’t ibang sektor na halos wala namang nagbago sa gabinete ng pangulo dahil karamihan pa rin sa mga ito ang nanatili sa pwesto.

Paliwanag ni Executive Sec. Bersamin, ang Pangulo ay maituturing na isang manager at may sariling levels of achievements na tinitingnan sa mga kawani nito.

Ayon sa Kalihim, may expectations o inaasahan ang presidente sa bawat miyembro ng gabinete na malinaw nang sinabi sa mga ito sa simula pa lamang.

Kaya kung nagpasya man aniya si Pangulong Marcos na panatilihin sa pwesto ang sinuman, sinabi ni Executive Sec. Bersamin na ito ay dahil posibleng naabot ng mga ito ang pamantayan na hinahanap ng pangulo.

Binigyan-diin ni Senate Minority Leader Koko Pimentel hindi  pwedeng  optional  sa 20th Congress ang pagsasagawa ng  impeachment trial laban kay Vice President Sara Duterte.

Ayon sa Senador, ang utos ng konstitusyon  sa senado ay forthwith o kaagad na magsagawa ng impeachment trial.

Kapag  nag-convene anya ang Senado bilang impeachment court sa susunod na linggo, hindi ito magsasara kahit pa mag-adjourn na ang sesyon ng kongreso dahil magiging katulad na ito ng Sandiganbayan; electoral tribunals at mga ordinaryong korte na kahit magpalit ang mga hukom magpapatuloy ang paglilitis sa hawak na kaso.

Gayunman, iginiit ni Senador Pimentel na maaring  gumawa ng sariling interpretasyon sa konstitusyon ang mga senador ngunit anya, anuman ang kanilang maging pasya, pagbabayaran nila ito sa taumbayan.

Una rito, sinabi ni Senate President Chiz Escudero na   nakasalalay sa mga senador sa susunod na Kongreso kung itutuloy o hindi ang paglilitis.

—sa panulat ni Kat Gonzales

Nangako ang Philippine National Police na kanilang pagsusumikapan ang pagpapanatili ng kaayusan at kapayapaan sa bansa.

Kaugnay nito, binigyan-diin ni PNP Chief General Nicolas Torre III, na magpapatupad sila ng three minute emergency response time.

Layon nitong maipadama ang presensiya ng mga pulis sa komunidad, alinsunod na rin sa direktiba ni Pangulong Ferdinand Marcos Junior na dapat maramdaman ng publiko ang mga pulis.

Aminado naman ang bagong Hepe ng pambansang pulisya na na mahirap makumbinsi ang publiko na bumababa ang antas ng krimen sa bansa batay sa mga hawak nilang datos.

Gayunman, iginiit ni General Torre na hindi titigil ang kanilang hanay sa pagtitiyak ng kaligtasan ng publiko.

—sa panulat ni Kat Gonzales

Lumabas sa isang pag-aaral na 28.8% ng pamilyang Pilipino sa bansa ay naninirahan sa extended o multifamily households, kung saan kasama sa iisang tahanan ang mga kamag-anak na hindi bahagi ng conjugal family.

Ayon sa Philippine Institute for Development Studies, bumaba ang bilang ng nuclear households mula 71% noong 1990 sa 61% noong 2020, habang tumaas naman ang extended at multifamily arrangements mula 25% sa 29% sa parehong panahon.

Ayon kay PIDS Supervising Research Specialist Tatum Ramos, ang ganitong setup ay bunga ng mga estratehiyang pangkabuhayan kung saan nagsasama-sama ang mga pamilya upang magtulungan sa gastusin sa pamumuhay at pabahay.

Dagdag pa niya, sa halip na ituring itong problema, ang extended households ay maaaring ituring na adaptive social strategy na nagpapalakas ng pagtutulungan sa gitna ng mga hamon sa ekonomiya.

—sa panulat ni Jasper Barleta