NATIONAL NEWS

Pinuri ng isang mambabatas ang Bureau of Internal Revenue (BIR) matapos itong magpaalala sa mga establismiyento ukol sa ‘discount privileges’ ng senior citizens at person with disabilities (PWDs) sa pagbili ng kanilang mga pangangailan sa pamamagitan ng text message o online.

Matatandaang sa mga pagdinig ng House Special Committee on Senior Citizens ay isiniwalat ni Senior Citizens Partylist Rep. Rodolfo ‘Ompong’ Ordanes ang mga natanggap niyang reklamo hinggil sa sinasabing hindi pagbibigay ng diskuwento ng maraming establismiyento sa mga senior citizens na gumagamit na ng ‘e-commerce.’

Maliban dito, idinulog din ni Ordanes ang isyu sa Department of Trade and Industry na agad din ipinaalala na ang ‘online at proxy purchases’ ng senior citizens ay sakop ng naaayong diskuwento.

Giti ni Ordanes, base sa Expanded Senior Citizens Act of 2010, ang mga senior citizens ay may pribilehiyo na 20% discount with VAT exemption sa mga produkto at serbisyo.

Ayon sa mambabatas, umigting ang isyu ng hindi pagbibigay ng diskuwento sa senior citizens sa kanilang ‘online purchases’ nang hindi sila palabasin ng bahay dahil sa pandemya.

Batay sa Revenue Memorandum Circular 71-2020 na inilabas ni BIR OIC Marissa Cabreros, ipinag-utos nito sa kanilang field officials na ipatupad ang joint resolution ng pitong ahensya, kasama na ang DTI, Department of Health, Department of Social Welfare and Development at BIR para sa pagsunod ng mga establismiyento sa pagbibigay diskuwento sa senior citizens at PWDs.

Nakatulong ang pag-ulan nitong mga nakalipas na araw para umangat ang antas ng tubig sa Angat dam.
Ayon kay Dr. Sevillo David Jr. Executive director ng National Water Resources Board na nasa 190 meters above sea level na ang lebel ng tubig dito.
Umaasa si David na tataas pa ang antas ng tubig sa dam hanggang sa maabot ang normal level na 212 meters above sea level.
Mahalaga aniyang tumaas ang tubig sa angat dam dahil ito ang nagsusuplay sa 97% ng tubig sa Metro Manila.
Samantala, tiniyak ng National Water Resources Board o NWRB na sapat ang tubig sa dam pero pinayuhan ang publiko na magtipid sa pagkonsumo ng tubig.

Dalawang kaso ng omicron subvariant ng COVID-19 ang naitala sa isang ospital sa Batangas.

Ito ang sinabi ni Dr. Benito Atienza, Philippine Medical Association (PMA) president na dalawa ang nakitaan ng Omicron subvariant na mula sa Canada ang kaslaukuyang ginagamot na sa naturang ospital.

Dagdag pa ni Atienza na hindi ito agad na-detect dahil kakaunti lamang ang nagpapa-test sa COVID-19.

Iminungkahi nito na dapat mas paigtingin muli ang testing, tracing at treatment para hindi na kumalat pa ang panibagong subvariant.

Dahil dito, nagpaalala naman si Atienza sa mga galing sa ibang bansa na mag-self-quarantine at magpasuri pagkarating sa bansa para makasiguro na walang dalang virus.

Naghahanda na ang Philippine National Police (PNP) ng security plan para sa proklamasyon ng susunod na presidente at bise presidente ng bansa.

Ito ang sinabi ni PNP director for operations police major general Val De Leon, matapos ang isinagawang proklamasyon ng 12 senador noong Miyerkules.

Dagdag ni De Leon, titiyakin umano ng PNP na magiging maayos ang transition power sa mga susunod na lider sa June 30.

Samantala, kaugnay nito, sinabi ni De Leon na hindi pa rin sila nagbababa ng alerto at patuloy ang monitoring para sa post-election violence hanggang sa mailuklok sa puwesto ang mga nanalo sa eleksyon.

Pinapayagan na ng Philippine Red Cross (PRC) ang mga walk-ins sa kanilang mga vaccination center para sa pagtuturok ng ikalawang booster shot.

Sinabi ni PRC chairman at CEO Senator Richard Gordon na ito ay para sa mga eligible walk in vaccines.

Hinimok naman ni Gordon ang mga priority groups gaya ng mga health workers at senior citizens na mag-avail sa second booster dose ng PRC vaccination centers.

Kailangan lamang daw magdala ng mga magpapabakuna ng ano mang government-issued id at vaccination cards na nakatanggap na ng unang booster dose at dapat ay apat na buwan na ang nakalilipas.

Wala umanong mangyayari ditong pag-schedule ng mga appointments.

Ani Gordon na libre raw itong ituturok sa mga mamamayang Pilipino.