NATIONAL NEWS

Puspusan na ang ginagawang pagbabantay ng pamahalaan sa mga border ng bansa tungkol sa pagkalat ng monkeypox virus sa ilang western countries.

Bagama’t hindi pa nade-detect ang nasabing virus sa bansa, naghigpit na ang otoridad sa border screening at surveillance.

Pero batay sa inilabas na pahayag ng Department of Health, makakatulong na panlaban sa monkeypox ang kasalukuyang ipinatutupad na COVID-19 measures.

Kabilang na rito ang maayos na pagsusuot ng face mask, magandang bentilasyon, pagpapanatiling malinis ang kamay at pagsunod sa physical distancing.

Mas bumilis pa ang hawaan ng COVID-19 sa Metro Manila.

Ayon sa OCTA Research, umakyat na kasi sa 0.90 ang reproduction number sa  National Capital Region mula noong Mayo 13 hanggang 19.

Mas mataas ito kumpara sa 0.76 na naitala noong Mayo 6 hanggang 12.

Maliban dito, umakyat din ang seven-day average ng mga bagong kaso sa 19% o katumbas ng 71 na kaso ang naitala ng OCTA ngayong linggo na mas mataas din kumpara sa naitalang 59 na kaso noong nakaraang linggo.

Pero paglilinaw ng grupo, nananatili pa ring nasa ‘low risk category’ pagdating sa COVID-19 ang NCR.

Paliwanag ng OCTA, hindi kasi nagbago o nakitaan ng pagtaas ang iba pang indicators gaya ng average daily attack, positivity rate at health-care utilization rate.

Pumalo na sa 39 na insidente ng hate crime na tuma-target sa mga Pilipino ang naitala ng Philippine Consulate sa New York City.

Sinabi ni Department of Foreign Affairs (DFA)  Assistant Secretary for Migrant Worker’s Affairs Paul Raymund Cortes, nagiging maingat ang mga awtoridad sa pagtukoy ng mga hate crime mula sa mga regular na pag-atake.

Dagdag ni Cortes, maituturing lamang na hate crime ang isang insidente kapag binanggit ng suspek ang bansa o lahi ng biktima sa komprontasyon.

Siniguro naman ni Cortes na nakakapagbigay ng tulong sa mga biktima ng hate crimes habang tinutulungan sila ng mga lokal na awtoridad sa pagsasampa ng mga kinakailangang kaso.

Hinihikayat ang mga health workers at senior citizen na magpabakuna ng Messenger RNA (mRNA) COVID-19 vaccines para sa ikalawang booster shot.

Ito ang inirerekomenda ng Health Technology Assessment Council (HTAC) ang pagtuturok ng second booster ng Pfizer o Moderna COVID-19 vaccine upang maiwasan ang symptomatic illness para sa health workers makalipas ang apat na buwan matapos maturukan ng first booster.

Sinabi pa ng HTAC na ang Pfizer vaccine ay para sa senior citizens makalipas ang apat na buwan mula nang unang booster.

Sinabi pa ng HTAC na aprubado ni Health Secretary Francisco Duque III ang rekomendasyon nito at umarangkada na ang rollout sa pangangasiwa ng National Covid-19 Vaccination Operations Center.

 Inaprubahan na ng Food and Drug Administration (FDA) ang hindi bababa sa 12 home antigen test kits para sa COVID-19.

Ayon kay FDA Officer-In-Charge Oscar Gutierrez, marami pa silang hinihintay sa Research Intitute for Tropical Medicine (RITM).

Batay sa inilabas na datos ng regulatory body, ang self-administered test kits ay mayroong 83% hanggang 97.5% na sensitivity at 99.5% hanggang 100% na specificity.

Ani ni Guttierrez, walang COVID-19 vaccine manufacturer ang nag-apply para sa booster shots ng mga bata.

Siniguro naman ni Guttierez na nakikipagtulungan sila sa mga kasama nilang mga vaccine experts.

 Nakatulong ang pag-ulan nitong mga nakalipas na araw para umangat ang antas ng tubig sa Angat dam.

Ayon kay Dr. Sevillo David Jr. Executive Director ng National Water Resources Board (NWRB) na nasa 190 meters above sea level na ang lebel ng tubig dito.

Umaasa si David na tataas pa ang antas ng tubig sa dam hanggang sa maabot ang normal level na 212 meters above sea level.

Mahalaga aniyang tumaas ang tubig sa Angat dam dahil ito ang nagsusuplay sa 97% ng tubig sa Metro Manila.

Samantala, tiniyak ng NWRB na sapat ang tubig sa dam pero pinayuhan ang publiko na magtipid sa pagkonsumo ng tubig.

Inihayag ng Philippine General Hospital (PGH)  wala pa silang nakikitang pagtaas ng mga na-aadmit na COVID-19 patients sa kabila ng na-detect na omicron subvariant na BA.2.12.1 na COVID-19.

Ito ang sinabi ni PGH Spokesperson Dr. Jonas del Rosario, sa 25 COVID-19 patients na na-admit sa PGH, 3 ang critical, 1 ang malala habang ang iba ay nagpapagaling pa sa mga COVID-19 wards.

Ibinunyag din ni del Rosario na karamihan sa mga pasyente ay hindi nabakunahan.

Matatandaang, may naitalang labingpitong kaso ng Omicron BA.2.12.1 subvariant sa bansa.

Batay sa datos ng kagawaran, nasa higit 3.68 milyong mga impeksyon sa COVID-19 ang naitala, kung saan, 2,139 ang mga aktibong kaso.

Inaasahang magkakasa ng massive immunization campaign o catch up immunization ang pamahalaan para sa mga batang hindi nakapagbakuna bunsod ng nagpapatuloy na pandemya.

Ayon kay Philippine Medical Association president Dr. Benny Atienza, nakikipag-ugnayan na sila sa Department of Health para sa aktibidad na Chikiting Ligtas’ para tiyaking ligtas ang mga bata mula sa iba’t ibang sakit gaya ng polio at measles.

Aniya, aarangkada ang malawakang pagbabakuna sa darating na Mayo a-trenta hanggang Hunyo a-diyes.

Paliwanag nito, nabatid kasing lima sa sampung bata ang hindi nabakunahan pandemya.

Dahil dito, hinihikayat ng PMA ang lahat ng magulang na mag-antabay sa schedule ng pagtuturok ng mga bakuna sa mga health centers, klinika at mga ospital sa bansa.