NATIONAL NEWS

Tiniyak ng (PNP) Philippine National Police na iniimbestigahan nito ang lahat ng insidente ng karahasan sa panahon ng eleksyon.

Ang pagtiyak ay ginawa ni PNP PIO Chief PBGen. Roderick Alba matapos manawagan ang Commission on Elections o COMELEC sa mga Law Enforcement Agencies na tugisin ang mga responsable sa 16 na Election related incidents.

Nabatid na karamihan sa mga nasabing insidente ay naitala sa Bangsamoro Autonomous Region.

Ayon kay Alba, “committed” ang PNP na resolbahin ang lahat ng beripikadong insidente ng karahasan na iniulat sa pulisya.

Una na ring sinabi ni PNP OIC PLt. Gen. Vicente Danao Jr. na sa pagtatapos ng halalan, tututukan ng PNP ang pagsasampa ng kaukulang kaso sa lahat ng lumabag sa batas sa panahon ng eleksyon.

Bukod sa mga responsable sa insidente ng karahasan, kasama din sa mga papanagutin sa batas ang mga lumabag sa Comelec gun ban, at iba pang alituntunin ng Comelec.

Ibinunyag ng Philippine National Police (PNP) na naresolba na ang 21,306 administrative cases na kinasasangkutan ng mga tiwali at pasaway na pulis mula July 2016 hanggang May 4, 2022.

Batay sa datos  mula sa PNP Directorate for Personnel and Records Management o DPRM, sinabi ni PNP Officer-In-Charge PLTGEN Vicente Danao Jr. na sa nasabing bilang, 5,652 ang sinibak sa serbisyo, 1,150 ang na-demote, at 10,650 ang sinuspinde.

Maliban dito, may 853 rin na mga alagad ng batas ang pinatawan ng salary forfeiture, 2,491 ang ni-reprimand ang sinabon, at mahigit limang daan naman ang ginawaran ng mas mababang parusa.

Ayon kay Danao, base pa rin sa datos, sa 716 PNP personnel na nadawit sa drug-related cases ay 504 personnel na kinabibilangan ng sampung Police Commissioned Officers (PCOs), 479 Police Non-Commissioned Officers (PNCOs) at 15 Non-Uniformed Personnel (NUP) ang tinanggal sa trabaho matapos mapatunayang gumagamit ng ipinagbabawal na droga habang 183 iba pa ang dinimis din dahil sa iba pang drug-related cases.

Giit ni Danao, hindi kinukunsinti ng PNP ang sinumang miyembro ng organisasyon na lumalabag sa batas at nasasangkot sa iligal na aktibidad.

Binigyang diin ni Danao na seryoso ang liderato ng PNP na itama ang lahat ng kamalian at parusahan ang dapat parusahan sa kanilang hanay dahil sa bandang huli ay hindi lang ang pambansang pulisya ang makikinabang dito kundi maging ang mamamayang Pilipino na kanilang pinagsisilbihan at pinoprotektahan.

Sinabon ng Korte Suprema ang dalawang abogado dahil sa reklamong inihain laban sa kanila ng Home Guaranty Corporation (HGC).

Sa isang resolusyon, pinagalitan at binalaan ng mga mahistrado sina Atty. Lamberto Tagayuna at Elmar Panopio na papatawan sila ng mas mabigat na parusa kapag naulit pa ang katulad na paglabag.

Nag-ugat ang kaso sa kabiguan ng law firm ng dalawang abogado na ibalik ang limampu’t tatlong owners’ titles ng HGC.

Gayunman, iginiit ng mataas na hukuman na nagkamali sina Tagayuna at Panopio nang itago nila ang mga dokumentong pag-aari ng state corporation dahil lamang sa utang nito na nagkakahalaga ng mahigit P800K.

Positibo ang National Wages and Productivity Commission (NWPC) na makapaglalabas na rin ang iba pang regional wage boards para sa hiling na umento sa sweldo.

Ayon kay Maria Criselda Sy, Executive Director ng NWPC na nasa deliberation stage na at ilang mga regional wage boards na lang ang nasa huling yugto ng kanilang public hearing.

Aniya, ang mga naiiwan nalang na hindi pa nakatatapos ng public hearing ay para sa domestic workers sa Metro Manila na nakatakda na sa  susunod na linggo pa mapag-uusapan.

Paliwanag pa nito na asahan na sa mga susunod na araw na mag-aanunsyo na rin ang mga regional wage board ng aprubadong halaga ng umento sa sweldo sa kanilang mga nasasakupan.

Ani ni Sy, makikinabang ang nasa 3.6 milyong minimum wage earners sa itinatakdang umento sa sweldo.

Naghahanda na ang Philippine National Police (PNP) ng security plan para sa proklamasyon ni presumptive president Ferdinand Marcos Jr. at presumptive vice president Sara Duterte.

Ito’y matapos ang naging proklamasyon ng labindalawang senador nuong Miyerkules.

Sinabi ni PNP Director for Operations Director Police Major General Val de Leon, nais nilang maging maayos ang transition of power o pagsasalin ng kapangyarihan sa magiging susunod na lider ng bansa.

Kaugnay nito, kanyang sinabi na bagaman payapa sa pangkalahatan ang eleksyon, hindi pa rin sila nagbababa ng alerto at nakabantay sa post-election violence.

Dagdag ni de Leon, titiyakin umano ng PNP na magiging maayos ang transition power sa mga susunod na lider sa June 30.

Nabatid na tatagal ang election period hanggang June 9, 2022. –  sa ulat ni Gilbert Perdez (PAtrol 13)

Nagbabala ang pamunuan ng Bureau of Immigration (BI) sa publiko hinggil sa lumalabas na bagong modus operandi sa online na ginagamit ang pangalan ng mga government officials.

Paliwanag ni BI Commissioner Jaime Morente na maging ang kanyang pangalan ay ginamit ng scammer gayundin ang iba pang government officials upang makapagsolicit ng pera.

Aniya, sa pamamagitan ng email ay magpapanggap ito bilang BI Chief at hihingi ng tulong upang makapagpadala ng pera sa mga nangangailangan na mga kaibigan.

Binigyang diin pa ni Morente, ipagbigay alam umano sa cybercrime authorities ang sinumang indibidwal na mahuhuling nanloloko o ang tinatawag na scammer.

Giit ni Morente, kung sino man ang gumagawa nito ay agad nilang ipagbibigay alam sa cybercrime authorities upang maimbestigahan

Wala pang nakikita ang Department of Health (DOH) para magtaas ng COVID-19 alert level classification sa buong Metro Manila.

Ito’y sa kabila ng mga naitatalang bagong kaso ng COVID-19 sa National Capital Region (NCR).

Sinabi ni Health Secretary Francisco Duque III nananatili sa low risk classification ang Metro Manila hanggang sa kasalukuyan.

Samantala, patuloy pang hinihintay ng DOH ang resulta ng genome sequencing sa mga sample mula sa mga close contact ng mga tinamaan ng Omicron subvariant ng COVID-19.